Joan gira Euskal Herrian gutitan aipatzen den ofiziale baten ezagutza egitera. Christian Louis usain egile maisua da (maître parfumeur), Bastidan kokatua du ekoizteko laborategia eta Ezpeletan “Usain ona” deitu saltegian plantatua da.

Usainon ofizioa

Christian Louis usainon egile maisua da, Grasse hirian kokatua den Galimard perfuma etxean ikasketak egin ditu, 1996ko ekainean sortzaile-egile bezala lanean hasi zen. Bastidan du fabrikatzeko laboratorioa, Patricia bere bizilaguna farmazia saileko doktorea izanez, bien artean kudeatzen dute perfumeen ekoiztea.

Erraiten zaukun munduan zehar usain-egile maisu guti direla, bakarrik hamar baino gutiago litzateke. Umorez edo trufa moduan eskola zaharrekoa dela zioen, ziriarekin (mouillette) ari dena, ez eta ordenagailuarekin. Usainon egile maisua Jainkoan sinesten duena dela gehitzen zuen, arimaren isla ala itxura ukan behar duena. Usain onen asmatzeko espiritualtasuna eta bibrazioak beharrezkoak dira. Kondatzen zuen, XIII. mendean Florentzia hirian (Italia) fraileak etorri zirenean, Santa Maria Novella basilika eraiki zutelarik, sendabelarrak landatzen hasi zirela. Artxiboek erakusten dute 1381ean, Santa Maria Novellako dominikar fraidek jada arrosa ura saltzen zutela, epidemia garaietan antiseptiko gisa.

Fabrikatzeko metodoa

Usain ona egiteko prozedura nola egiten den galdegin diogularik, senditzen zen azalpenak emaiteko zailtasunak zituela, bakoitzak bere segeretuak ukanez. Halere esplikatu dauku entsegu anitz egin behar direla nahi den perfuma lortu arte, produktuaren oinarria esentzia olioa da (huile essentielle). Usain ona atera aitzin 3 eta 5 aste arteko mazerazioa behar du.

Lore-usainak, zurezkoak, ekialdekoak... esentzia natural desberdinak usainon ofizialeek nahasten dituzte, beren inspirazioaren araberakoak. Usaimenaz jabetzen dira, senditzen dutena perfuma moduan ekoizteko. Fabrikatzeko eta saltzeko arau zorrotzak dira, botila bakoitzean barnen diren produktuen azalpenak agertu behar dira. Esentziak eta olioak tradizio esoterikoen arabera, faraoien apezen garaikoa litzatekela zioen, alkimia bat, itxuraldaketan eta espiritualtasunan osatua.

Usain ona ez da produktua baina pertsona

Usain ona ez dela produktu bat zioen, baina pertsona bat. “Parean dudanaren begiradak zein motakoa behar duen berehala ohartzen naiz. Ene bihotzarekin begiratzen dut”. Psikologia, fisiologia eta biologia esperimentalaren alorreko estimulua izaki bizidun baten bidez detekta daitekeen erreakzio zehatza senditzen du. Ezin dela perfuma egilea izan ez bada sinesten gehitzen zuen. Usainen memorioa ukaiteak bozkarioa sortzen duela zioen. Usain on batek behar du izan freskoa, loretsua, bipertsua eta azukretsua. Azalpenak emaiten zituelarik, iduritzen zitzaigun sukaldari batekin hitz egiten ginuela.

Ekoiztua den usain ona berinazko untzietan delarik 9 urte irauten du, aluminio gisakoetan gehiago. Perfuma bat nola ezarri behar den esplikatu dauku, ez dela ohidura den bezala lepoan ezarri behar, baina buru gibelean.

Usain onaren merkatua

Sektore horretan merkatua %50ez lehertzen ari dela zioen. Prezioak nahitara ez ditu emendatzen, gehiengo handi batek erabiltzeko gisan, norberaren duintasunerako izanez, jantzi espirituala dela gehitzen zuela.

Pertsona arraro baten ezagutza egin dugu, bezeroak sartu orduko heieri buruz abian da, berehala bakoitzak behar luken usaina aholkatzen die. Saltegian sartu direnen begirada harrituak ez du beldurtzen, ziri ttipi batean perfuma sendiarazten du, sorgina balitz bezala parean duen pertsonaren nortasuna azaltzen duela. Pertsonaiaren ezagutzeko baizik ez bada, itzuli baten egitea balio du!