Olerkarien Udaberria (segida)

Joan den asteko programazioak segida hartzen du ostiral huntan, martxoaren 17an (18:30), Aro-Berri ostatuan. Bertsularien Lagunak elkarteak antolatzen du“Bertsu poteoa”, hunek iragartzen du giro lasai batean harreman aberatsak publikoarekin sortuko direla, baztertu gabe jalgiko diren bertsu koloretsuak. Martxoaren 18an, larunbatean (19:00), “Tapas Arratsa” Larreko kulturgunean, hemen aldiz Arbaso elkartearen ekimenez eskainia da; kontzertua (20:00), Wanda eta Daitoha, azkeneko hunen hitzak ahoskatuak dira rap kantari eta slam dantzari moldean, Wandak bere musika tresnekin emanen du hitzeri doinua. 4 euroko sarrera galdegina da, ez huts egin. Bertzalde ostiralean, Arretxea kolegioko ikasleek ahoskatuko dituzte olerki batzu Herriko-Etxean, saltegietan eta Karrikarte egoitzan.

Azkeneko ikuskizunak

Asko izan baitira, merezi dute begi kolpe bat. Hauetan martxoaren 5ean iragan den euskarazko antzerkia “Besteen kalea” bi aktorek, kaleko mundu nahasi batera eraman gaituzte. Aitortzekoa da, biziki ikusle guti hurbildu dela, holako euskarazko ekitaldiek harrera hobeagoa merezi lukete. Biharamunean aldiz larunbat arratsean, jendea ernatu da “The Six Toys” senpertar musikarien deskubritzera, atsegin handia zabaldu dute eta zer erran ondotik aritu den “Albosax” taldeari buruz. Sekulako ikustaldia eskaini dute, Mixel Ducau sortzaileak ezin hobeki kudeatu ditu 4 albokari eta 4 saxofoi joileak, zinez gozatzeko ikusgarria.

Besteak beste nola ez aipa, Herri-Urrats bertsu saioa, Larreko gelak aurkitu dituen bertsulari distiratsuek, goi-mailetan ibili dira. Bertsuzale xumeek, askotan zailtasun batzu baititugu ulermenaren aldetik, oraingoan gai anitzek umorea eta gogoeta asko pizten zutelakoan baita bertsulariak moldatzen baitira publikoen arabera, bertsuak errexago barneratu ditugu. Ororen buru, zortzi artista handi horien entzuteak, publikoa lorietan ezarri du.

Bertzalde, Gilles Parent arkeologoak mintzaldi biziki interesantea aurkeztu du Inharrian, aipagai zirela Baigorriko ibarrean, baita ipar Nafarroako mugetan deskubritzen ahal diren aspaldiko meategi eta metalurgiako fabrikak.

Adinekoen elkartea

Otsail hondarrean Hirugarren Adinekoen elkarteak krakada, sagarnoa eta matahamiekin antolatua zuten, Zaldubi gelan. Oraingoan, beti leku berean, lore osatze tailerra muntatzen dute (14:30-16:30), martxoaren 21ean. Ohartzekoa da udaberrian sartzen garela, garai ona da lili buketen egiteko, baita eskaintzeko maite dituguneri. Izen emaitea, deituz06-14-85-69-80.

Heriotze

Bastid-Irigoineko etxekoandre xaharra, Mayi Valencia sortzez Alzuaga pausatu da 101. urtean, 33 urte senar zenaren ondotik. Uhaidekobordatik Bastid-Irigoineko bidea hartu zuen ezkondu ondoan, anartean Ezpeletako Harcaut pastizeriatik Senpereko Pereuil etxean lan egin du garai batean eta bere hiru haurrez ederki okupatu. Emazte xumea, langilea eta fede handikoak bere irriñoaz bazterrak gozatzen zituen. Lekukotasun ederrak ukan ditu meza kartsu eta ongi kantatuan.

Azken berrietan, jakin dugu ere Maite Janmart sortzez Zamoraren heriotza, hau Haltziburuko alaba, familia ongi ezaguna, hiru semeren ama, Ghislain senar zenaren bidetik joan da.

Dolumin bizienak, astekari hunen izenean, penetan gelditzen diren familia eta adiskideeri.