Azalekoa | 2023ko Martxoaren 02a
"Sibastarrak" pastoral xedea Urdiñarben, 2023ko üdan
Aintzina Be alkartea
Àƒ'œztailaren 30ean, agorrilaren 4an eta agorrilaren 6an, Urdiñarbeko plazan "Sibastarrak" pastorala emana izanen da. Izen bereko alkartea sortü da, pastoralaren berri ükan dügü.
Asmüak
Urdiñarbe 520 bat bizizale dütüan Xiberoako herria da. Betidanik, Urdiñarbeko herriak eüskara, eüskal kültüra eta Xiberoako üsantxak biziarazi dütü: pastoral, maskarada bai eta ere festibal handi baten antolatzez, hala nola:
Pastoralak - 1909an: Roland, Santa Elena eta Abraham. 1980an: Iparragirre, Etxahun Irurik idatzirik. 1988an: Agosti Xaho, Jean-Michel Bedaxagarrek hontürik. 1999an: Iparragirre, Etxahun Irurik. 2023an: Sibastarrak, Maritxu Neguelouarena.
Maskaradak - 1977, 1982, 1993, 2006 eta 2019an.
Festibal külkürala - 30 urtez, Urdiñarbeko Bil Xokoa alkarteak antolatü dü Musikaren Eguna festibala, hatsarrean "hizkuntza gütitü" herrialdetarik horra ziren kantari eta talde desberdinen jinaraztez (Korsika, Bretainia...), ondotik mündü osotik horra ziren müsika taldeer zabaltzez.
Azken maskaraden ondotik, 2019an, gazteetarik abiatü da pastoral baten egiteko xedea (23 urte
berantago). Hortik, 2021az geroz, bilküra zonbait antolatürik izan dira, herritarrer berriaren zabaltzeko, pastoral geiaren haütatzeko: Sibastarrak da haütatürik izan.
Aitzina Be, 2019an sortü alkarteak dü xede hau joanarazten, Herriko Etxearen lagüngoarekin, kültüra eta hizkuntza süstengatzen düan alkartea da.
Zerentako Sibastarrak
Lehen lehenik pastoralaren haütatzeko, abiatü gira gure artean pentsatzez "zer badügü herrian eta nor badügü herrian eramaile" izateko. Hortik, ohartü gira pastoral idazleetarik hastez herrian bazela bat beno haboro.
Natüralki Maritxu Neguelouak idatzi düan Sibastarrak dügü haütatü. Herriko emazte gazte bat beita, idazle berri bat eta ere lehen pastorala dü hau, bena ez hori baizik! "Madalena eta Jean Sibasen" istorioak honki begitaü ere bai:
- Gure ala Eüskal Herriko istorioaz gaüza ikasten beitügü: gerla desberdinak, iheslariak...
- Begiraleak Iparraldeko emazteen "mugimentüa" Madalenak sortü beitü.
- Betidanik eüskararen transmisioa defendatü beitüe anai-arrebek.
Ber ildoan jarraikitzeko beste partaide artistikoak ere herrian atzaman dütügü:
Errejenta: Battitta Berrogain pastoral idazle, aldi hontan errejent kargüa hartüko dü 3. aldikoz. Kantore eramailea: Jean Charles Sans, aspaldidanik müsikalari gisa pastoral eta maskaradetan parte hartzen dü eramaile gisa. Lagüngoa gisa Sophie Larrandabürü ere hor dateke.
Dantza eramaileak: Iban Etchegoinberry eta Laurence Boissinot, biak maskarada desberdinetan Aitzindari izanik dira.
2022ko azaroaren 5ean, 180 herritarrek izena eman düe pastoralean parte hartzeko arizale ala lagüntzale bezala. Jei horren antolatzeko, batzorde desberdinak antolatü dütügü: artistiko, logistika, finantza, komünikazio eta dendari batzordeak. Talde bakotxak bere saila joanaraziko dü.
Helburuak
Lehen lehenik pastoral baten helbürüa da herritarren algarretaratzea, 7 hilabetez, neskenegün gaü oroz. Urdiñarben hori ikusiko da zeren bi kartiel düan herri bat da (Garaibi eta Lamba), herri oso zabal bat. Xede honen bidez ere, belaunaldi desberdinak kürütxatüko dira, aberastarzün pertsonal bat sortzez. Bestalde ere, "euskara" hizkuntza eder eta bizi baten süstatzea da pastoral baten helbürüa. Ahal oroz mustrakak, bilkürak eüskaraz egiten dira. Hizkuntza batek jenteen arteko harremanak azkartzen dütü, eta familiatarzün bat ere sortzen da herriko bizizaleen artean.
