ARRAKASTATSUA. Hala izan zen martxoaren 12an San Frantziskoko Gure Euskal Etxean antolatu NABO bertso saioa. Parte hartu zuten San Frantzisko bereko Johnny Curutchetek, Boisetik (Idaho) heldu Todor Azurtzak, eta Rock Springs-etik (Wyoming) heldu Martin Goicoecheak; laugarrena Euskal Herritik jinik, Xabier Euzkitze, Zarautzen bizi den azpeitiarra. NABOko lehendakari Philippe Acheritogarayk egin zuen aurkezpena, eta NABO aurten 50 urte ospatzen ari dela oroitarazi zuen. NABO sortzeko 1973ko Renoko bilkura hartako partaideetarik zen Pierre Etcharren, eta han berean zelarik zutitzeko galdegin zakon, esku-zartada eskaturik harendako urte guzi hauetako euskaldunen aldeko bere lanarendako. Txalokada ere, egun bertsolari erretiratua den Jesus Arriadarentzat. Eta oroitzapena, begietarik operatu berria zen Jesus Goñi Renoko bertsolariarendako. Domaia bertan ez egotea Aner Peritz, Euzkitzeren semea, bertsolaria hau ere, San Frantziskon egon behar zuena, Estatu Batuetan sartzeko arazo administratiboengatik ezin izan baitzuen bidaia egin. Jendeak ontsa pasatu zuen eta saio polita izan zen. Milesker San Frantziskoko BCC eta Basque Club eta BEOri ere; eta Todor Azurtzari, Boisetik online sortua duen Estatu Batuetako Bertso Eskolagatik eta oro har egiten ari den ahalegin handiagatik. Saioaren bideoa online ikusi nahi duenak hemen egiten ahal du: www.youtube.com/watch?v=DNeIhEt4xSk

MUS TAILERRAK. Ohartuak dira Diasporako zenbait herrialdetan, egungo formulak ez duela sobera iraunen, eta musaren geroa bermatzeko zerbait behar dela egin, leku askotan gelditzen ari baita bakarrik gizon xaharren jarduera. Geroa, emazteak eta bereziki gazteriak bere egiten badu segituko du. Estatu Batuetan ari dira ahalegin bat egiten, eta NABO entseatzen da ume eta gaztetxoetan sartzen, gazteen NABO txapelketa ere baduelarik. Bere Udalekun ere urteak dira irakasten dela. Hondarreko aste hauetan, Argentinan, musean ikasteko tailerrak ari dira egiten. Hala nola Mar del Platako Euskal Etxean, hiru saiorekin, azkena heldu den astelehenean. Tandilen ere, gauza bera, 11 emazte eta 3 gizon partaide. Eta Buenos Airesen, Euskaltzaleak-ek antolatu du, kasu huntan tailerra euskaraz izanen delarik.

TOLOSA eta SAN FRANTZISKO. Eta munduan frango gehiago badira ere aste huntan jokatuko diren mus txapelketak, bi ekarriko ditugu huna: ostegunean Okzitaniako Tolosan jokatuko dena, hiriko Denak Bat Euskal Etxea antolatzaile, Bazacle kiroldegian eta ondoren afari partekatua. Eta San Frantziskon BEOren (Basque Educational Organization) eskutik igandean gauzatuko dena, txapeldunak NABOko finalera joanik.