Orotarik | 2024ko Urtarrilaren 11a
GERLARI NAHI
Epelondo
Ikusi ditugu munduko autokrata eta diktadoreen urte berriko mezuen saioak: sua hitzematen diete beren etsaiei, beren herritarrei eta oroz bat mundu osoko bizidunei! Putin, Kim Jong Un eta Xi Jinpingek adibide, bonbardaketak hitz eman dituzte, ipar Koreako diktadoreak bazuka ateratzen duela, literalki, hego Korea eta Estatu Batuak mehatxatuz. Netanyhouk ere Gazaren erabateko suntsiketa iragarri du, gerora Israelen izenean, Zerrenda hustu eta berriz kolonizatzeko. Taiwaneko presidente andereak boterean diren orok errepikatu beharko luketena erranez ihardetsi dio txinatar autokratari: "autoritarismoaren itzuleraren aitzinean, gure egiteko bakarra demokrazia eta bakea gerizatzean datza!"
Antzara gibela prestatzen ari nintzen bitartean mintzatu zen Macron ere, telebistan. Zazpi aldiz erabili zuen réarmer edo "berrarmatu" aditza, gerla buru deliberatu bat bailitzan edo hala izan nahi balu bezala. Armatzeko orduan, eskoletako eta etxeetako premiazko larderia, bai eta ekonomia zein sozial alorrak aipatu zituen, frantses izatearen urguilu zozoz hanturik azkenik, 2024ko joko olinpiko garestien zita azpimarratuz. Badakigu Macronek zazpi urte hauetan eramaten duen gerla bakuna bere hiritarren kontrakoa dela, hauen lan, sozial eta nortasun eskubideak larrutu beharrez, hori guzia, eskuinera buhatzen duten estatuko bizpahiru miliardunen pribilegioak ez hunkitzeko!
Macronek amesten ote du Zelenski baten larruan jartzea, sinbolikoki baldin bada ere? Ez dio nehork horrelakorik eskatzen, Frantzia ahalik justuen eta irekien goberna dezan baizik. Baina esperantza hau aspaldian galdu da, eta immigrazioaren legearekin, lurraldea RN alderdi xenofoboaren eskuetan opari uztera doa.
Iñigo Urkulluren diskurtsoa bederen enpatikoa zen.
