Mugarik Gabeko Alkartasun Eguna

Eusko Alkartasuna alderdiak antolaturik, hilaren 17an, igandearekin, Mugarik Gabeko Alkartasun Eguna izanen da herriko pilota-plazan. Ekitaldi politikoa (12:00), Kuxkuxtu txarangaren animazioa (13:00), Harrerak prestatu herri bazkaria (14:00), eta horren ondotik (16:00), Niko Etxarten eta Anje Duhalderen kontzertua. Urririk izanen da, beraz zer entzun eta zertaz goza.

Adixkideak elkartasun laikoaren ekitaldiak

Adixkideak elkarteak, urtero bezala, ekitaldi frango antolatu ditu helduentzat zein gazte eta haurrentzat.

Helduendako ekitaldiak - aquagym, lili artea, euskara, joskintza, dantza modernoa, espainiera, soinketa, informatika, karatea, keinu-hizkuntza, mutxikoak, musika, argazkigintza, mosaikoa, margolaritza, zeramika, ibilaldiak, sofrologia, antzerkigintza, yoga eta abar. Prezioa: 25 euro. Haur eta gazteendako ekitaldiak - dantza, judoa, karatea, argazkilaritza, marrazketa-margolaritza, eta musika bateria, gitarra, sofeo, pandero, piano, trikitixa eta biolontxeloaren alorretan. Prezioa:10 euro. Izen-emaiteak: 05-59-54-62-08eta 06-85-20-60-36

Proiektu aurkezpena Herriko Etxean

Buruilaren 1etik urriaren 31ra, zabalik izanen da herriko elkarte edo kolektiboek ekintzak eta ekitaldiak aurkezteko epea. Honako gaiekin lotu proiektuak aurkezten ahal dira: mobilizazio orokorrak, antolaketa iraunkorra, berrikuntza ekonomiko, sozial eta solidarioa, herriko kultur eta kirol ekintzak, elikadura subiranotasuna, leku aipagarrien zaintzea eta baloratzea, klima aldaketa eta trantsizio energetikoa, ostatu sarbideak, gazteen banaketa, adinekoendako laguntza, auzoen bizi esparrua eta lasaitasuna, euskararen komunikazioaren hobekuntza, demokrazia parte-hartzailea… Urriaren 31 aitzin, inprimakia (PDF-255k) eta abar bete behar duzu eta emailez igorri, helbide honetara: budgetparticiatif@mairie-urrugne.es edo Herriko Etxean utzi.

Urruña kantari Euskal Telebistan

Hilaren 7an, ostegunarekin (22:30), Euskal Telebistaren lehen katean, “SOS Kantu Galduak” izeneko saioan, Baxurko izeneko bertsulariaren “Urruña maitea” kantuaren inguruko emanaldi ederra egin zuten. Hor azaldu ziren hainbat urruñar kontu-kontari eta kanta-kantari. Aupa Urruña eta aupa Euskal Telebista!

Jolas eta jokoak pilota-plazan

Hilaren 16an, larunbatarekin (14:00), Joko Zoko elkarteak antolaturik, haur eta gazte jolas eta jokoak izanen dira herriko pilota-plazan: gizarte jokoak adin guztietarako, jolas eta joko lehiaketak… Ber denboran, hainbat joko ere salgai izanen dira.

Bidasoako merkatu ttipia

Irailaren 10ean, igandearekin, Bidasoako Merkatu Ttipia izan zen Pausu auzoan. Urruñako Organoak elkarteak antolatu bigarren eskuko merkatu honetan denetarik eta aukerako prezioetan izan genuen: arropa, oinetakoak, etxeko tresneria, jostailuak, CDak, DVDak, liburuak, altzariak…Horretaz gain txosnak, taloak eta giro aparta izan zen.

Langile bat herrian hilik

Hilaren 6an, asteazkenarekin, eraikuntza lanetan ari zen 50 urteko gizona irauli zitzaion hondeamakinaren azpian gelditu zen. Lankideek azpitik atera zuten, baina jadanik hilik zen. Goian bego.

Abentura gure mendietan

Buruilaren 17an, igandearekin, eginen da aurtengo “Elgarrekin mendian” izeneko ekitaldia. 5 kilometroko ibilbide ederra Xoldokogainetik barna. Ibilbidea egiteko hiru oren beharko dira. Abiapuntua Ibardingo Elizalde bentaren aparkalekuan izanen da. 10:00 eta 14:00 artean, hamar minuturo, talde ateraldiak izanen dira. Egun guziz, taloak eta edariak salgai. Izen emaiteak: 05-59-85-94-26 telefonora deituz.

Gurrutxaga pilota txapelketaren finala

Buruilaren 4an, astelehenarekin, Urruñako besten kari egiten den Gurrutxaga txapelketaren finalerdian honako emaitzak izan ziren: Bideondo/Ducassou 40 – Darmentrail/Iphar 19 eta Ospital/Etxegoin 40 – Larralde/Saint-Paul 23. Buruilaren 6an, asteazkenarekin, finala jokatu zuten honako emaitza erdietsiz: Bixente Bideondo/Battitt Ducassou 40 – Mathieu Ospital/Iñaki Etxegoin 28.