Etorkinekin eta Diakite
elkarteen sustenguz: Taula
federazioko konpainiek beren
kabareterat gomitatzen gaituzte
igandearekin, abenduaren
8an (16:00), Arteen Entzutegian.
“Théâtre de l'Unité” taldearen
“Kapouchniks” formatutik
inspiratzen da. Jitez politikoa,
disidentea eta satirikoa, kabarete
erreaktibo inprobisatua aktualitateko
gaietan oinarrituko
da. Bat batekoa izanik, hogei
bat aktore, dantzari eta musikari
elgarretaratuko dira bezperan,
egunetik biharamunera lantzeko
emanaldia. Hunkitzen gaituzten
gaiak, izan seriosak edo arinak,
jorratuko dituzte egun hortan.
Hor bildua izanen den dirua
Etorkinekin eta Diakité elkarteen
alde da. Sartzea 10€, haurrak
(12 urte petik) 5€. Lekuak mugatuak
izanez, hobe erreserbatzea:
cabaretcri@gmail.com
Hor berean dugu abendoa, gero eta gehiago
abendu deitzen duguna. Ene partetik aspaldian
badut haatik halako arranguraño bat, urteko azken
hilabeteak ukan baitu lekuka beste izen bat,
neguila, batzuk laburtzen dutena, negila erranez,
eta arras egokia berenaz, ene gustuko segurik,
adiarazteko negua laster hasiko dela. Ez litakea
domaia neguila izen hori arrunt eta alde bat
galtzerat uztea? Gauza bera beste hilabete izen
zonbaitentzat. Hala nola ilbeltza -hilabete beltza
– hor delarik urtarrilarentzat eta loraila maiatzarentzat.
Gainerat, abenduaren kasuan baditake
nahasketa bat bezala bainan egia erran gaurko
egunean hortaz ez duke nehork axola handirik.
Alde batetik hilabete izena da alabainan eta bestetik
Elizaren egutegian Eguberri aitzineko denboraldia.
Bestaburu horren prestatzeko baliatzen
dena. Bi abendu badira nolazpait.
Eguberri aipatu baitugu, hirietako karrika eta
plazetan anitz tokitan jadanik ezarriak dira Eguberri
eta Urtats gogoan paratzen diren argi...