Euskal Herriko Etxe Ekoizleen elkartearen ohizko biltzar nagusia Domintxineko herriko gelan iragan da. Aitzineko urteko aktibitatearen bilana egin ondoan, etxe ekoizleak multzo ttipian bildu dira, garai hauetan kezkatzen dituzten gaiez gogoetatzeko. Lau atal nagusi agertu dira:

- Idortea, ur eskasia, ingurumenari lotu problematikak.

- Salmenta: aspaldiko partez batzuk beren ekoizpenak saltzeko arazoak dituzte.

- Inflazioa: saltzeko arazoez gain, ekoizteko karguak azkar emendatu dira (energia, kabalen bazka...).

- Lan karguak: antolatzeko zailtasunak eta ekoizpenak transformatzeko eta banatzeko.

Arrangurak agertu direla eta, aterabide bati erantzuteko, ideia zonbait atera dira, urtean zehar elkarteak aztertuko dituenak.

Elkartearen xedetan da neurri sanitarioen eta ekoizpenen transformazioan laguntza teknikoa ekartzea. Bestalde, salmentarako laguntza indibidualak edo(ta) kolektiboak eskaintzen ditu. IDOKI labela, kalitatea bermatzen duena, baloratzeko xedea du, araudiak ezagutaraziz eta etxaldeak lagunduz.

Laborarien zerbitzurako

2022an, 161 etxaldek 35.000 euroren erosketa bateratuak egin dituzte, proposamenak arrakasta du, galdeak gero eta handiagoak dira. Bestalde ekoiztuak diren gasnak eta esnearen analisiak egiteko antolaketa jarraitua segurtatu du. 2022ko kanpainarentzat hainbat etxaldeetako ekoizpenak analizatu dira (gasna eta esneki). Beste egitura batzuekin (ENIL) formazioak antolatu dira, gasna eta esnekien transformatzeko, baita haragi ekoizpenaren dibertsifikaziorako, nola transformatu, moztu eta atxiki.

Zirkuitu laburrak eta tokikoak

Xuhito, transformazio gune kolektibo berriaren proiektua aipatua izan da. Euskal Herriko Etxe Ekoizleen elkarteak, 2012an, laborari multzo bat lagundu zuen Anhauzen haragia transformatzeko gune kolektibo baten sortzeko. Urtean 45 tona haragi transformatuak dira. Anhauzeko gunea ttipiegia bilakatua denez, eraikuntza berri baten inguruko gogoeta abiatu da. Transformatzeko ateleriaz gain, laborari taldeak xingarrak idortzeko gune baten sortzea ere begi onez ikus lezake.

Salmenta laguntza

2021eko uztaila eta 2022ko martxo artean, elkarteak laborariek muntatu 15 salmenta gune kolektiboak ikertu ditu. Helburua da saltoki horien historia jakitea, nola antolatuak diren, ezagutzen dituzten problematikak ulertzeko. 120 etxalde dira engaiatuak partzuer gisa, 4 eta 13 laborari saltoki bakoitz. Orotara 28 langile enplegatuak dira, 24 denbora osoz. Egin ikerketak behar indibidualak eta kolektiboak argitan eman ditu, hala nola saltegiaren ibilmoldean lan ardatz desberdinen definitzea eta ongi partekatzea. Saltokien antolaketa optimizatzeko, langileen kudeaketarako eta kanpoko komunikaziorako formakuntzaren beharra agertu da.

Merkatuen garapen eta antolakuntza

Elkarteak Herriko Etxeak laguntzen ditu herriko merkatuetan etxe ekoizleak aitzinean emaiten. 2022an, Herriko Etxe guzieri merkatuen antolatzeko laguntza eta proposamenak igorri ditu. Horri esker, lan desberdinak abiatu dira Donapaleun ostiraleko eta larunbateko merkatuaren diagnostikoa, Hazparnen seinaletika, Urruñan larunbateko merkatuaren diagnostikoa eta Ziburun Idoki labeleko etxe ekoizleen gaueko merkatuaren garapena.

IPARLAB banatzea

Iparlaben helburua da kalitatezko etxe ekoizpenak profesionalen esku errexago uztea, logistika

bateratu bati esker, denbora berean laborarieri saltzeko iturri berriak ekarriz. Lehen banaketak 2022ko urrian hasi ziren, astean bi egunez. Jantegi kolektiboetan egiten dira banaketak (haurtzaindegi, jantegi, kolegio...). Iparlab plataforma "Manger Bio et Local 64" eta Akitania Berriko "Interbio" programetako kide da. Jaz proiektuan 30 etxalde engaiatu dira eta jantegi kolektiboek 141 manatze pasatu dituzte, urri eta abendu artean. Iparlaben sartzeko gero eta laborari gehiago interesatua agertzen da. 2023an beste urrats bat abiatuko da, Iparlab plataforma jatetxeeri saltzen hasiko dena.