Inbestidura saioan EAJk Sanchezen aldeko botoa emanen du lehen ministro kargura bideratzeko. Andoni Ortuzar EAJren EBBko presidenteak laburbildu du: "Akordio ona da Euskadirentzat, oraingo autogobernua betetzeko bidean urrats garbia eman delako eta etorkizunean autogobernua negoziatzeko oinarriak ezarri direlako, hori guzia bi urteko epean. Oso akordio zabala da, engaiamendu zehatzak dituenak hainbat gairen inguruan: Euskadiri dagozkion eskumenen transferentzia, autogobernua, lan harremanak edo fiskalitatea”. EAJk alde bozkatuko du Sanchezen inbestiduran, eta legealdiari egonkortasuna emanen dio, betiere adostutako engaiamenduak bete eta aurrerapausoak ematen badira. Akordioak Gernikako Estatutuan eskuratu transferentzia guziak, Sozial Segurantzarena barne, Euskadiri eskualdatzea bermatuko du, etorkizuneko EAEren autogobernua negoziatzeko oinarriak jarriz. Zehaztu dutenez bi urteko epea izanen da.

Amnistiaren aipatzeak berak kontrakoen artean haserre gorria piztu du, Espainia batua eta bakarraren aldekoak, erradikal ala eskuin muturrekoen baitan, su emailetan, Aznar jauna bera, PP ala Vox eskuin erradikala. Egun guziz ultra horiek sozialisten egoitzaren aitzinean biltzen dira, bortizki eta zalapartaka amnistiaren salatzeko. Kontrakoetan apezpiku zenbait ere, horietan Munilla, donostiarrek ongi ezagutzen dutena. Egoera berotzen ari da, ez Madril aldean bakarrik, hiriburu askotan, horietan Bilbon ala Iruñean.

Espainiako Gobernuko Atzerri ministroak eta Israelgo iturri diplomatikoek baieztatu dute Ivan llarramendi eta haren emaztea Loren Garcovich urriaren 7ko erasoan Hamasek ez zituela bahitu eta hil zituela. Bien gorpuak Kissufim kibbutzean, Gazako Zerrendako mugatik oso hurbil aurkitu zituzten, bi heriotzak ezin ukan dituzte baieztatu, DNA frogak egin arte, gorputzak erreak baitziren. Ivan Illarramendiren familiak azaldu duenez, lehen egunean hil eta erre egin zituztela, horregatik gorpuak identifikatzeko behar ukan dute hainbat denbora. Emaztearekin batera bizi zen Illarramendi Kissufim kibbutzean, Hamasek iragan urriaren 7an lurretik, itsasotik eta airetik egin erasoaldiak inguru hori suntsitu zuen.

Tortura aipatzen delarik Loiolako polizia-etxea arras ezaguna da, bainan bere egoera eta betebeharra erabat aldatuko da. Ministroen Kontseiluak argi berdea eman dio, Loiolako kuartelen lurrak eskualdatzeari. Donostiako Udalak hartu du eremu horien jabetza, bertan etxebizitza berriak eraikiko ditu. Gobernuak eskualdatzea ahalbidetzen duen akordioa onartu du. Isabel Rodriguez Espainiako Gobernuaren bozeramaileak prentsaurrekoan adierazi duenez, "Donostiaren aldarrikapen historiko bati erantzuten dio itunak", azaldu du behin eskualdaketa onartu eta, Udalak "lurzoru horiengatik ordaindu beharrekoa" Gobernuari emanen diola. Eneko Goia Donostiako alkatea pozik agertu da akordioa onartu dutelako eta horri buruz erran du "eremu berri horren bidez amesteko unea da".

Espainiar estatuan kokatzen diren 100 aberatsenen artean, Forbes-en arabera, 6 euskaldun badira edo Euskadin bizi direnak. Lehena Daniel Maté gipuzkoarra, Glencore multinazionalaren arduraduna. Atzetik 48. postuan Juan Luis Arregi da, paperaren sektoreko Enceko presidente eta akziodun nagusia, 780 milioirekin. Gisa berean, zerrendako hirugarren euskalduna 58. tokian, Jose Ignacio Comenge 655 milioirekin, Coca-Cola Europacific Partners enpresaren jabeetako bat da. 69. lekuan Carmen Ybarra inbertitzaileak jarraitzen du 570 milioirekin, Onchena holdingaren %89ren jabea da.

