Beskoitzeko Herriko Etxea legez kanpo

Beskoitzeko Ikastolak astearte huntan elkarretaratze deia zabaldua zuen, Herriko Etxearekin aldi bat gehiago arazoak ukanez. Herriko Etxea entseatu da herriko kantinan ikastolako haurren kopurua mugatzea, ikasturtea bururatzean 2022ko iraileko sartzerako 54 haur deklaratuak izan ziren. Baina ikastolako ikasleen kopurua gainditua izan da eta 55 haurrek kantinan jan behar lukete. Hastapenean auzapezak “55.” haurra kantinara joaitea ez du onartu, gibelera egin aitzin, burasoeri inposatu du ikasle gazte horrek bakarrik eskolako lagunak baino ordu erdi bat berantago jan beharko zuela. Afera konpontzeko nahian, ikastola eta Herriko Etxearen artean iragan diren bilkuretan, toki eskasa berriz argumentatua izan da, horretarako ikastolak klaseko orduak aldatu ditu. Jakinez ikastolako haurrek bakarrik jaten dutela, hain segur haurño baten lekua baliteke!

Eskolako lagunak utziz, haur bat bakarrik ezagutzen ez dituenekin bazkaltzea ezin onartua dela eta, ikastolako burasoak mobilizatzeko deia egin dute.

Joan den astean afera mindu da, 3 hautetsi kantinara etorri dira, ikastolako haurrak jaten ari zirela. Haurrak kontatu dituzte eta galdezkatu, delako “haur” hori nun eta nor zen jakin nahian. Holako jarrera batek ikastolako burasoak keztatzen ditu. Auzapeza eta bere hautetsiak ikastolaren kontra izanez, haurreri mendekatzea lotsagarria dela salatu nahi ukan dute.

Bixintxoko pestak

Horiek ere hor ukanen ditugu hilabete huntako 3. asteburuan.

Urtarrilaren 20an: adinekoen krakada Bixintxo komiteak eskainirik (16:30) eta “Hypnose” delako ikusgarria Bixintxo antzokian (20:30).

21ean: oinezko ibilaldiendako izen emaitea (9:00), hautua izanen duzuelarik herria oinez (9:30) ala herria lasterka (10:30). Arratsaldez haurren pesta eta krakada (15:00), zintzur bustitze eta afaria Baga Bigak alaiturik (19:00). Gauerditan dantzaldia Katxi taldearekin.

22an: Baserritarren azoka (9:00-12:00). Bixintxoko meza nagusia (10:30), “Los amicos” bandak animaturik. Komiteak eskainirik zintzur bustitzea, ondotik taloak (12:00). Arratsaldeko Aizkoa abesbatzaren kontzertua (15:00).

Pesta on guzieri!