Labourdins elkarteak 110 urte

Ospakizunak hasi dira joan den ortzegunean meza nagusiarekin, Jondoni Bixintxo elizan, Jean Mixel Barnetche erretoreak bere mintzaldian sustengatzen zuela elkartea beti ebanjelioaren bidetik segitzera. Meza ondoan jendea bildu da Bilgunera sariztatze batzuen egiteko. Elkartean denak bolondresak izanez, askok lan anitz eta zerbitzu egiten dute edozoin alorretan: musika, zangobaloi, kantu, administratibo lanetan eta antolaketetan, ez dira ahantziak izan. Beren presentziaz ohoratuz Vincent Bru deputatua, Jean Mixel Barnetche erretorea eta Christian Ibarboure kultur axuanta izan dira sarien banatzaile, Patrick Sistiagueren erranetara. Esker onez sariztatuak izan dira: brontzezko medailarekin Alain Arza, Miren Etchenique eta Maritxu Suhas, zilarrezko medailarekin: Jean Claude Ospital, Pantxika Ospital, Paul Ledoux eta Laurent Lascube, zilar urreztatu medailarekin: Christian Duboué, Céline Cauhapé, Lora Sistiague, Annie Petit, Mirentxu Baptista eta azkenik Fede Ugarritza dozena bat urte hauetan elkarteburu egon dena. Eskua pasatzen du aurten eta jakin da Jean Brouchican jauna izanen dela lehendakari, ondoko egun horietan bere karguan sartuko dena. Goresmenak guzieri. Zintzur bustitze eta 130 lagun bildu dituen bazkari on batekin segitu da besta. DJ bat animatzaile, kantu, musika eta dantzak airoski eman dira, giro ezinago hobean. Miragile bat ere ibili da bazkaltiarren jostagarri, bere itzuliek miretsirik atxikitzen zituela.

Ortziralean (Kantiruki eta Koloreak), larunbatean (Gospel kantariak) izan diren kontzertuek ere entzulego ederra bildu dute. Orokorki elkartearen 110 urteak osoki kausituak izan dira. Hitzordua hartua da beste 10 urteren buruan.

Euskara eskolan

Herriko Etxearen eta Idekia eskola publikoko erakasle eta burasoen arteko hitzarmen baten ondotik jakiten da eskola hortan idekiko dela heldu den sartzean ama eskola osoki euskaraz eginen dena. Ikastetxe horrek ez zuen orain arte sail elebidunik. Agian hasi eta iraunen duelakoan.

Ekainaren 3a

Egun hori Uztaritzen berezia izanen da, asko jarduera edo ekitaldi proposatuak baitira:

- Eskuz Esku elkarteak antolatua du ateraldi bat Biarnoko Saliesera bisita batzuekin eta bazkari batekin, egun osorako.

- Ikastolan antolatua da ''Bric à Brac'' salmenta Integrazio Batzordearen alde, egun osoan.

- Labourdins elkarteak antolatzen du Simon Telleria zena gogoan, zangobaloi lehiaketa Etxepareko bi zelaietan, goizetik hasirik. Mutikoetan 11 urteko 24 talde ariko dira eta 13 urteko 16 talde, nesketan aldiz 13 urteko 8 talde. Lehiaketa horrek biharamunean ere segituko du.

- Latsa eta Altzabea bi elkarteek bat bestearen ondotik eginen dute beren biltzar nagusia (10:00-12:00), Latsan krakada batekin segituko dena.

- Suhiltzaileek beren urteko eguna dute kaserna edo beren egoitzan. Arratsalde osoan ate idekiak, tresneriak eta sokorritzaile moldeak erakusten ariko dira publikoari, ondotik (18:00) kantaldia Josteta gizon abesbatzarekin, (21:00) kontzertua Andoni Oilokiegirekin eta (23:00) dantzaldia ''Seb Podium la Castagne'' DJ-arekin

- Kapito-Harrik ere baditu egun hortan bi pilota partida atxiki ttipian, Bilgunen.

- San Mixel auzoan tokiko lagunarte elkarteak antolatua du besta elgarretaratzea (18:30), petanka lehiaketa baten finalarekin hasiko dena eta segituko zintzur bustitze krakada batekin.

- Zortziko elkarteak antolatzen du antzerki bat Arruntzan, Erdiko Etxean (20:30). Eskainia izanen da jada gibelatua izana zen ''Sexberdinak'' ikusgarria bi jokolarirekin.

Jarduera horien berri argiago datorren astean. Agian, irakurle maite, aurkituko duzu zerbait ausagailu egun hortan. Uztaritzen jendeak badaki higitzen eta hobe hola.