Bide beretik, Iñigo Urkullu lehendakariak Legebiltzarrean jakinarazi du 2024tik aurrera eta 2 urtez, Jaurlaritzak 300 euroko laguntzak emanen dizkiela hilabete guziz 25 eta 29 urte bitarteko gazteei, gurasoen etxetik joateko eta emantzipatzea laguntzeko. Laguntza horiek eskatu nahi dituzten gazteek zenbait baldintza bete beharko dituzte: galdea egitean 25 eta 29 urte artean izatea, 28.000 eurotik beherako diru-sarrerak ukaitea, galdera egin aitzineko urtean Euskadiko Autonomia Erkidegoan bizi izatea, azken hamar urteetan hiru urtez biztanleen zerrendetan egon izana egiaztatzea, alokairu-kontratua edo etxebizitza librea erosteko kontratua ukaitea.

Harrigarria badirudi ere, otsail hasieran jakin zen Renfek CAFi eskatu 31 trenen fabrikazioa gibelatuko zela, trenen zabalera neurtzetan tronpatu zirelako, bereziki tuneletatik pasatzea ezinezkoa zelako. Asturiasen, Kantabrian, Euskadin, Galizian, Gaztelan, Leonen eta Murtzian distantzia laburreko zerbitzuak ematen zituen trenak berritzea zuen helburu. Miguel Angel Revilla Kantabriako presidenteak eta Iñigo Urkullu lehendakariak otsailaren 27an Gasteizen bilera egin dute, Santander eta Bilbo arteko tren lasterraren proiektuari "bultzada bat emateko" asmoz.

Espainiako eskuin muturreko hiru kide ezagunek, Martin Saenz de Ynestrillas Falange Espainoleko hautagai izanak, Francisco Franco fundazioko kide den Alvaro Romerok eta Jesus Longueira poliziak, Euskal Herrian zenbait ekintza egitekoak zeuzkaten. Azkenean, ekitaldi bakarra baizik ez dute egin: "ETAren biktimen omenezko" lore eskaintza. Donostiako udaletxearen aurrean egin ekitaldian dozena erdi bat lagunek baizik ez dute parte hartu.

Jarki faxismoaren kontrako erakundeak deitutako elkarretaratze bat ere iragan da, "Faxismoaren aurrean Euskal Herri langilea antolatu" lelopean, baina Ertzaintzak Alderdi Eder osoa hartu du eta protestan ari zirenei hara hurbiltzera ez die utzi.

Nafarroako Gobernuko Hezkuntza Departamentuak iragarri du martxoaren 6tik 17ra egingo dutela ikastetxeetako aurre matrikulazioa. Horren harira, "Zerotik aurrera aukeratu Euskara!" kanpaina Nafarroako euskalgintzako hainbat eragilek eta mugimenduek abiatuko dute. Adierazi dutenez, "familiek haurrentzako nolako etorkizuna nahi duten erabakitzeko garaia da". Aitzin matrikulazio kanpaina, haurrak euskarazko D ereduan izena emateko bultzatzeko sortu da. Euskara Nafarroa osoan ofiziala izatearen alde egin dute eragileek, adierazi dute zonifikazioak ez duela inongo oinarri soziolinguistikorik. Mañerun berriki gertatutakoa jarri dute adibide moduan. Mañeru eremu mistoan sartzeko galdearen kontra egin zuen Nafarroako Parlamentuko gehiengoak. "Herritar gehienen nahiari bizkarra eman diote eta gainera lehen hezkuntzako haur gehienen familiek euskaraz ikasteko hautua egin dute: %64k D ereduan eta %36k A ereduan. Ez du inork gaztelera hutsezko hauturik egin. Erabaki horrek atea hetsi dio...

Zoritxarrez urte guzizko gertakaria, Nafarroako suhiltzaileek elurrarekin Orbaizeta aldeko Menditxipin galdua zen beilaria lagundu behar ukan dute eta Auritzeko osasun zentrora eramana izan da.

