"Macron mintzatu da beraz, ederki eta abilki mintzatu gisa batez, eleketari ederra baita, bakoitxak berea behar du, eta frango azeria". Horra hitzez hitz zer ginion sail huntan berean duela xuxen urteño bat, solasgai ginuela presidentak Urtats bezperan egina zuen hitzaldia. Urruntxago, hauxe idazten ginuen: "Erne eta harro agertu da jaun presidenta bainan ez da errana anitz tanto irabazi duela ". Gogoetatuak ginauden ere gaitzeko konplimenduak eginez bururatu baitzuen bere solasaldia, guk ez ahantzia haatik nola mintzatua zen bestalde ez hain aspaldi jende asko azkarki apalduz. Eta gu galdeka ari: "bi katixima mota ba ote ditu gure gizonak? Egun batetik ari eta bihar bestetik". Jazko hitz horiek ber-berak hartzen ahal ditugu berriz ere gure gain. Bai, untsa prediku ederra entzun dugu, dei kartsu batzuekin zinez eta funtsez elgarri atxikiak behar dugula segitu eta holako. Bat izaite horrek munta handi-handia baduela. Nork erran dezake solas horiek ez direla ederrak.