Joan den astean Amikuzeko berrietan aipatua izan da Joanes Goyhenetche, Ostankoan bizi zena, 87 urtetan zendu zela. Ehorzketa egunean Peio Iralur militante laguna izanak Joanes omendu du, huna hemen irakurri lekukotasuna.

Batzar Nazionaleko erretreten erreformaren inguruko eztabaidak jabalduak dira, diputatuak oporretan direlako. Anartean, aktualitatearen eremua Ukrainako gerlaren urtebetetzearen gaiak mukurutzen digu. Hor dugu, halaber, Pierre Palmaden auto istripu larria, alkoholez eta kokainaz emokaturik gidatzen zuela: irri egiteko gogoak sartu zaizkigu. Donibane Lohitzunen, gutarik hurbil, irakasle batek bizia galdu du, ikasle baten nabala kolpeen pean. Jo Biden Europan dabilkigu, baina mihi gaizto batzuen arabera, ez daki zein herrialdeetan dagoen zuzen. Eta Putin puttunak mintzaldi belikosoak egiten ditu, dakien arren bere armada ez dela sobietar batasunaren garaian bezain azkarra!

Iragan asteko berri batek, gerla eta bestelako munduaren minak irentsi eta bazterrak inarrosi dituela aitor dut: Iker Irribarria pilotari gazteak erretiroa hartu du 26 urtetan, profesionaletan zortzi sasoi konplitu ondoren. Azken pilota partidua martxoaren 4an...

Hazparnen, Elgar Zentroan, martxoaren 4an (10:00), Hemen elkarteak bere biltzar nagusia eginen du. Lehen partean aitzineko urteko berri emana izanen da, ondotik tokiko iniziatiba batzuk aipatuko dira. Bokalen Etxalde elkarteak eramaiten duen proiektua eta lurraren zaintzeko herritarren ekimenak solasgai izanen dira (11:00). Bilkura bururatu eta, FabLabearen bisita eginen da.

"Enplegua Euskal Herrian" eta "Goazen" turismo klusterrak, Lan Zentroaren, Departamenduko Kontseiluaren eta Misio Lokalarekin lankidetzarekin, martxoaren 7an (16:30-18:30), Merkataritza eta Industria Ganbaran bilkura antolatua da. Udako sasoia hurbiltzen ari dela eta, enpresariak eta lana bilatzen dutenak biltzeko xedez.

Laetitia Nivaggioni departamentuko Enpresaburuen Taldeko zuzendariak, konferentzia emanen du: "Turismoko langileak atxiki, enpresen arteko denbora partekatzea erabiliz" (14:30-16:00). Lanerako denbora partekatzeari buruzko xehetasunak emanak izanen dira: norekin, nola, arduren banaketa, konbentzio kolektiboa eta lan-antolaketak optimizatzea.

Ondotik (16:30-18:30), 5 minutuko tailerrak antolatuak dira, Lan Zentroaren laguntzarekin, lan bila direnek, lanerako elkarrizketak nola egin ikas dezaten.