Azalekoa | 2022ko Agorrilaren 04a

Kirola Euskaraz Ahoan

M.O.

Kirola%20Euskaraz%20Ahoan

Uda huntan haurrentzat kirol elkartea sortu da, Kirola Euskaraz Ahoan izenekoa, Lorea Echeverria eta Antton Seychal-ek dute proiektua abiatu. Lorea Echeverriarekin solastatu gira, azaldu dauku egitasmo berri hunen xedeak zein diren.

Kirola euskaraz egiteko beharra

Lorea Echeverria proiektu huntako partaide bada, ikasketak kirol sailean eginak ditu, igeriketa jardueretan kirol-hezitzailearen estatuko diploma eskuratua du. Gaur-egun ikastolan erakasle baldin bada, bereziki udan, igeri kurtsoak haurreri eskaintzen ditu. Antton Seychal errugbian anitz urtez aritu ondoan, gaur egun Nafarroa errugbi batasunean hezitzaile da. Biek kirola praktikatzen badute, ohartu dira sail horretan, bereziki haurrentzat euskaraz eskaintza guti zegoela.

Lorea Echeverriak azaltzen zaukun igerika erakasten duelarik, beti euskaraz egiten duela, haurrak guti praktikatzen badu ere, ulermena ukanez bere erranak segitzen ditu. Euskarazko jardunaldietan eskas handia izanez, eskaintzen dituen igeri kurtsoetan Oztibarre, Baigorri eta Garazi eskualdetatik Makea arte etortzen dira.

Proiektua eraman dutenak ohartu dira, eskolatik kanpo ingurumen euskaraduna sortzeko beharra zegoela, bereziki kirol alorrean. Inkesta egin zuten jakiteko holako egitasmoa plantan jartzeko egingarria zenez, burasoenganik erantzun baikorrak ukan zituzten, talde bat bildu zen ikusteko zer proposamen egiten ahal zuten.


Kirola Euskara Ahoan proiektua

Taldeak erabaki du kirol anitzeko elkartea sortzea, Ortzaizen irailean hasiko dena. Herriko Etxearengandik sostengua ukan dute, ezkerpareta eta futbol zelaia erabiliko dituzte haurrekin ariketak egiteko. Astelehen guziz, irailetik goiti, bi adin tartetakoak bilduko dituzte: lehenik 6 eta 8 urte dituztenak (17:30-18:30) eta ondotik 9 eta 11 urte artekoak (18:30-20:00).

Proiektu hau eraman dutenek helburu batzuk finkatu dituzte, kirola euskaraz praktikatzeaz gain, haurraren ongi izaitea lehenetsia da, plazera har dezan. Lorea Etcheverriak erraiten zaukun, eskolatik harat, haurra jolastuz, euskara deskubritzeko parada eskainia zaiola. Balore batzuk ere ikasi nahi dira horietan beren artean lehiaketarik ez izaitea, neska-mutikoak nahas aktibitatea elkarrekin egitea, hizkuntza eta talde izpiritua uztartuz.

Eskola bakantzen arteko epe bakoitz kirol desberdinak dira proposatuak: norabide-orientazio jokoa (iraila/urria), kinball (azaroa/abendua), zirkoa edo(ta) borroka (urtarrila/otsaila), baloi joko kolektiboa eta futbol gaelikoa (martxo- apirila) eta urtea bururatzeko mendi-bizikleta (maiatza/ekaina).

Kirola Euskaraz Ahoan elkartearen helburua ez da haurrentzat diren errugbi edo(ta) pilota bezalako aktibiteeri konkurrentzia egitea, baizik eta euskaraz hitz eginez beste kirol mota batzuen praktikatzea.


Euskara haurraren egunerokotasunean

Lorea Echeverriarentzat haurrak eskolatik kanpo bere ingurumena euskaraduna izaitearen beharra ezinbestekoa dela adierazten zuen. Haurrak eskolan bakarrik euskaraz hitzegiten badu, usaia eman behar zaio bere egunerokotasunean erabiltzea. Eskolatik kanpoko jardunetan frantsesez ari bada, gero haurrek beren artean horrela segitzen dutela ohartua da, ohidura horien aldatzea da elkartearen xedeetan.

Igeri kurtsoak emaiten dituelarik, haur batek hasieran uraren beldurra badu, haren hizkuntzan mintzatzeak lasaitasuna emaiten dio, konfiantza hartzen duela. Euskarazko kurtsoak emaiteko trebatzaile eskas handia dela gehitzen zuen.


Gauza praktikoa

Kirola Euskaraz Ahoan (KEA) elkartearekin harremanetan jartzeko kea.kirolak@gmail.com bidez egin daiteke, adin tarte bakoitzeko multzoak hogei haurretara mugatuak dira. Esperantza dute, holako ekimena beste leku batzuetan garatuko dela, normaltasunez euskaraz hitz egiteko gisan.

Email Buffer Facebook Google Twitter Pinterest LinkedIn Digg StumbleUpon Tumblr

3657. zbk

Gure Hitza | 2022/08/04

Bestaz-besta?

Janbattitt Dirassar

Bestak, pestak, festak, ez dugu denek beti hitz bera erabiltzen, bainan denak gauza beraz ari gira, denek, edo kasik denek, hoin maite ditugun besta horietaz! Bi urte eta erdiz nunbait han besta frango edo ez dira batere egin, edo arras murrixki, ezagun zen bazela hor eskas handia! Orain bestak berriz hor dira eta badute ikaragarriko arrakasta! Denek gogoan nolako mundua bildu den Iruñako San Ferminetan, gauza bera egun hauetan Baionako bestetan, beren 90 urteak guziz airoski ospatzen zituztela! Hoinbeste jende hoin harro, gehienak xuri eta gorriz jantziak! Egitaraua ere gisa hartakoa! Hor aipatzen ditugu aspaldian fama handi-handia duten bestak bainan beste anitzek ere nola ez dituzte bazterrak harrotu, izan Donibane Lohizunen, Hazparnen, Uztaritzen, Maulen, Donapaleun, Pausun eta beste anitz tokitan! Agorrileko Andredena Mariak ekarriko dituenak ere gaitzak izanen dira itxura guzien arabera, aroa batere alde izanez geroz segurik! Bai, jendea azkarki atxikia dago herriko b...

Irakurri segida


Gurekin harremanetan sar




segurtasun kodea

Herria Euskal Astekaria - Jacques Laffitte, 11 - 64100 BAIONA | tel: 05 59 25 62 85 | Legezko oharrak | Diseinua eta programazioa: iF Diseinuak - 2016