Baztango nahiantek osatzen duten Elkarrizan elkarteak bere biltzar nagusia ospatu du, urteko gorabeheren bilana eginez. 48 kidez osatua den elkarteak, 2.831 oren dedikatu ditu laguntza molde anitzetan: pertsonei eman laguntzak 2.831 orenez, erietxetan pertsonen laguntzeko 62 oren, etxeetan diren 65 pertsonez okupatzeko, 517 oren zahar-egoitzetan kantuen bidez adinetakoak alaitzeko. Bestalde elkarteak formakuntzak ere proposatu ditu. Jarduera gehienak Lesaka eta Berako zahar-etxetan eginak izan dira.

Baigorriko eta Baztango Udalek bi udalerrietako gazteen arteko topaketa antolatu dute. "Atzoko, gaurko eta biharko sareak" izenburupean, bi Herriko Etxeek, 12-15 urte bitarteko gazteak, trukaketa egonaldi batean parte hartzera gonbidatu dituzte eta apirilaren 14tik 16ra lehen topaketa eginen da, Amaiurko aterpetxean. Historian zehar harremanak mota anitzetakoak izan dira: abere hazkuntzaren inguruan, gerletako errefuxiatuen testuinguruan, kontrabandoari lotuak, elkarteen trukaketak, edo(ta) bertzetakoak, biztanleak haran batetik bertzera bizitzera joan direnak. Trukaketa hauek, Baztan eta Baigorrik elkarren artean, mendeetan zehar osatu dituzte.

Gipuzkoako Foru Aldundiak adostu du Francisco Francoren diktadurarekin lotutako titulu guziak baliogabetzea. Besteak beste, 1939ko uztailaren 1ean onartutako seme kutunaren titulua eta 1945eko uztailaren 23an onartutako Foru Aldundiko ohorezko presidentearena diktadoreari kendu dizkiote. Horiez gain, Francoren erregimenean emandako beste zenbait aitorpen, ohore eta sari ere baliogabetu dituzte.

Errusiak Ukraina inbaditu zuenetik, duela urtebete, gerlatik ihesi Euskal Autonomia Erkidegora jin diren 3.500 errefuxiatu inguru, Hegoaldeko 1.500 familiek hartu dituzte. Europa ekialdeko herrialdeari elkartasuna adierazteko, Lehendakaritzan ekitaldi instituzionala egin dute, Iñigo Urkullu buru zela. Lehendakariak Errusiaren inbasioa gaitzetsi eta bide diplomatikoak jorratu behar direla azpimarratu du.

Madrilgo entzutegi nazionaleko Reyes Jimenok epaileak, ETAko Asier Karrera, Fernando Buesa eta bere bizkartzainaren hilketaren ustezko egileari, hirugarren gradua -hots egunaz kanpoan eta gauaz preso- kendu dio. Karrera zortzigarren presoa da hirugarren gradua ukatzen zaiona, 2021eko urriaz geroz, hots presondegietako ardura Jaurlaritzaren eskuduntza ezarria izan zenetik. Geroztik Jaurlaritzak hirugarren graduko 34 neurri hartuak ukan ditu, presoen %40ek erdietsi dezaten asmoarekin. 34 horietarik, 24 prokuradoretzak errekurrituak izan dira. Estatu osoko presondegietan 169 preso gelditzen dira, horietarik 7 Euskal Herritik kanpo. Frantzian preso direnak 13 gelditzendira, horietarik bi Lannemezanen. Espainiar prokuradoreak trabak presoen askatzearen bidean ezartzen ari ditu.

Milako bat garraiolarik beren kexua agertu dute. Gipuzkoako diputazioak A15 eta N1 autobian ezarri ordainpeko-autobidea dute jo mugan. 3,5 tonatik gorako kamioiek ordaindu-lekuak pagatu behar dituzte, 76 kilometroko bidea nahitaez egiteko. Autobidea 11.000 kamioiek egunero hartzen dute, heldu baita hilero 2.000 euro ordaindu beharko dutela. Paga-gune sistema hori bi aldiz ezarri eta, auzitegiak ezabatuak izan dira, bainan diputazioak bere asmoarekin tematurik segitzen du.