Donapaleuko ospitalearen engaiamendua emazteen kontra egin bortizkerien prebentzioan Urte guziz, azaroaren 25ean, nazioarteko egun bat antolatua da emazteen kontra egiten diren erasoen prebentzioa garatzeko. Karia hortara, hamabost eguneko kanpaina bat antolatua da gure eskualdean eta Donapaleuko ospitalea engaiatua da horri buruz. Joan den ostiralean erakusmahai bat ezarria zuen merkatu plazan eta ospitaleko profesionalek, “Erran eta bizi” elkarteko kideekin xehetasunak eman dituzte gai sentsible huni buruz. Kanpainak segitzen du aste huntan, azaroaren 21ean, ostegunarekin: egunaz (9:00 – 16:00), erakusmahai bat atxikia izanen da ospitalean berean eta arratsean (20:30), film bat pasatuko da Donapaleuko zinema gelan. “Darling” deitzen da eta ondotik debate bat izanen da ospitaleko profesionalekin eta jendarmeriako arduradunekin. Hogei bat lagun elkartu dira joan den ibiakoitzean Donapaleuko auzitegi karrikako gelan Zabalik elkartearen biltzar nagusian. Zahar eta gazte hor ziren “euskararen erabilera biziko urratsetan laguntzeko eta hedatzeko”, hau baita Zabalik-en helburu nagusia. Azken urteetan egin lanen bilana gogoratua izan da: urte guziz egiten diren Otsail Ostegunak, Manex liburutegiaren kudeantza, udaberriko ibilaldiak ikastolarekin, 2017an egin zen “Heskuara Amikuzen” egunaldia, aurten abiatu liburu irakurketa, bertsu afariak, Korrikan parte hartzea, kideen formakuntza... besteak beste. Lan sail horiek erakustera emaiten dute zer lan sakona eta baliosa daraman elkarte hunek euskararen alde. Ondoko urteeri buruz ere gogoetak izan dira biltzar nagusian. Ideiak mahai gainean ezarriak izan dira eta kide berri batzuk engaiatu dira. Egia Amikuzen senditzen den berreuskalduntzeak luzarako lan baten beharra baduela. Epe laburrean, Euskararen Urtaroa kari, ondotik aurkeztuak diren bi solasaldi hauetan Zabalik elkarteak parte hartuko du. “Etxetiargoa Amikuzen” hiltzaldia azaroaren 23an Gamueko jauregian (10:00) Amikuzeko Laminak elkarteak antolaturik, Zabalik elkarteko Jean- Claude MAILHARINek hitzaldi bat eskainiko dauku “Etxetiargoaz Amikuzen”, Aiziritze Gamue eta Zohaztiko kasueri so berezi bat eginez. Jakin behar da, 1700ean, Amikuzek zituen 1.000 laborariak, denak, etxeko jaunak zirela… bainan 1946an %55ak etxetier bilakatuak ziren: %83 Aiziritzen, %89 Gamuen, %80 Zohaztin! Noiz eta nola galdu zuten beren burujabetza? Zer zen etxetiargoa? Nolako jendartea zen Amikuzen denbora haietan? Zein borroken medioz Amikuztarrek beren fiertatea berreskuratuko dute 1946tik aitzina? Hala zer izanen den hitzaldi hunen mamia. Hitzordua emana da azaroaren 23an, ibiakoitzez (10:00), Gamueko Jauregian. Bat bateko itzulpena segurtatua izanen da. “Euskara ikasten dut”, Beñat Laxaguen liburuaren aurkezpena azaroaren 30ean (10:00) Donapaleuko mediatekan Beñat LAXAGUE aiziriztarrak MAIATZ argitaletxean argitaratu berri du euskara ikasteko metodo berri bat. Metodoa euskara ez dakiteneri zuzendua da, baina hitzaldi huntan euskaraz aurkeztuko zauku. Zer ikasi du bera den “euskaldun zahar” denak metodoa huntzen ari zela? Zer dauku erakusteko euskararen ikasteko prozesuaz? Zein publikori zuzentzen du bere lana? Horra nolako galderen inguruan ariko zaukun azaroaren 30ean, ibiakoitzez (10:30), Donapaleuko mediatekan. Hemen ere, bat bateko itzulpena segurtatua izanen da. Orotarik “Ogi besta” enpresak ogi banagailu automatiko bat ezarri berri du Uharte-Hirin eta Unason, Herriko Etxeen laguntzarekin. Goizeko 8:00etan ogi freskoa ekarria izanen da eta herritarrek lekuan berean eskuratzen ahalko dute direktubanagailuan kartarekin pagatuz. Beste herri batzutan hala nola Ilharren, Labetze-Bizkain, Martxutan, Behaskanen, Amenduzen, Gabadin, Garruzen eta Arberatzen, Ogi Bestak postaren partaidetzarekin helaraziko du ogia etxetara astean bietan azaro hondarretik goiti. Donapaleuko antzerki taldeak bere azken obra “T’emballe pas!” presentatzen du Saint-Louis zinema gelan azaroaren 15etik 24arte ostiral eta ibiakoitzez (21:00) eta igandean (15:00).