Duela hiru aste, Garruzen bizi zen Maddi Detchart pausatu da. Irisarri Herriestan sortu zen duela 76 urte eta Garruzen egin du bere bizia, Jean-Denis lagunarekin. Hiru haurren ama zen. Lanaren aldetik, erizain izan da eta ondotik haur artatzaile Departamenduan.

Bere bizi aberatsean nola ez aipa bere engaiamendua nekezian diren jendeeri buruz! Duela 18 urte, hogeita hamar bat laguntzaileekin Amikuzen Bihotzeko Ostatua muntatu zuten. Bazekien jendeen behatzen eta behar den enpatia ukaiten. Jendarte oneko harremana zaintzen zuen. Laguntzaileek preziatzen zuten urteko bilketa egunean, Maddik preparatzen zeien xingar eta arroltzeak.

Ehorzketa egunean, Garruzeko eliza ttipiegi zen familia eta lagunentzat, hain ziren nonbrean etorriak. Huna hemen, bihotzeko ostatuan laguntzaile den André Casetek elizan eman duen lekukotasuna.

“Lekukotasun asko erranik izan dira, nahi nuke halere erran zonbat maite zinuen Euskal Herria, euskal kultura eta hizkuntza. Maite zinuen ere kantua eta kantuz artzea, funtsean zonbait urtez arizan gira Behauzeko “Kantuka” taldean. Maddi, fede handikoa zinen, Lurdako beila buruilean zerbait zen zuretako. Beti xaharren eta ezinduen ondoan, ele goxo bat deneri. Nahi ukan dugu bertsu zonbait zuri eskaini. Frantxoak idatzi ditu zuretzat. Agian goxatuko dituzu zeru gain hortarik.

Gure Maddi joan da nork hori sinetsi

Familia penetan senarra haurreki

Hain maite arrahaurra, ez da hor amatxi

Nola segi bizia etxea husturik

Bihotzek’ostatua bigarren egoitza

Behardunak harentzat, lehen arrangura

Haren bizi guzia bestentzat emana

Laguntzaileentzat ere biderakuslea

Zure ofizioa jendeen laguntzeko

Amikuze aldea duzu hautatuko

Garruzeko herrian zira kokatuko

Familia eder ba zuk hor altxatuko

Etzunuke ez nahi sobera nigarrik

Zure lana ez beita oso urrenturik

Talde osoa hor da ongi moldaturik

Gogo bihotzak aska ez ukan beldurrik

Zeruko Ama ona zaitu errezebitzen

Orai pausu goxo bat beituzu kausitzen

Hain maite dituzunak nolaz ere zaintzen

Gu ere zu gogoa amets lo egiten (2)

Frantxoa Caset