Jainkoa bizia jendea | 2018ko Abenduaren 06a

ELIZAN MINTZA

Maite Irazoqui

Abuztuaren 20an Aita Sainduak gutun bat zabaldu du Jainkoaren populuari eta gutun hori girixtinoek errezebitu dute. Gehienetan Aita Sainduaren erranak, hitzaldiak eta predikuak, edo Elizaren bitartez, edo entziklika deitzen diren dokumentuen bitartez, edo heda komunikabideen bitartez, ezagutzen dira. Gutun hau bertzelakoa da. Pertsonalki bezala mintzo da, jende bakoitzari mintzo da, laguntza beharrez. Ez da maiz gertatzen den gauza! "Ohartzen naiz, berriz ere, adinik gabeko haur eta gazteek zenbat sofritu duten konfiantza abusu, podere abusu eta sexu abusu elizgizonek eginik" idazten du Frantxua Aita Sainduak eta bakoitzaren laguntza galdetzen du "elizan eta gizartean behar dugun aldatzea egiteko bataiatua den bakoitzak parte har dezan". Eta gehitzen du salatuz nola "klerikalismoak ezeztatzen duen girixtinoen nortasuna eta murrizten Izpiritu Sainduak ezarri grazia bataioaren bidez. Abusueri ez erraitea, klerikalismoaren forma guzieri garbiki ez erraitea da". Dei hori, Elizan Mintzak hartu du.

Elizan Mintza Euskal Herriko talde bat da, giristino multzo bat. Izenak dion bezala, mintzatzea du bere leloa eta Elizan mintzatzea, libroki, errespeturekin eta erantzule gisa. Duela lau urte sortu da talde hori eta egungo egoeran, profetikoa agertzen da. Elizaren gobernua ez da demokratikoa bainan gutun hori deneri helaraziz, Aita Sainduak demokraziara du gomitatzen "Jainkoaren populuari" dei eginez. Huna beraz azken bilkuran egin diren lanak pedofiliaren eta Elizako abusu guzien kontra. Lehenik Samaritano onaren ebanjelioa irakurri eta otoiztu izan da eta haren ondotik bakoitzak izkiriatu du zer gogoetak sortu dituzten pedofilia egintza horiek. Hauek izan dira hor ziren 47 pertsonen gogoetak. Biktimen bizi hautsia, haurrak barne barnean kolpatuak, konfiantza behin betikotz galdua, inozientzia tronpatua, aipatuak izan dira. "Pedofilia kalamitate bat da, haren biktimak ez dira sekulan sendatzen". "Haurrak arras blokatuak dira. Bizi dira hatsa hartzen baitute bainan beren barnea hila da; goizean jeikitzen dira eta herrestaka ibiltzen. Ez dute gehiago oihartzunik". Sendimenduak ere erran dira: gohaindura, jazartzea, errebolta, "orro handizko errebolta", laztura. Eta nola Elizak ez duen deus egin. Nola lagundu Eliza zilo hortarik ateratzen? "Egiazko iraultza egin behar da sexualitatea bertzela bizi dadin Elizan". Apez horien egintzak, abusuak, ezin onartuak dira: "beren boterea baliatzen dute haur horien inozentzia hiltzeko beren gozamen eta gero beren apez ministerioa segitzen dute, alegia eta ez deusik". Ondotik klerikalismoa zer den eta nola borrokatu barnatua izan da: klerikalismoa dela "elizgizonen eta elizgizonak ikusteko molde makurra, gehiegizko begirune batekin eta nagusitasunezko moral joera bat emanez". 6-8 laguneko taldetan, bakoitzak ezarri ditu paperetan bere ideiak, ahalaz konkretuenak. Talde horiek analizatu dituzte, zerrenda batean ezarri eta bozkatu. Helburua zen efektuki jakitea zoin diren jendeen xedeak eta zeri buruz nahi den joan ebanjelioa bizitzeko Eliza saindu batean. Lau orientazio edo norabide nagusi agertu dira: 1 - Eztabaidak antolatu, organizatu Elizan. 2 - Emazteak ezarri autoritate edo aginpide karguetan. 3 - Hitz hartzeko libertatea baliatu. 4 - Diozesak elkargoki gobernatu. Orientazio bakoitzak zernahi ideia ukan ditu eta helduden urtarrilean ikusiko da zoin gauzatuko diren eta nola. Bilkura hori izan da egiazki Elizako haurridetasun elkarte bat, bere bidean zehar Jesusek aurkitzen dituen jendeen kezkak eta nahikundeak entzunez. Zeren, norbait mintzo delarik edo mintzatu nahi duelarik, nehor ez bada entzuteko, zinez entzuteko, norbait hori isilik egonen da. Hori gertatzen da pedofilian bai eta emazte zanpatu eta zafratuetan: beren hitza, beren orroa ez da entzuten, ez da entzun nahi, ez da onartua. Elizan mintza taldeak nahi ditu orro horiek entzun, oihu isil horiek entzun eta errespetatu, Jesusek berak erraiten duen bezala "Beharririk baduenak entzun dezala!"

Email Buffer Facebook Google Twitter Pinterest LinkedIn Digg StumbleUpon Tumblr

3477. zbk

Diru poxi bat galduz deus ez da galtzen adixkideak galduz ainitz galtzen da

Alemaniako erran zaharra

Gure Hitza | 2018/12/06

InSight!

Janbattitt Dirassar

InSight, zer da hori? Edo nor da? Hauxe da izen bitxia gisa guziz! Bestenaz ere S hizki larri bat erditsutan sartuz idatzi behar-eta! Bainan nundik heldu ote da hitz hori? Euskara batuak ekarri ote dauku Mari jainkosa zaharra bizi omen den leize ilunaren zolatik? Ez dea izaitekotz ingleskeria bat gehiago, beste frangoren artean sar-arazia? Xo, InSight hori zeru-tresna edo espazio-tresna arraro baten izena da, Martes izarbelerat igorria iragan maiatzean eta gaitzeko itzulia eginik han pausatua joanden egunean. Mundu guzian, jakintsun ainitz loriatuak, hori dela hori ikaragarriko balentria! InSight bi urte han nunbait egon beharra da. Hango zernahi berri igorriko daizkigu, argazki eta beste. Jadanik ere baditu hel-araziak. Duela hameka urte zeru-tresna bat igorria izan zen Marteserat eta planeta horren axalaz zernahi gauza ikasi zen. Bainan InSight horrek badu aise muntadura gehiago, muntadura trebeago eta ausartagoak. Izarbelaren barnea ere ikertuko du. Ez da beraz harritzeko jakints...

Irakurri segida


Gurekin harremanetan sar




segurtasun kodea

Herria Euskal Astekaria - Jacques Laffitte, 11 - 64100 BAIONA | tel: 05 59 25 62 85 | Legezko oharrak | Diseinua eta programazioa: iF Diseinuak - 2016