Herriko Bestak

Urtero, Jondoni Petriren omenez, herriak antolatzen ditu uda sarreran bere besta xarmantak. Beti bezala, gazteen komiteak bere indar guziak ezartzen ditu, denen gostuko programaren antolatzen. Ostiralean, ekainaren 30ean (12:00) adinekoen bazkaria Aroberri ostatuan, (14:00) eskolen lasterketak kirol-zelaian, (20:00) zintzur-bustitzea pilota plazan, (21:30) zikiroa pilota plazan Baga-Bigak animatua, etxeratzea taxiz urririk. Uztailaren 1ean, larunbata, (9:00) ball-trap ehiztarien ttattolan, (12:00) gakoen emaitea komiteari, (14:30) Beer Pong lehiaketa, (16:00) pilotari gazteen finalak pilota plazan, (17:00) futboleko finalak kirol zelaian, (20:00) Oxtika txaranga, (23:00) Duplaren kontzertua, (00:30) dantzaldia Katxirekin. Uztailaren 2an, igandean, (10:30) meza nagusia bateria-txarangak animatua, (12:00) aperifa Herriko-Etxeak eskainia, (13:30) herritarren bazkaria (paella), (18:00) Ahate jokoa, (19:00) kantaldia Indigo taldearekin, (20:00) Elektrokelaren txaranga, (23:00) dantzaldia Koloka taldearekin. Uztailaren 3an, astelehenean (16:00) komitearen desfilea "Erdi-Aroa" lemapean, (19:00) dantza Piko, Patxi ta Konpainiak animatua, (21:00) Ixtaklok txaranga, (23:00) DJ Mathieu. Uztailaren 4an, herriko ostalerek antolaturik"Casetas" moduan, komertsanten eguna, pilota plazan. Besta alai eta zoriontsuak iragan ditela!

Frantziako "Tourra"

Hobeki erraiteko Frantziako Itzuliko txirrindulariek zeharkatuko dute gure herria, uztailaren 3an, Azkaindik etorriko dira (RD 918), Xistera biribil gunetik Urgurin gaindi Olako bidegurutzera, handik Zuraide alde joanen dira, segurki ziztu bizian. Txirrindulari baita publizitate karabana xelebrearen pasatzeak sortuko dituzte asaldura asko, horretarako bide nagusi horiek osorik edo partzialki hetsiak izanen dira (13:00-18:00). Ororen buru, herriko eskola guziak hetsiak izanen dira egun osoan, hala nola haurrek ere parte hartzen ahalko duten herriko, baita bizikletaren besta handi horretan.

Denetarik

Maitetxoak haurtzaindegiak jakinarazten du, buruileko sartzeari buruz zonbait leku libro gelditzen direla. Elkarte hunek hartzen ditu bere gunean 3 hilabete eta 3 urte artean diren haurrak. Xehetasun gehiagorentzat deitu zuzendaria den Pauline Otheguy: 05-59-54-11-95.

"Amicial" egiturak, etxetarako laguntza zerbitzua segurtatzen du, naiz agentzia Donibanen kokatua den, astearte goiz guziz (9:00-12:00) permanentzia zabaldua da Postaren gaineko gelan. Hitzordua hartzeko menturan deitu 05-33-09-61-90.

Pilotari so

Berri on batzu ukan ditugu nesken aldetik bereziki. Ekainaren 16an, Baigorriko trinketean palantxan, Frantziako txapelketako finalean, lehen mailan, gure bikote aipagarria Oronoz Ania/Goyenetche Marie nagusitu dira Zaharrer Segiko Aguerre Joana/Hirigaray Marttaren kontra, 40/36. Kimuak kategorian, nazional B mailan, hemen ere sorpresa ona, Nerea Sedes-Uhalde eta Nahia Bidegain-Delpuech garaile izan dira hendaiarren kontra, 40/11. Emaitza horiek estimagarriak dira geroari buruz eta poz handia sortzen dute hezitzaileen artean, hauen isileko lana ez baita aski nabaritua. Azkenik, esku-huska pilota plazan, gure parea Amaiur Jaureguy eta Peio Azkona lehen mailako final handira ailegatu da, horretarako Lau-Herriko bikotea garaitu du 30/13. Kanbon iraganen da finala, Amikuzeko Mendiburu/Thicoipe ekipoaren kontra, uztailaren 9an, Senpereko jarraitzaile guziak gomitatuak gira gure laguntzaren ekartzera.