SALT LAKE CITY, UTAH. Euskal asteburu lanpetua ukanen dute heldu den hau Estatu Batuetako Salt Lake Cityn, larunbat huntan NABOk 2023ko bere lehenengo bilkura bertan eginen baitu, goizean goiz hasirik eta eguerdira arte. Arratsaldez, berriz, Utah-ko Euskal Etxeak bere ohiko 'Basque Dinner Dance' edo euskal afari eta dantzaldia gauzatuko du, aurtengoa 39.a, euskal dantza, kultura eta gastronomiaren erakusgarri, publikoa gehienik amerikar ez-euskaldunak, eta ateratzen den sosa Euskal Etxearen eta Utahko Triskalariak dantza taldearen lagungarri. Janari prestatzaile, EEko sukaldariak, eta musikari, Elkotik inguratuko diren Mercedes Mendive eta Nekane Lejardi soinu-pandero-jotzaile.

BILTZAR eta HITZORDUAK. Aste eta asteburu hau hainbat euskal etxek baliatuko dute heien urteko biltzarren egiteko. Hala izan da asteazkenean Madrilgo Euskal Etxean, eta halaxe eginen dute asteburuan, besteak beste, Boise, Mexiko, Homedale edo(ta) Bordeleko Euskal Etxeek. Astelehenean, Agate Deuna edo Santa Ageda ospatuko dute, konparazio, Boisen, eta koplak kantatuko dituzte euskaraz hiriko karriketan Euskal Museotik abiaturik. Boiseko Ikastolako umeek ere heien Agate Deuna saioa eginen dute, kantuz eta makilekin lurra joz. Bat eginen dute baita ere usadioarekin Madrilgo Euskal Etxekoek, Madril erdiguneko karriketan barna, eta Alacant-en hiriko Hizkuntz Eskola Ofizialeko euskara ikasleek. Otsailaren 4an, bestalde, Kalifornian, urteroko Txorizo Txapelketa antolatu dute Yuba City eta Marysville inguruko euskaldunek Sutten-en.