Gaitzeko izar ederra laster agertzekoa da Ziburun. Herriko Etxea eta besta komitea sustatzaile besteak beste. Bixintxo bestak gogoan. Bainan besta horiek urrun dira oraino, heldu den urtarrilean alabainan. Salbu hara, besta horien lehen egunari nahi diote hats berri bat eman. Aise jende gehiago biltzeko gisan eskoletako haur guziekin hautetsien inguruan, herriko elkarte guziak partzuer nihundik ahalaz.Denak bil litazke txotxongilo handi bat denen aitzinean. Nolako itxura lukeen txotxongilo arraro horrek, hortaz bilkura bat egin da joan den egunean, hilabete bat lehenago ja iraganaren ildo beretik. Talde bat egon da solas eta solas. Gomitaturik Baionako Kilika elkartea, biziki trebe dena txotxongilo handiak behar direlarik muntatu, ja asko tokitan ederki frogatua duen bezala. Hala nola joan den egunean Donibaneko bestetan. Iduriz delako txotxongiloa itsas izar baten eiteko zerbait izaiten ahal litake. Hortakotz gira hain xuxen izar batez mintzo. Gogoan zernahi gisaz herriaren nortasuna eta ondarea, arrantza eta arrantzaleak bereziki. Gero, izen bat ere beharko zaio eman, jendeak gogoan aise hartuko duen izen bat.