Herriz Herri - Bidarrai (NB) | 2020eko Maiatzaren 21a

Bidarrai

Heriotze – Bide-Arteko Koxe Mari Marisco zendu zaigu 89 urtetan (uztail erditan egin beharrak zituen 90). Oraindik pixkor zen eta deskonfinamenduaz baliatu nahiz, Donibane Garazirat joana zen, lorios. Maluruski, eroriko bat egin du karrikan eta buru hezurra hautsirik altxatu dute sokorritzaileek, eta berehala eraman Donapaleuko ospitalera. Zorigaitzez, han eman du azken hatsa. Urritzateko errekako Senperenbordan sortua zen, sei haurrideetarik hirugarrena. Geroxago, Bidegorrietara joan zen familia bizitzera, aitamek auzoko etxalde hori erosirik. Aritzakungo Itsusiko Mayi Bordarekin ezkondurik, Bidarrairat etorri ziren bizitzera, lehenik Turxilbeherean, ondotik berek eraikitako Bide-Artean. Seme bat ukan dute, Jean-Pierre. Koxe Mari ttipia deitua zen hemen, alabainan bazen bertze Koxe Maririk herrian, hala nola Koxe Mari handia. Ofizioz laborari ekarria zen Koxe Mari ttipia, bainan ez dut sekreturik salatuko erranez kontrabanda munduko pertsonai garrantzitsuenetarik bezala ezagutua zela. Koxe Marik eta Mayik urte urosak bizi izan dituzte beren hiru alaba ttipiekin, Kattalin, Graxi eta Añarekin, eta ere beren hiru arra-haur ttikiekin. Azken agurrak eginak izan zaizkio Koxe Mariri, gaurko egoera sanitarioak behartzen dituen neurri mugatuetan, Donibane Garaziko hiletxean eta astelehen arratsaldean gure herriko elizan. Gure partetik, Mayiri, Jean- Pierre eta Moniqueri, hauen hiru alaba eta bizilaguneri eta haur ttipieri, bai eta jendaki guziari gure doluzko agurrik zintzoenak. Bertzalde, jakin dugu ere Brigitte Crouzat gure herritarraren ama zendu dela, eritasunez, Chalon- sur Saône aldean. 83 urte zituen. Familia huni ere gure dolumin bizienak. Eskolatik zenbait berri – Deskonfinamenduak ekarri duen sartze berri bitxi huntan, herriko eskolako 36 ikasleetatik 14 berriz hasi dira, erakasleek auzapezarekin adosean ezarri neurrien errespetuan. Lehen bi asteetan 14 ikasle beraz, eta ondotik 6 ikasle gehiago dira abiatuko. Buraso batzuk haatik deliberatu dute beren haurrak ez batere eskolara igortzea, heldu den buruileko sartzea arte. Eta jantokian, hor ere neurriak errespetatu behar-eta, bi zerbitzutan jaten dute haurrek. Mendi lasterketak ezeztatuak Heldu den uztailaren 18ko mendi maratoia eta maratoi-erdia ezeztatu ditu Baztandarrak elkarteak. “Erran gabe doa pena haundia dela, bainan helburu nagusia da gure arteko bakotxa, elkarteko kide, lasterkari, laguntzaile, atera dadin osagarri onean epidemia huntatik” dio elkarteak. Eta hitzordu berri bat finkatuko du heldu den urterako. Herriko kontseilu berria Gobernuak erabaki du maiatzaren 18tik harat beren karguan jartzen ahalko direla martxoan gehiengo osoz hautatuak izan diren hautetsiak. Gisa hortan, onodko egunetan izendatuak izanen dira gure herriko auzapeza eta axuantak.
Email Buffer Facebook Google Twitter Pinterest LinkedIn Digg StumbleUpon Tumblr

3545. zbk

Norbeitek ez badu deusik erraiteko eta hala ere zerbeit erran nahi, beti gaizki mintzatzen da.

Voltaire

Gure Hitza | 2020/05/21

Eta orain?

Janbattitt Dirassar

Ez bide da deusik irabazten gure solasetan dena itzuli-mitzuli artzearekin. Mintza gaiten beraz garbiki, deplauki aitortuz ez dakigula norat ari giren mundu guzian gaindi hoinbeste makur egiten duen gaitz izigarri horrekin. Orainokoan jakintsun handienek ere ez dakite xuxen xuxena erraiteko segurik, zer den koronabirus deabru hori. Zer den berenaz, nola hazten den eta nola hedatzen. Gauza frango ikasi da bizpahiru hilabete barne bainan beste frangoren ez jakinean gaude. Ikusten duguna da, ikusten eta senditzen, holakorik ez dela naski behinere gertatu, salbu beharbada Erdi- Aroan peste izurrite ikaragarri bat izan zelarik. Arrunt nahasiak gabiltza. Segur, lau asteko konfinatze luze bat jasanik, hein bat latza bainan gure onetan zena, gaitza etzadien sobera heda, etxetik ateratzen bederen ahal gira, hori bera ez baita guti. Joaiten ahal gira guhauren gusturat Hendaiatik Santa Grazirat edo Saratik Pauerat. Baimen berezirik gabe eta nehori ez erraiterik zertarat goaze...

Irakurri segida


Gurekin harremanetan sar




segurtasun kodea

Herria Euskal Astekaria - Jacques Laffitte, 11 - 64100 BAIONA | tel: 05 59 25 62 85 | Legezko oharrak | Diseinua eta programazioa: iF Diseinuak - 2016