Ez bide da deusik irabazten gure solasetan dena itzuli-mitzuli artzearekin. Mintza gaiten beraz garbiki, deplauki aitortuz ez dakigula norat ari giren mundu guzian gaindi hoinbeste makur egiten duen gaitz izigarri horrekin. Orainokoan jakintsun handienek ere ez dakite xuxen xuxena erraiteko segurik, zer den koronabirus deabru hori. Zer den berenaz, nola hazten den eta nola hedatzen. Gauza frango ikasi da bizpahiru hilabete barne bainan beste frangoren ez jakinean gaude. Ikusten duguna da, ikusten eta senditzen, holakorik ez dela naski behinere gertatu, salbu beharbada Erdi- Aroan peste izurrite ikaragarri bat izan zelarik. Arrunt nahasiak gabiltza. Segur, lau asteko konfinatze luze bat jasanik, hein bat latza bainan gure onetan zena, gaitza etzadien sobera heda, etxetik ateratzen bederen ahal gira, hori bera ez baita guti. Joaiten ahal gira guhauren gusturat Hendaiatik Santa Grazirat edo Saratik Pauerat. Baimen berezirik gabe eta nehori ez erraiterik zertarat goazen holako edo halako tokirat. Itsas hegi hortan berriz ibiltzen ahal, mendian ere ba. Multxo ttipika bederen. Eskolak idekitzen ari, saltegi eta lantegi frango ere ba, giro hobea da hor gaindi. Hatsa hobeki hartzen dugu. Ezin gorde haatik badela oraino bide luzea egiteko gauzak beren usaiako tornurat jiteko. Ostatu eta jatetxeak hoin aspaldian zerratuak, ekainean idekitzen ahalko diren ere ezin erran segurtamenekin. Hori ere makur handia. Bestalde, hoinbeste besta eta ikusgarri ezabatuak edo gibelatuak, ez dea zinez kezkagarri? Konparazione, Herri-Urrats ez da egin maiatzeko bigarren igandean. Aski karkulatzen ote dugu zer den Herri-Urrats hori? Besta eder bat bistan da, guziz argia eta koloretsua, denek euskararen alderateko atxikimendu kartsu bat agertuz. Mundu bat bilduz Senpereko aintziraren inguru xoragarri hortan. Besta arraroa ez da dudarik bainan denbora berean parada gaitza ikastolen azkar laguntzeko, badutelarik preseski holako laguntza baten beharra! Eta ez guti! Azken berrien arabera, arte huntan ez bada makurragorik, Herri-Urrats irailaren 20an izaiten ahal litake. Ondarearen egunak beharrak ditugun asteburu berean. Artetik erraiteko, euskara eta ikastolak ez direa hain xuxen gure ondarearen lore ederrenetarik? Bainan Herri-Urrats bezala, zonbat hitzordu balios ez dira ezin segurtatuak izanen giroa hoin minbera deno! Hala nola herriko bestak anitz tokitan. Eta hoinbeste ikusgarri, gure kulturaren lekuko direnak, lekuko ezin aski preziatuak. Eskas handia izanen da eta anitz gisetarat! Gainerat, gibelatzen ahalko direnak noiz eginen dira? Denak udazken hastean, kasik denak betan edo betantsu? Elgarri itzal handia eginez orobat. Bai, arrunt itsu-mandoka gabiltza. Hori ageri da ere, beharbada oraino gehiago, ez dugu besterik entzuten, ekonomiaren alorretan. Lantegi frango keinka txar batean dira, ez jakin zeri buruz doatzin. Aski lan ukanen duten beren langile guziak ezin atxikiz aitzina segitzeko. Sal-erospenen gora-beherak nolakoak izanen ote diren. Turismoaren sail berezi hortan ere, zonbat arrangura! "Aurten ez da sasoinik izanen " diote batzuk. Beste frango baikortxago daude halere. Ez dela ingelesik ikusiko, ez eta alemanik, paristar guti ere hain segur. Bainan hurbilagoko jendea jinen dela, nehork uste baino gehiago berdin, konfinatzea aitzina arintzearekin, etxetik ehun kilometro baino urrunago joaitea haizu izanez. Segur, hori hola gertatzen ahal balitz, ez litake hain gaizki denen buru. Salbu hara, ez gira oraino hortan.