Ladj Ly frantses zinegilearen “Les
misérables” filmak hotzikara eman daut.
Film bortitza, zozotua bezala utzi nauena.
Victor Hugoren Les misérables eleberriari
keinu bat eginez, Parisaldean den
Montfermeil hiriko kartier batean bizi duten
egoera gogorra
zaigu kondatua, garai
bateko etorkinen haurren inguruko istorio
korapilatsuak, errealitate
bat guk hemen
nehundik ere ezagutzen ez duguna. Hiri
handietan etorkinen kontrako bozak gero eta
gehiago altxatzen direla, ez da baitezpada
harrigarria. Alta, ez dira horiek hobendunak,
baina bai gobernu desberdinak, etorkinen
integratzeko araberako politika bideratzen
jakin ez dutenak. Victor Hugoren hitz
hauekin bururatzen da filma: “Ez da ez
belar tzarrik, ez gizon gaiztorik, lur-lantzaile
txarrik baizik”.
Negu atari huntan, elkarte humanitarioak –
Bihotzeko Ostatu, Gaueko Mahai, Epizeria
Solidario eta abar – lan eta lan abiatuak dira
gabezia handienean direnen fagoretan, hain
doa prekaritatea handituz gure jendartean.
Eta gabezian direnetan, hor ditugu
etorkinak (immigratuak edo migranteak
ere deituak), elkarte humanitarioen ateetan
gero eta usuago jotzen dutenak. Orokorrean,
jendeak – guhaurek barne – mila
estakuru aurkitzen ditu horieri ateak
hesteko. Erraiten da zenbaitzuk segurik,
eskain diezazkiegun elkartasunaz gehiegi
baliatzen direla. Baliteke. Gehienak halere
zinez behar gorrian daude. Eta askoren
egoera kaskarraren aitzinean, nola egon
bihotza idor?
Euskal lurralde huntan, Solidarité Migrants-
Etorkinekin izeneko kolektiboa besteak
beste arduratzen da etorkinen laguntzeaz.
Kolektibo horren barne daude hamalau
elkarte, tartean Garazi, Baigorri eta
Iholdi-Oztibarreko Etorbide. Duela guti
elkarte horren biltzar nagusia iragan da
Donibane Garazin, hogeita hamar bat
lagunen artean. 2018ko maiatzean sortu
zuten Etorbide elkartea bihotz zabaleko
militante suhar batzuk, etorkineri eskua
eta sustengua eskaintzeko. Laurogei bat
laguntzaile baditu gaur, diru poxi baten
emaile, beharrak ahal bezainbat estaltzeko.
Etorkinak, adingabeak, helduak ala familiak
haurrekin, han hemenka errezebituak dira,
bihotz oneko familia batzutan edo herriek
egoitza bat eskainirik, hala nola Baigorri
eta Arrosak. Eta egoitzaz gain, frangotan
jatekoa, beztitzeko, artatzekoa, garraioak,
formakuntza eta mila gauza ttipi. Eta, guzien
gainetik, administrazioarekin harremanak
betetzen lagundu, ukan ditzazten araberako
baimenak. Baina hortan ere trabaz betea
den bidea. Cimade elkarteko France
Morillo andereak esplikatu dauku botere
publikoen ganik dena egina dela etorkin
horien kanporatzeko. Segur, eskainia zaien
laguntza porroskeria da menturaz, nahiz
energia jale izan, baina ezinbertzekoa,
gizatasunez. Goresmenak hortan bermatzen
diren guzieri!