Sortze

Goresmenak Viviane Rio eta familiaz Anttattoinekoa den Marc edo "Markotx" Errotabehereri. Hein lehen haurra ukan dute, aitzineko astean. Maiwen Elaia deitu duten neska ttipia, amaren bretoi eta aitaren euskal erroak agertarazi nahiz bere izenean.

Ikastolaren ate idekitzeak

Ez da Baigorriko ikastola xede eskasean. Hauen aipamena egin da, joan den aste hondarreko biltzar nagusian: nahas-mahas, Josu Martinez-en "Alaba" filmean haurren parte hartzea, burasoek antzerki baten muntatzea, maskarada baten ikustera joaitea Xiberora...

Diru mailan ere erraiten ahal da osagarri onean dela, burasoen inplikazioari eta hauek antolatzen dituzten animazioeri esker, bereziki: ikusgarri, kantu afari, elizako plazako palantxa lehiaketa, besteak beste.

52 ikasle dira, 2 urte et'erdietarik 11 urtetara, hots ama ikastolatik kolegioa aitzineko lehen mailara doazenak.

Ikastolaren pedagogia eta lan moldeetaz gehiago jakin nahi baldin baduzue, ibiakoitz huntako ate idekitzeetara joaiten ahalko zirezte (9:30-12:00).

Libertimendua

Martxoaren 5ean, igande huntan ospatuko da: desfilea (10:30) eta ondotik Libertimendua Gaineko plazan. Ondotik, bazkaria Plaza Xokon. Izena lehen bai lehen eman behar da zenbaki huntara: 06-49-56-82-49.

Nor bizi da Izpegiren bertze aldean?

Izenburu hau eman diote apirilaren 14, 15 eta 16an (ortziraletik igandera) Amaiur-ko aterpetxean iraganen diren Baztan eta Baigorriko gazteen arteko trukaketari. Gure Herriko Etxeak die baztandar arduraduneri proposatu eta hauek errexki onartu dute. Zehaztu dute bi ibarren arteko harremanak azkarrak eta naturalak zirela lehenago (Espainiako eta 39-45eko gerletan elgar laguntza, ezkontza, kontrabanda)... bainan horiek biziki ahuldu direla denborarekin. Baigorriko Nafarroaren Eguna eta Elizondoko Baztandarren Biltzarretik kanpo, gurutzamendu gutti.

Topaketak 11 eta 15 urte artean duten gazteeri idekiak dira. Egonaldi horren egitaraua: mendi ibilaldia, dokumentala, ginkana, elgar ezagutzeko jokoak eta ongi pasatzeko denbora librea. Izenak emaiten ahal dira 06-43-62-23-22 zenbakian edo animazioa@baigorry.fr helbidean.

Gertakari hunek errefera ukanen du Baigorrin, heldu den larrazkenean.

Pilota

Ezker paretako atxiki ttipian eta Frantziako xapelketan, Iban eta Teo Riouspeyrous anaiek helduen lehen mailako finala 34/40 galdu dute, Angeluko Hardoitarrak-en kontra.

Haatik, gazten mailan, Eneko Izoco eta David Macias xapeldun dira, Azkaineri 40/35 nagusiturik.