Erakusketa emazteak euskal jendartean

Martxoaren 8tik ekainaren 17a arte sorginaren neurriz kanpoko irudietatik edo euskal

emaztearen usaiako klixe ugarietatik urrun, erakusketak jendarte tradizionalean euskal emazteak duen toki berezia aipatzera gomitatzen gaitu. Gizonak bezainbat toki duen etxekoandre hori nor ote da? Euskal jendarteak zer erraiten dauku? Gaur-egun zoin dira emazte modernoen zorteak?

Bask’Elles elkarteak, Marika Gizbers karrikako artistak eta Anne Marie Lagardek“Le matriarcat basque” liburuaren idazleak, eraman duten ikerketa lanari esker erantzunak emaiten dituzte. Ospitaleak gomitatzen gaitu kontakizun historikoez, emazteen lekukotasunezeta artisten behakoez osatutako erakusketaren bisitatzera.

Erakusketaren bisita bateratua martxoaren 17an (10:00) iraganen da, iraupena oren bat eta erdi, prezioa 3€, urririk 8 urtez pekoentzat.

Hitzaldiak

“Emazte protagonistak Euskal Herriko historian”: Jacques Ospitalek eskaini hitzaldia, Ospitalean, martxoaren 24an, ortziralez (19:00), iraganen da.

Eskubaloia

Nazional 2. mailan, lehen taldeak 24-20 irabazi du L'Union taldeari. Frantziako xapelgoan, Irisarri-Atharratzek 28-27 ttantto batez irabazi du, L'Union multzoko lehenari. Orain euskaldunak lehenak dira.

Nesketan, prenazional mailan, Kanbo-Irisarriko lehen taldeak Lège Cap Ferret hirian 34-24 irabazi du. Bigarren taldeak Ossauren kontra 23-24 galdu du.

Heldu den larunbatean, gizonetan bakarrik talde bat ariko da, Frantziako xapelgoan, hemezortzi urtez petik taldekoak Pays de Nestes-era joanen dira (17:00).

Osasun zentroaren estreinaldia

Larunbatean, Herriko Etxeko arduradunek osasun zentroa inauguratu dute. Hor ziren, Jean René Etchegaray, Euskal Elkargoko presidentea, Iñaki Etxaniz deputatua, Anne-Marie Bruthé departamenduko kontseilaria, Frédérique Espagnac, Denise Saint Pée eta Max Brisson senatariak, Fabrice Rosay Baionako suprefeta eta auzo herrietako auzapez frango. Herritarrak ere gomitatuak ziren. Xavier Lacoste jaun auzapezak herrian egin diren obrak aipatu ditu, osasun zentroa, apartamenduak eta Airoski salan egin diren gela eta aldagelak. Horiek guziek zonbat gostatu duten herriari eta zer laguntza ukan duten aipatu ditu. Eskertu ditu hiru medikuak eta paramedikuak, Irisarrin plantatu direlakoz. Suerte handia da, ikusten delarik anitz tokitan medikuen falta badela. Ondotik eguerditan, Airoski gelan, denak goxoki solastatu dira, jan eta edanez.