Dolu - Herria kazeta hunen irakurle jarraikia, Axafla Baitako Iñazio Indak, mundu hau utzi zuen Pazko astelehenez, apirilaren 13an, 87 urtetan, eritasunak gaina harturik. Anitz urtez Herriaren irakurle leiala izan da. Bera pilotari izana eta pilotazalea, ez zuen huts egitekoa kirol horren zutabea bereziki. Azkaineko berrieri anitz atxikia eta euskara bai eta kantua errotik gustukoak zituen. Hetsialdia izanez, ez zen elizan sartzea haizu eta oren erdiko ospakizuna hilerrietan iragan zen hogoi bat familiako kideek otoitz eta kantuz Iñazioren inguruan, Jean Eliçagaray apezak zuzentzen zuela ospakizuna. Jean-Pierre Cachenaut apez eta adiskideak, pandemia hunek sanotzera utziko duelarik giroa, hain segur, eukaristia ospatuko duela azkaindarrak kartsuki bilduz, Iñazio eta zendu diren herritarren fagoretan. Maska banaketa eta maskagintza Lan munduko gehiengoa etxetik atera eta, herriko karrikak ez dira ordutik kasik hutsak eta isilak. Bertzelako giroan sartu gira aste huntan: auto tutak entzun dira, abiadura polliki azkartu ere, aurpegiak arindu eta jendeen arteko harremana libratu; libertate gehiago gure joan-jinetan eta sakelan paperik gabe ibiltzea zilegi da. Saltegi, merkatu, miriku, ile apaintzale eta bertze frango tokitara hurbiltzeko hobe edo beharrezkoa maska aurpegian ongi kokatua erabiltzea. Herriko Etxeak gomita luzatua zuen, azkaindarreri, astelehen arratsaldetik ortzirale iluntze arte, Biltoki salara bakotxak oihalezko maska bana eskuratzeko. Baina, astearte arratsaldeko maskak agortu dira, 4.300 bizilagunentzat arras xuhurki jin baitira Euskal Elkargotik. Hori ikusirik, auzapezak galdatu du, bortz urte huntan asteazken arratsalde guziz biltzen den dendari multxoari, laguntzea maskagintzan parte hartuz. Astelehen arratsaldetik beretik hasi dira beraz hamar bat xinaurri ttipi, denak emazteak, kolorezko oihalki, mihise eta bertze mozten, behar den neurrian emaiten, plegurak moldatzen, kaxatzen, azpiltzunak josten eta elastikoak muntatzen, geldi gabe aste guzia lanean maskaketara jiten zen jendea hornitzeko. Horra beraz, bertze herri anitzetan bezala, orenak kondatu gabe eta dohainik egin duten lan ederra. Eskerrak merezi dituzte!