Maiatzaren 6an Euskaltzaleen Topagunearen biltzar nagusia eta Bidasoako Euskara eta Kulturaren azoka, Bera herrian antolatua izan da. Holakoetan ohartzen da hizkuntzaren biziarazteko, eskuin eta ezker borondatezko lan emankorrak antolatzen direla. Hala nola, eragile desberdinekin euskararen aniztasuna lantzen duen Euskaltzaleen Topagunea, zazpi eskualdeko euskaldunen artean zubi bat eraikiz. 25 urte betetzen ditu aurten eta lehendakaria den Kike Amonariz-ek harrera ezin beroa egin du. Proiektu estrategiko hunen helburu nagusia da euskaraz ari diren elkarteak elkar ezagut dezaten, lokarria indartuz eta puntu amankomuna den euskara lehentasunetan ezarriz, egitura desberdinak saretuz.

Ipar Euskal Herriari begira, elkarte batzuk barne dira, besteak-beste Larresoroko Ote Lore, Baiona-Angelu-BiarritzekoMintzalasai, Plazara kooperatiba eta OrtzaizekoKirola Euskara Ahoan (KEA).

Beran egin den azokak euskararen sustapenean lanean ari direnentzat inspirazio iturri eta ekintzarako pizgarri izan nahi duela agertu da. Hainbat proiektu ezagutu ahal izan dira, guziek helburu berdinarekin, euskara lehentasunetan ezarri nahian. Euskaltzaleen Topagunek hautatu du Beran biltzea, herri huntan euskarak estatus ofiziala du, herritarren %70ak euskara dakiela.

Pantxika Maitia aurkezle, azokako ateak ideki ditu eta Julen Zelaieta herritar bertsulariak ongietorria bertsuz egin du:

Liburuentzat dugu Durango porruentzat Ordizia

Euskalgintzaren azoka dugu hemen Beran hasia

Hamasei talde ta ekimenek eman dute jauzia

Bakoitzak bere grazia

Badugu zer ezagutu eta nondik ikasia.

Gure hizkuntza bizi berritu nahi genukelako

Gaur bildu gara esperientzia elkarrekin banatzeko

Lehen azoka da aurtengoa, denentzat ezin bertzeko

Herri pila bat aukeran baina nun hemen baino hobeto

Bideak berant hasi behar dira gero gorantz joaiteko.

Proiektu desberdinak presentatuak izan dira, horietan Ipar Euskal Herriko bi egitasmo aurkeztuak izan dira.

Plazara kooperatiba - 2022ko abenduaren 3an sortu dinamika berria da. Talde lanetik eta berrikuntzatik, euskara erdiguneratzeko tresna integrala izan nahi du. Ipar Euskal Herria eremutzat harturik, plazetan, euskara ikusgarriagoa, erabiliagoa eta entzunagoa izaitea du helburu. Mintzatzen direnekin oinarritua, behar berrieri erantzun egokiak ekartzeko helburua du. Lankidetzatik abiatuz, hiztun komunitateen arteko elkarlana eta elkar inspirazioa sustatu nahi du. Bere lana lau lan ardatzen inguruan oinarritua da: komunikazioa, aholkularitza, formakuntza eta plazagintza.

Aipatua ere izan da Herrian aipatu ginuen KEA elkartea (Kirola Euskara Ahoan), Ortzaizen plantatua. Hiru helbururekin lan egiten du: 6-11 urteko haurrentzat, kirola euskaraz praktikatzea, mistoa izaitea, neska eta mutikoen arteko harremanak leunduz, plazerra lehenetsiz, konpetizioaren izpiritua kenduz.

Beharreri xumetasunez erantzun berriak eta konkretuak ekartzeko sortu dira iniziatiba guzi horiek. Amets handiak dituzten lan talde ttipiak dira, bainan ilusiotik, sorkuntzatik eta auzolanetik erronka handieri heltzeko prest direla adierazia dute. Azokan bildu diren egitasmoak, errealitate, hutsune edo(ta) behar zehatzeri gogoetatzeko parada izan dira.