Ipar Euskal Herriko artistak, ostalariak, gaztetxeak, besta komiteak eta festibal antolatzaileak bildurik sortu da EREINez elkartea, besteak beste SACEM erakundearekiko ezjakintasunak bultzaturik. Tokiko musika hobeki identifikatzea, ulertzea eta baloratzea du xedetzat. Egun koordinatzaile lanetan ari den Mattin Rafurekin elkartu gira, elkarte huni buruz xehetasun gehiagoren ukaiteko.

SACEMaren funtzioa

SACEM Frantziako Musikagileen eta Editoreen Elkargoak, musika-egileen, konpositoreen eta editoreen eskubideak babestea du funtziotzat. Frantziako kultura ministerioaren izendapena du, musika sustatzearen helburuarekin.

Izan ere, artista batek obra bat idazten edota konposatzen badu, eta obra hori entzuna edo zabaldua bada, bere eskubide guzien kudeaketa SACEMi uzten ahal dio. Hego Euskal Herrian aldiz, egoera desberdina da, EKKI (Euskal Kulturgileen Kidegoa) elkartea sortu baitute. Hori dela eta, Euskal Herriko artistek beren kantuak babestu nahi badituzte, aukera dute EKKI eta SACEMaren artean.

Paraleloki, musika zabaltzen duten ostalari, gaztetxe, besta komite edota festibal antolatzaileek faktura bat ordaindu behar diote SACEMi, babestuak diren kantuak hedatu ahal izateko. EREINez elkarteko koordinatzaileak azaltzen zuen SACEMak ez zuela Euskal Herria ezagutzen, ez eta artistak ere. Maiz gertatzen da kontzertu bat antolatu eta, SACEMaren faktura bat jasotzea, nahiz eman diren kantuak babestuak ez izan.

Ohar eta kexa horiek Ipar Euskal Herritik haratago entzuten dira, Frantzia estatu osoan.

Informatu, babestu eta lagundu

Frantziako Musikagileen eta Editoreen Elkargoarekiko ezjakintasunetik bultzatua izan zen EREINez elkartearen sorrera. Beñat Elizondo Xaia ostatuko jabeak SACEMarekin arazoak ukan zituen, 2025ean publiko egin zirenak. Hain zuzen ere, bere ostatuan euskal musika baizik ez zuela ematen eta SACEMek artistak nola ordaintzen zituen ez zekiela, faktura ez ordaintzea erabaki zuen. Afera urrun joan zen, eta 9.000 euro inguruko isuna jarri zioten. Pagatu ez zuenez, 6.000 euro kendu dizkiote bere Xaia ostatuko kondutik. Gertatu zenarekin ostalariak elkartasun anitz ukan zuela eta, zerbait muntatu behar zela gogoetatu zen.

Egun, elkartea ez da oraindik ofizialki sortua, arazo teknikoengatik prefekturak galdea ez onarturik. Artikulua idazterakoan, bigarren saiakera ere ezeztatua izan zaie. EREINez-eko kideak elkartzekoak ziren, ezeztapen hori arrazoi beragatik gertatu ote den ala beste zerbaitengatik izan den argitzeko.

Zubi lana egiteko xedez

Dinamika huntan sarturik, hamar bat kide dira erregularki elkartzen ari, 30 bat artisten babesarekin.

Helburuetariko bat musika ekosistema hobeki ulertzea da, artista, ostalari, festibal antolatzaile, besta komite eta gaztetxeei SACEMarekin zer harreman duten jakitea eta nolako laguntza ukan nahiko luketen, azken huni hobeki erantzuteko.

EREINez elkarteak zubi lana egin nahi du artista eta erakundeen artean. Hala ere, azpimarratu da helburua ez dela SACEMi lekua kentzea, baizik eta interlokutoreak izatea.

Oro har, xedea da tokiko musika erabileren datuak hobeki biltzen laguntzea; aldi berean, artisten lana hobeki aitortua izatea sustatzea, antolatzaile eta ostalariei informazioa baita laguntza eskaintzea, sektoreko egiturekin elkarrizketa egonkorra eraikitzea eta lurraldeari ahots bateratua ematea.

Usutan jakiten ez bada ere, SACEMak diru laguntzak proposatzen ditu festibalentzat.

Harremanetan sar daiteke guresoinuaereinez@gmail.com mailaren bidez.