Ez ditugu ahantzi behar

40-ko gerla denboran, zernahi jende deportatuak izan ziren Alemanen larderia ikaragarria jasaiten zutela. Denek zernahi pairatu zuten eta ainitz han nunbait hil ziren, ederrak sofriturik. Ez ditugu ahantzi behar eta urte guziz egun berezi bat berexia da heien ohoretan.

Gaitzeko itzulia

Joanden egunean, Hendaiarat bere bizikletaren puntan arribatu da Frantzia behere hortako gizon bat, Alain Multeau, gaitzeko itzulia eginik, orotarat 712 kilometro. Loir-et-Cher eskualdeko Chouzy-sur-Cisse herritik abiatua zen, bera han bizi baita. Kotte Ecenarro auzapezak ongi etorri bero bat egin dio. Bainan nor da gizon hori eta zendako holako ibilaldia? Bera eria da, Parkinson deitzen den gaitzarekin. Holako ibilaldia eginez erakusten du gaitzari ihardokitzeko molde egokia dela kirol bati hola emaitea. Denbora berean, denetan salatzen du Sécurité Sociale asurantza- etxearen joka-bidea, egokienak litazkeen tratamenduak ez omen dituelakotz gehiago behar bezala diruztatzen...

0brak Donibaneko elizan

Donibane Lohizuneko elizan, obra asko egitekoak dira, batzu arras epe laburrean. Parropiak aste guziz zabaltzen duen ageriak jakinarazi dauku eliza bi astez segidan zerratua egonen dela zonbait egun obra horien gatik preseski. Helduden astean bost egunez, astelehenetik ortziralerat, maiatzaren 14- tik 18-rat beraz, eta ondoko astean lau egunez, asteartetik ortziralerat, 22-tik 25-erat. Soinu tresneria dena berrituko da karia hortarat. Bestalde, duela zonbait denbora ja erran ginuen bezala, elizako bi organoak "akituak" dira. Organo handia behar da berritu. Herria da organo horren jabea. Obretan helduden urtean hasteko, oraiko ustez segurik, paperen egiten ari dira, eta diru laguntza batzuen eskatzen. Berritze hori ainitz gostako da. Hiru ehun mila euro edo holako zerbait. Organo ttipia aldiz parropiarena da. Joanden astean hasiak dituzte berritze obrak. Bada ehun eta hamar mila eurorena. Duela sei hilabete dei bat zabaldua izan baitzen galdetuz jendearen diru laguntza, dei hori arras ederki entzuna izana da, hiruetan hogoita hamar mila euro bidu dira alabainan. Gaineratikoa parropiak nunbaitik ateratuko du. Organo ttipi hori ez da hain aspaldikoa. 1931-n eraikia. Bainan arras higatua haatik eta beraz berritze on baten beharretan...