Volkswagen Alemaniako automobilgintzako multinazionalak Landabenen prentsa berri batentzat 52,5 milioi euro inbertituko du, Iruñeko lantegiak bi modelo elektriko ekoiztuko dituela baieztatu du. Iragarpena Nafarroako Volkswagenen administrazio kontseiluak egin du, Christian Vollmer Landabengo lantegiko administrazio kontseiluko presidentea buru zela. Ohar batean, konpainiak adierazi du inbertsio berri horrekin "elektrifikaziorako bidean beste urrats sendo bat" emanen duela, "2026tik aurrera auto hornikuntza bermatzen duena eta, beraz plantaren industria-proiektua sendotzen duena".

Sener euskal taldeak merkatu aeroespazialari eskainitako lantegiaren lehen harria Urkullu lehendakariak Zamudion jarri du. Euskadin garatu eta erabat eratutako lehen satelitea datorren urte erdialdean Kaliforniatik espaziora igorriko dute, Lurra behatzeko eta argazkiak ateratzeko helburuarekin. Hasierako inbertsioa 25 milioi eurokoa izanen da, aurreikusitakoaren arabera, 2025erako egonen da martxan. Euskal ingeniaritzaren instalazio berriek industria-ekoizpeneko eta merkatu aeroespazialerako ingeniaritza-zerbitzuetako zentroa hartuko du. Lehendakariak eskerrak eman dizkio Sener enpresari bere ekimenagatik eta egin inbertsioagatik. "Jarrera ekintzaile hori babesten dugu, horren adibide eta erreferente da Sener. Zalantzarik gabe, lehen harri honek duela urte batzuk hasi ametsari jarraipena emateko balioko du", gaineratu du.

Kontseiluak deitu manifestazioak milaka eta milaka lagun Bilbon bildu zituen, “Oldarraldiaren aurrean, euskararekin bat, euskaraz bat” lelopean. Udalaren arabera, 70.000 lagun ziren. Kontseiluak euskararen aldeko akordio soziopolitikoa aldarrikatu zuen, oldarraldiari buru egiteko ez ezik, euskararen etorkizuneko erronka handiei erantzuteko, euskararen aurkaepaitegietatik izan diren epaiak salatzeko, euskararen normalizazioan aurrera egitea aldarrikatzeko eta herritarren eskubideak erdigunean jartzeko. Idurre Eskisabel Kontseiluko idazkari nagusiak “herrietatik ikusten ari garen mugimendua” azpimarratu zuen. Euskal Herriko toki desberdinetatik 50 bat autobus inguru antolatu ziren. Eskisabelen hitzetan “Guretzat hori da adostasun sozialaren adierazpena”. Euskararen aurkako epaiak bata bestearen atzetik heldu dira, joera hori handitzen ari da. Hego Euskal Herriko auzitegiek 2020. urtetik, administrazio ezberdinetan euskara eskakizuna baliogabetu ...

Azaroaren 4tik azaroaren 18 arte, Dantxarieneko jatetxetan pintxo hoberenaren zeingehiagoka antolatua dute. Betetzeko baldintza: lursagar eta bakailaoaz eginak izan behar dutela. Nornahik lehiaketan parte hartzen ahal du. Pintxoak dastatzen ahalko dira: Benta Pantxo, Landibar, Paco Biok, Lapitxuri Biok ala Duck Biok bentetan. Epaimahaiak sariztatuko du irabazlea eta parte hartzaileen hautu bera egin duenak bazkari ederra irabaziko du.

Memoriaren Egunarekin bat eginez, Aintzane Ezenarro Eusko Jaurlaritzako Memoriaren, Bizikidetzaren eta Giza Eskubideen Institutuaren zuzendariak adierazi du beharrezkoa dela ondoko belaunaldiei Hegoaldean izan diren "gertaera traumatikoen eta horien ondorioen" memoria transmititzea. Dionaz, gazteek informazioa eskatzen dute eta "gure belaunaldiaren betebeharra da" informatzea. Ezenarroren ustez, gertatutakoari buruzko informazioa helarazten ez bada, datozen belaunaldiek ezingo dute azterketa kritikorik egin. "Sufrimendu handia jasan dugu, indarkeria ez da inoiz bidea eta gatazka berriak sortzen ditu", nabarmendu du. Halaber, gogoratu du oraindik ere "indarkeriaren epika" errepikatzen dela, nahiz eta "gero eta gutiago izan". Azaldu duenez, azken bi urteetako esperientzia pilotuak emaitza onak eman dituela, helburua da emeki-emeki ikastetxe guziei memoriaren gaia aipatzeko materiala eskaintzea.