Polizaren eskuetan jendeak hiltzea ez da Ameriketan bakarrik gertatzen. Frantzian ere Adama Traoré izeneko beste beltz bat hil zen, 2016ko uztailaren 16an, Beaumont- sur-Oiseko jendarmerian, 24 urte betetzen zituen egunean. Geroztik, 4 urtez, gorputz ikerketa eta medikuen arteko eztabaidak luzatu dira jakiteko zerk hil zuen Adama Traoré. Jujeek manatu espertisen arabera ez da polizaren falta izan bainan familiak famatuak diren mediku berezitueri eginarazi dituen kontra ikerketen arabera, Adama Traoré arrastatu duten 3 jendarmek jasanarazi presioneagatik da ito. Horra zer dion gainera 3 jendarma horietarik batek: “gu denen gorputzen pisua hartu dugu”. 4 urtez mediku legistek baztertu dute itotzearen tesia bainan familiak ez du sekulan amore eman. Apirilaren 2an iragan diren sustengu manifestaldi jendetsuek ukan dute eragin eta joan den ortziralean, sekulan galdezketatuak izan ez ziren bi lekukoen deklarapenak galde egiten dituzte instrukzio jujeek. George Floyd afera gogoan, polizaren jokamoldeak berrikustekoak dira Frantzian ere.