Hiribehere auzo batzorde biltzarra

Hiribehere Sokorrondo auzo batzordea joan den ortzegunean bildu da, Mailiarenean. Aipatua izan da Hiribehereko karrika nagusiaren antolaketa, heldu den udazkenean segituko dena, Guadalupia eta Haltiako malda azpirainoko zatia. Bainan Leihorrondo bide juntan egin beharra den biribilgunearen afera ez da aitzinatzen, tokiko lur jabe batek onartzen ez duelako lur zatitxo bat saltzea. Herriko Etxeak administratibo erabakiak hartuak ditu interes publikoaren izenean, bainan luze doa sail hortan gauzen trenkatzea.

Aipatu ere da Lota jauregiaren inguruko parkearen antolaketa. Dirudienez gaurko egoeran elbarrituek zailtasunak dituzte beren kadirekin parkean ibiltzeko. Batzordea saiatuko da hori gauzatzen aurrekontu partehartzaile proiektuetan. Ondoko aste horiek erranen.

Beste aipagaietan ere zen gazte kontseiluak martxoaren 26an, herri erdian eginen duen hondarkin biltze eta garbiketa. Hondarkin biltze hori segituko da ere apirilaren 1ean eginen denarekin, bereziki Errobi bazter hortan aurkitzen diren plastika hondarkinak biper landa horietarik jiten direnak. AAPPMA arrantzarien elkarteko ordezkaria kexu dabil ikusiz zonbait lur jaberen ezaxolakeria. Bururatzeko jakin da martxoaren 30ean ospatuko dela herri zentro guziaren abiaduran 30era pasatzea.

Mintzaldi

Ur Begiren bigarren mintzaldia arrakastatsua izan da, 70 bat entzulerekin. Jakes Ospitalek aipatu du beraz zer izan den iragan mende erditsutan Dakar aldean atun hartzera joaiten ziren euskal arrantzarien bizia. Galde asko ukan ditu, bainan gehiago ziren oraiko Donibaneko arrantzaren egoeraz zoritxarrez buruz behera joan dena, urtetan zehar industrial arrantzak denetan gaina harturik eta ez beti gizakiaren onetan. Bego hortan.

Hurrengo mintzaldia eginen da larunbat huntan (18:30), 17an, beti Latsa gelan. Gaia matriarkatua. Euskal Herriaren berezitasun bat izan zen jendartean emaztekiek izan duten protagonismo edo matriarkatua. Jendea biltzen zen etxeen inguruan eta auzokoekilako harremanekin, emaztek bazuten beren zeregina. Etxeak jendez eta familiez betez, bere ingurura bilduz etxekoandreak kudeatzen zituen, ez bakarrik etxeko biziaren harat hunatak, bainan ere zenduekin mantentzen ziren harremanak. Gertatzen zen ere etxeko segida ez zela gizonentzat bakarrik, bainan andregaiek ere bazutela etxeko giderrak hartzeko aukera. Gai hortaz mintzatuko da Anne Marie Lagarde anderea, liburu bat ere baitu hortaz egina. Mintzaldia frantsesez izanen da. Ongi etorri deneri.

Kantaldi-musikaldi

Karitatezko kantaldi musikaldia, heldu den igandean, 19an, Uztaritzeko elizan (17:00) antolatua da. Ekintzaren helburua da diru mailan Heraitzen bizi den familia baten laguntzea. Familia hunek badu 7 urteko mutikoa, Nolan izenarekin, eritasun baten ondotik elbarritu handi gelditua eta artatzeko gastu handiak dituena. Lehen partean entzunen da Lapurtarrak abesbatza, kantu herrikoi, eliza kantu edo besterekin. Bigarren partean ariko da ''Labourdins'' elkarteko soinulari taldea. Hunek konpositore desberdinen musikak emanen ditu: Michaël Jackson, John Lennon, Elvis Presley, Michel Berger eta abar... Kantu-musikaren inguruan jestu on bat eginez, arratsalde ona pasatzeko parada. Sartze sariak eta bestelako emaitzak osoki Nolanen familiari emanak izanen dira. Ongi etorri deneri.

Loto

San Frantses kolegioko burasoen elkarteak antolatzen du Loto handi bat, martxoaren 26an, igandez (15:00), Kiroleta aldeko Eskuz Esku gelan. Ekintza horren helburua da kolegioko ikasleen proiektuen eta bidaien diruztatzea. Asko sari dira irabazteko, heietarik ederrena 500 euroko bidaia bat (zoin tokira?), bainan ere sukaldaritzako hornidurak (plantxa, robota) eta beste asko sari oraino. Tokian jan-edariak izanen dira, gela berotua eta giro ezin hobea segurtatua. Ongi etorri deneri.