Herri-Urrats irailaren 20an? Horra zer adierazpen arraroa aurkitu dugun Peio Jorajuria Seaskaren lehendakariaren bitartez, hainbeste duda-mudaren ondotik, erabaki dute udazken sartzean egitea. Maiatz hunen 10ean iragan beharra zen eta ikusiz zer euri erauntsiak isuri diren eta nola bazter guziak urez hanturik zabiltzan, nunbait eskapada eder bat izan da denendako. Alabainan ekitaldia finkatu artean, baimen asko eta asko lortu beharrak dira, hauek denak baldintzatuak dira egoera sanitarioari. Senpertar eta euskaldun guziek, eguzki izpi bat bezala hartzen dugu berri bikain hori. Arrosa hau ere arantzez betea da bainan hunen xixtakoek, indarra baizik ez dute sortuko arduradunen baitan zailtasun guziak gainditzeko. Hemendik laster xehetasun gehiago ukan behar gintuzke, anartean “Gaki Ge” aitzina. Kirolen berri Errugbia dugu aipagai nagusia, aitzinetik pentsatu bezala sasoin tristea iragan da, mihi gaixto batzuek zioten, ea kranpoien ordez eskalapoiak erabili dituzten? Arraileriaz aparte, aurtengo erronka 3. mailan mantentzeko sobera gotorra zen, jakinez kirolari andanaxka batek utzi dutela beren taldea eta beraz ekipa biziki gazte batekin arizan dira eta gainerat erreserbarik gabe. Nunbait esperientzia ona izan da diotenez, ez baitute egundaino amore eman eta 3.-“mi-temps” delakoan denetan azkarrenak agertu dira eta ez da guti. Orain giro onak segi dezala “promotion honneur” mailan, hemen behar lukete beren hoberena eman, aupa zuek. Bertzalde lasterka edo bizikletaz ibiltzetik kanpo, beste kirol kolektibo guziak debekatuak dira mementoan. Beraz, Gaintxikiko trinketa eta kirol sala zerratuak gelditzen dira, agian laster idekitzeko eskubidea izanen dute. Nahas-mahas Egun hauetan, jakin dugu prentsaren bitartez Helbarrun auzoan xakur bat pozoindatu dela, landa izkin batean bare-pozoia jan ondoan. Gertakari hunek sekulako ika-mika sortu du sare sozialetan. Iduriz jabeak, SPA eta Sepanso erakundeen sustenguarekin, pleinta ekartzeko xedea luke. Ekintza hunek argiztatzen du, nola hiritar ohiak orain baserrira hurbiltzearekin eta laborantxa mundua orokorki ez direla beti elkar bizitzaren bidetan ibilki. Zorigaitzez auzitegiek dute arrakasta holakoetan. Maska banaketak Duela bi aste lehen maska banaketa iragan da eta azken astearte eta asteazkenean iragan beharra zen ere Gazteluko aparkalekuan. Bertzalde, osagarri arazoengatik hurbiltzen ez direneri, etxerat libratzeko zerbitzu bat ezarria da, hortarako deitu Herriko-Etxera: 05 59 54 10 19.