Osakidetzako langileak karrikara aterako dira urtarrilaren 23an (igandea), larrialdi zerbitzuen galkadura eta ospitaleetako gainkarga salatzeko. SATSE, ELA, LAB, CCOO eta UGT sindikatuek deitzen dute EAEko hiru hiriburuetan eginen diren manifestaldi horietan parte hartzera.

Deitzaileen arabera, osagarri publikoak orain ezagutzen duen egoera ez da pandemiaren ondorioa. Aldiz, COVID-19ak jadanik bazegoen arazoa makurtu baizik ez du egin.

Sindikatuek salatu dute Osakidetza “baliabiderik, antolakuntzarik eta plangintzarik gabe” ari zaiola pandemiaren seigarren uhinari buru egiten. Halaber, manifestaldiaren antolatzaileek diote Eusko Jaurlaritzak ez duela urratsik egin arazoak konpontzeko. Azken honi eskatuko diote Osakidetzara bideratutako aurrekontua handitzeko eta Europar Batasuneko batez bestekora parekatzeko, lantaldeak indartzeko, falta diren langileak ordezkatzeko eta lan kargak arrazionalizatzeko.

Urtarrilaren 5ean sartu da indarrean animaliak sentikortasuna duten izaki bizidun gisa aitortzen dituen legea. Beraz, hemendik aitzina animaliak ez dira gehiago “gauzak” bezala kontsideratuko. Gainera, nahitaez, nortasun agiria beharko dute. Animalien eta gizakien arteko bizikidetza harremanak arautzea da lege berriaren helburua.

Bertzeak bertze, legeak ondorioak izanen ditu bereizten diren bikoteentzat, onez onean ez badira ados jartzen lau zangotako beren lagunen etorkizunari buruz. Kasu horretan, auzitegiak erabakiko du bikoteko zein kidek erdietsiko duen animaliaren zaintza.

Halaber, bideko ezbeharretan nahitaezkoa izanen da animaliak artatzea, debekatua izanen da objektu material gisa erabiltzea.

Urtarrilaren 14 honetan hamar urte beteko dira Jose Luis Alvarez Enparantza Txillardegi zendu zela.

Euskalgintzak sekula ukan duen idazle, pentsalari eta hizkuntzalari emankorrenetakoa gogora ekartzeko, ekitaldi andana antolatu dute Donostian hilabete honen 11, 13, 15 eta 18ko.

Asteartean, “Txillardegiren hizkuntza politikaren oinarriak eta bere gaurkotasuna” izeneko mintzaldia izan da San Telmo museoan. Ostegun honetan, berriz, kronikak liburua aurkeztuko dute Koldo Izagirrek, Garbiñe Ubedak, Juan Luis Zabalak eta Gorka Bereziartuak. Aurkezpen hau ere San Telmon izanen da (19:00).

Heldu den larunbatean, (urtarrilaren 15ean), eguerditik aitzina, ekitaldia eginen dute Txillardegi plazan. Azkenik, urtarrilaren 18an, astearte ilunabarreko 7etan, “Txillardegi: euskalgintza eta Txillardegi: intelektuala eta gizartea” liburuak emanen dira ezagutzera.

Europako bertze herrialde batzuetara joan nahi zuten 8.115 migratzaile artatu zituzten 2021ean erakundeek Araban, Bizkaian eta Gipuzkoan dituzten zentroetan. Azken lau urteetako kopururik handiena da hau.

Halaber, ez da ahantzi behar hiru migratzaile ito zirela Bidasoa ibaia zeharkatzera entseatuz.

Eusko Jaurlaritzak pasaian diren migratzaileak laguntzeko sare bat plantan ezarri zuen 2018an eta egunean 500 lagun aterpetzeko zentroak zabaldu zituzten EAEko hiru lurraldeetan.

Gurutze Gorriak Irunen kudeatzen duen aterpetxera heltzen dira migratzaile gehienak. Alabaina, Frantziara heldu nahi duten pertsonentzat erreferentzia gune bilakatua da zentro hau.

Euskal Herrira heldu diren migratzaileen %94 Kanariar uhartetik sartu ziren Espainiako Estatuan, Frantziara eta Europa erdialdeko bertze herrialde batzuetara heltzea dute helburu.

Donostian ez da danborradarik izanen aurten ere, iaz bezala, osagarri egoera ez baita oraino aski segurua. Hori erabaki dute haurren eta helduen danborradetako arduradunek eta Udalak joan den astean. Eneko Goia auzapezak erran du “halabeharrez eta tristuraz” hartu dutela erabakia.

Beraz, bigarren urtez segidan, urtarrilaren 20an ez da bandera altxatze eta jaisterik izanen, ez dira hiriko plaza eta karrikak musikaz beteko.

Hala ere, aste honetan bertze bilkura bat egin beharra dute (lerro hauek agertu orduko egina izanen da, hain segur),haurren danborrada bertze gisa batez egitea aztertzeko.

Haatik, Esther Ferrer artistari Urrezko Danborra emateko ekitaldia eginen dute urtarrilaren 20an, eta herritarrei merezimendu medailak ematekoa ere, 19an.

Azpeitian ere aurtengo haurren danborrada ezeztatu dute, herriko intzidentzia metatua 8.600ekoa baita 100.000 biztanleko.

Sare Herritarrak euskal presoen eskubideak aldarrikatzeko manifestaldia antolatu ohi du urte guziez, urtarrila hastapenean, Bilbon eta Baionan. Joan den larunbatean iragan da hau, baina ez usaiako moldean, COVID-19 izurritearengatik. Bilbon manifestaldi erraldoi bakarra egiteko partez, Hegoaldeko hiri eta herri desberdinetan atera dira jendeak karrikara arratsaldean. Baina lehenago, larunbat goizean, mahai ingurua antolatua zuen Sarek Bilboko Euskalduna jauregian.

Ekitaldi honetan “indarkeria anitzeko” biktimek parte hartu dute. Mahaiaren inguruan izan dira Robert Manrique, Naiara Zamarreño eta Rosa Lluch ETAren biktimak eta Maider Garcia eta Idoia Zabalza estatu indarkeriaren biktimak. Pilar Kaltzada kazetariaren galderei ihardetsi diete.

Manriquek adierazi du legeak euskal presoak Euskal Herrira ekartzea ahalbidetzen badu, egin behar dela. Naiara Zamarreñok gehitu du zilegi dela presoek beren familiengandik hurbil egon nahi izatea. Halaber, erran du harentzat ame...

Presoen eskubideen aldeko mobilizazio egunaren biharamunean, Joseba Azkarraga bozeramaileak hitza hartu du plataformaren ikusmoldea emateko.

Hasteko, Azkarraga kontent agertu da herritarren parte hartzea nasaia izan delako. Gehitu du alderdi politiko guziekin mintzatzen segituko duela ETAko presoei ezartzen zaien “salbuespenezko” espetxe politika geldi dadin. Ildo horretan, elkarlanean aritzeko deia luzatu du.

Bestalde, Azkarragak jakinarazi du Sare herritarrak txosten bat agertuko duela urtarrilean. Hor aipatuak izanen dira azken hiru hamarkadetako kartzela politikari buruzko azterketa eta geroari buruz egiteko gelditzen dena