Biltzar nagusi Heraitzeko Santa Katalina kaperaren jabe den ''Les Amis de la Chapelle'' elkarteak, joan den igandean, beren patroinaren bestakari meza ondotik, urteko biltzar nagusia egin du, Heraiztar multzo batekin eta auzapezarekin. Jeannot Lastiri lehendakariak urteko berri eman du, bai izan diren ekitaldietaz bai eta finantzamenduetaz. Kapera hortan meza bat emaiten da hilabeteak ukan dezazken bosgarren igandean, gehi besta kari maiatzean eta Santa Katalinaz. Aurten bi bataio ere egin dira. Kaperari doi bat bizi emaiteko antolatu ere ditu kantaldi batzuk, hala nola Xiberotarrak bestakari, Auzotik emazte taldea udan eta Otxalde taldea joan den larunbatean, 90 bat entzule bilduz. Ganer huste bat ere eginik izan da, eta harmonium xaharra despeitua. Atera etekinekin sankristiaren antolaketa bukatu dute. Egitasmoeri buruz lehendakariak azpimarratu du segida iraunkor baten beharra senditzen duela; auzo hortan biztanle kopurua emendatzen ari da eta damugarri litaike kapera hesten ikustea behin betikotz, zaila izan baititaike gero berriz idekitzea. Egitasmo horietan aipatu da hemendik urte bakar batzuetara banka edo jar alkien berritzea higatzen hasiak direlako; aipatu ere uraren ezartzea bainan hunek zailtasun gehiago agertzen ditu funts pribatuetan pasa behar delako. Ohartu dira ere urtean zehar degradazio edo zitalkeria batzuk izan direla ezin onetsiak. Segurtasunarentzat lan batzuk eginak izanen dira. Dener buru egiteko, 2020an kantaldi batzuk eta ganer huste bat ber ikusten ditu elkarteak. Auzo hortako biztanler bazkide urtesaria hein berean atxikiz (5 euro familia bakar) eskatua zaie gehiago inplikatzea elkartean. Auzapezaren hitz batekin eta adiskidantzako baso batekin bukatu da biltzarrea. Arbola landatze Uztaritzeko herriak eta ONF erakundeak gomita bat luzatzen dute herritarreri abenduaren 8ko igande kari. Hardoia gunean (hau Uztaritzeko oihanean da), arbola landatze bat eginen da. Iniziatiba horren helburua da uztariztarrek konkretuki eta zuzenean parte har dezaten oihanaren berritze proiektuan. ONF erakundeko arduradun bat hor izanen da egun hori kudeatzeko. Parte hartzailer galdatua da jarraikaraztea botak, eskularruak, aitzurrak edo palaherrak, bainan oroz gainetik umore ona. Parte hartzailen errezebitzea orientazio mahaiko aparkalekuan eginen da (8:30). Izenak eman behar dira Herriko Etxean abenduaren 5eko telefonoz: 05 59 93 00 44 edo emailez: mairie@ustaritz.fr. Familia guzieri idekia da