Osakidetzaren egoera larria eta desegitea salatzeko, milaka lagun atera dira kalera Bilbon eta Gasteizen. Gotzone Sagardui osasun sailburuaren dimisioa ere eskatu dute, "osasun sistema publikoaren hondatzearen erantzulea" delakoan. Sindikatu eta elkarte sozial anitzek babestu dituzte mobilizazioak, horietan Euskadiko Pentsiodunen Mugimenduak. Antolatzaileek agiria irakurri dute, salatuz Arta Guneen hestea, osasun zentroen artatze ordutegien murrizketak, larrialdi zerbitzuak gainezka daudela, telefonoz hitzordua lotzeko goaitatzeak besteak beste. Osakidetzaren beste hainbat arazo aipatu dituzte, hala nola, espezialistarekin hitzordua lortzeko ala ebakuntzetarako igurikatze-zerrendak eta lehen arretako osasun langileak ordezkatu ez izana. Plataformaren bozeramailearen hitzetan: "Osakidetzaren murrizketa eta desegite progresiboaren helburua da osasun publikoa argaltzea pribatuaren interesetan, klinika, mutua, aseguru-etxe eta aholkulari pribatuen intereserako".

Joseba Arregi 77 urteko ETAko buruzagi ohia Martuteneko presondegian sartu dute, prokuradoreak Eusko Jaurlaritzak bigarrenez emandako hirugarren gradua ez onartu ondoan. Etxeratek agiri baten bidez azaldu duenez, duela hilabete beste bi preso, Xabier Atristain eta Juan Manuel Inziarte, kartzelara itzuli ziren prokuradoreak helegitea jarri eta, Auzitegi Gorenaren doktrina berria betez. Doktrina horren arabera, behin helegitea aztertzea onartuta, hirugarren gradua ezabatua gelditzen da. Elkartea haserre agertu da Arregi espetxeratu dutelako, "77 urteko pertsona baten eskubideak behin eta berriz urratzen dituelako, 31 urte espetxean egon ondoren". Elkarteak zioen Arregik adinaren ondorioz anitz patologiak dituela, zigorraren hiru laurdenak 2019ko ekainean bete zituela, Frantzian preso egon 10 urteak kontatu gabe.

Hego Euskal Herrian euri-neurria balio normalen azpitik da, baina Euskadiko lurralde bakar batek ere ez du ur-eskasia pairatzen, bertako urtegiek batez beste %76 baitute beteta. Nafarroako datuei dagokienez, Irati, Arga eta Ega ibaien neurriak kasik alerta egoeran daude eta Ebroko urek berriz eskasia dute lurraldearen hegoaldean. Azken hilabeteetako euri faltaren ondorioz, inguru horretan alerta egoera aktibatuta da. Urtegien betetze kopurua: Urrunaga %75, Itoitz %68, Eugi %90, Irabia %79 eta Esa %60.

Lau eguneko lan astea Jaurlaritzak entseatu nahi du, Espainiar gobernuak asmoa duen bidetik. Bainan Hegoaldean, saioa egiten duten enpresek ez dute diru laguntzarik ukanen, aldiz Espainian bai. Jaurlaritzak sustatu entseguak nahi du xehe-xehea probatu horrelako antolamenduak zer nolako ondorioak ukan ditzakeen. Hots lau eguneko lan asteak, lan orduak emendatu gabe eta soldatarik murriztu gabe errentamendua eta kontziliazioa hobetuko ote duen. Enpresa buruak ez dira batere ados, ezin dela aplikatu industriako enpresetan argumentatuz.

Heldu den maiatzaren 6a egun handia izanen da, Osasuna futbol taldearentzat eta Nafarroako zaleentzat: Sevillan, La Cartuja zelaian Madrilgo Errealaren kontra finala jokatuko du. Nafarroatik 20.000 zalek beren taldea sostengatzeko bidaia eginen dute. Arduradunak beldur daude kalapitak izanen direla, bata ala bestearen zaleen artean. Osasunak bere historiako bigarren finala jokatuko du, 2005ean Betisen kontra finala galdu zuen.

Legea bidean - Espainiako presidente Pedro Sanchezek iragarri du 43.000 etxebizitza arrazoizko prezioan alokatzeko dirulaguntzak emanen dituela. Bestalde eman du jakitera, halaber, 50.000 etxebizitza ezarriko dituela alokairuan. Diputatuen Kongresuan egin agerraldian, Sanchezek zehaztu du 4.000 milioi euroko diru laguntza berri bat irekiko duela, Europako funtsen kontura, etxebizitza berri horiek finantzatzeko. Etxebizitzek bi baldintza bete beharko dituzte: eraginkortasun energetiko ona izatea eta arrazoizko prezioan edo gutienez 50 urterako alokatzea. EAJ abstenitu egin da, legea bozkatzean bere eskumena ez duelako errespetatzen, EH Bilduk aldiz alde bozkatu du. EAJk eta Iñigo Urkullu lehendakariak "urratutako eskuduntzak" aipatu izana kritikatu du. Eneko Andueza PSE-EEko idazkari nagusiak, "Zer ez zaio EAJri gustatzen? Arrazoizko prezioan gure gazteek etxebizitza bat lortu eta...

EH Bilduren lege egitasmoa babestu dute EAJk, PSE-EEk eta Elkarrekin Podemos-IUk. Horren arabera, alde egiten dute enpresek hamar urtetan eskuratu diru laguntza guziak itzuli beharko lituzkete. EH Bilduren lege egitasmoaren arabera, ekoizpen kostuak murrizteko edo(ta) zerga gutiago ordaintzeko beste lurralde batera joatea erabakitzen duten enpresek, azken hamar urteetan eskuratu dituzten laguntza publiko guziak itzultzeko obligazioa izanen lukete. Gainera, enpresa horiek eta beren bazkideek hamar urtez ezingo lukete EAEko administrazioen dirurik eskuratu. Iker Casanova EH Bilduko ordezkariak gogorarazi du 2007tik Bizkaiak antzeko araua duela, baita 2020tik Nafarroak ere.

2.000 bat pertsonak Iruñan manifestatu dute, Magnesitas Navarra enpresak Erdizko mendian duten harrobi proiektua gelditzeko. Erdizko mendi mazelak, baleako eremu hoberenak direla diote zaldi, ardi eta behien udako alhagientzat eta proiektuak kalteak eginen dizkiola Baztango ekonomiari.

Erkidegoko lan merkatuaren 2023ko lehen hiruhilekoko datuen arabera, aurreko hiruhilekoan baino 2.100 landun gutiago eta 2.300 langabe gehiago daude, Eustatek zabaldu dituen datuek erakutsi dutenez. Hiruhileko honetan 92.100 langabe eta 960.800 landun zenbatu dituzte, 2022ko laugarren hiruhilekoan baino %0,2 gutiago. Azken urtean, 5.600 landun gehiago izan dira eta 3.800 langabe gutiago.