Ikastolaren Ibilaldia apirilaren 23an

Zaldubi Ikastolak, udaberriko aroa baliatuz, antolatzen du usaiako ibilaldia igande goizarekin. Kirol zelaitik, betiko ibilbideak proposatuak dira, mendiko bizikletendako (30km edo 20km) abiatzea 8:00tan. Oinezkoendako aldiz, hasiera 8:30tan (8km edo 15km). Giro ezin hobean iragaiten da, belaunaldiak nahasiz, lehiaketa baztertuz, bakoitza bere erritmoan. Mementorik zaporetsuena gelditzen da eguerditako zintzur-bustitzea, baita axoarekin egin apairua, xapito pean. Gorputzaren nekeak merezi du gozamena, ez huts egin.

Ekitaldi ugari

Hamabost egunez, apirilaren 1etik 16ra, sekulako ekimenak proposatuak ziren "Kultur Topaketen Garaian" izenburuarekin, Herriko-Etxeak antolaturik. Ez ditugu denak zerrendatuko, kasik egunero ekitaldi berezia aurkeztua zelakoan, tailerrak, dantza, kantu, antzerki, margo eta argazki erakusketa eta abar. Bilduma laster batez, publikoaren parte hartzearen aldetik denetarik izan da, beti bezala ekitaldi jendetsuak alde batetik eta bertzetik gutixago. Joan den asteburua gailurraren idurikoa bilakatu da, ostiralean Arnaud Demanche umoristak gaitzeko ikustaldia proposatu du. Larunbat goizean, Country dantzariek ezin hobeki animatu dute Herriko-Etxeko plaza, ikusle anitz bildurik. Arratsean aldiz Larreko kulturgunea leporaino betea zen "So Egin" ikusgarria deskubritzeko, Zarena Zarelako taldeak aurkezturik, ikusleak harriturik gelditu dira, gutariko dantzari xumeek zer koreografiak azaldu dituzten, Lazkano ama-alabek zuzendurik. Hunen ondoko kontzertuak lorietan ezarri ditu parte hartzaile guziak, Andoni Oilokiegik sekulako errezitala eskaini du, bere boz miresgarriarekin. Igande goizean, mutxikoek hamabostaldi kulturala bururatu dute, Larrekoko atarian. Ororen buru, parada polita eskainia zen eta gehienetan urririk, xedea zelarik kulturari herritarrak hurbil daitezen, baita ere Larreko kulturgunea hobeki ezagutu dezaten.

Bildotsaren Eguna

Hitz batez oroitarazteko, maiatzaren 7an iragarria dela, bazkariko erreserbak larunbat goizetan apirilaren 29a arte, Merkatu plazan. Etxean egin koka edo bildots-pintxoen lehiaketa (8 pintxo) iraganen da (9:30-11:00), izen-emaiterik gabe.

Paella salgai

Eskubaloiko sekzioak antolatzen du paella salmenta, apirilaren 30ean (10:00-13:00), Larrekoko atarian, parte bakoitza 10€tan. "Tonton" senpertar sukaldari famatuak bere talendu guzia emaiten du apairu goxo hunen eskaintzeko, ez aspaldi frogaturik aukera polita duzue bazkaria prest-presta etxera eramaiteko, familian gozatzeko. Tokiko ekoizpenekin egina, hala nola Intermarché, l'Aile ou la Cuisse eta Otano arraintegikoekin, erreserbak hilaren 23ko, sms moduan: 06-71-60-09-48.