Heriotze: Apexaeneko Janina Indart

Denak harritu gaituen berria da, Apexaeneko Janina supituki zendu dela, 79 urtetan. Zokoa auzo guneko urteko bazkarian zen, Aiherrako Denen Etxean, bat batean tanpez erori delarik. Berehala bihotzeko masajeak eginik Baionako larrialdietara eraman zuten. Baina osagarria gaizkiturik, 4 egunen buruan zendu zen.

Isurian sortua, 4 haurrideetako gazteena zen. Gazte denboran lan egin zuen orduko neska gazte gehienek bezala, sehi gisa familietan edo menaiu egiten. Berantago Lauak enpresan lan egin zuen. Emazte erne eta langilearen oroitzapena uzten dauku.

Janina zenaren ehorzketak Aiherrako elizan iragan ziren. Doluminak Jean-Louis bere senarrari, Martine eta Nicole alaberi eta hauen familieri, ahaidego guziari eta manera berezi batez hain hurbil zituen bere sei arrahaur maiteeri.

Denen Etxea bertsozaleez beterik

Joan den ibiakoitzean herri barnean bazen mugimendu. Aiherrako Beltzuntze eta Bertsularien Lagunak elkarteek antolaturik, Xiberoa, Lapurdi eta Baxenabarreko bertso txapelketa joan den ibiakoitzean bururatu zen, giro hoberenean. Lehenik bazkarian 150 bat lagunek parte hartu zuten (eta preziatu prestatu menua) eta gero arratsaldean Denen Etxea tanpez bete zen bertso saioko finalarentzat. Azkenean Hazparne aldeko “Hazparke” taldeak zuen txapela eraman (Irantzu Idoate, Ortzi Idoate hazpandarrak eta Nahia Sasco lekuindarra). Gorestekoak ere dira hauen aurka arizan ziren “Muttikoak” taldekoak (Irati Alcantarilia, Haize Lekuona, Ibai Lekuona) sortu duten giro onarentzat. Denen Etxean bildu bertsozaleek eguna bururatu zuten edariak eta talo onak hartuz, finalari buruzko komentarioak eginez eta kantuz.

Beltzuntze elkarte berrituak joan den urtarrilean bertso afaria antolatu zuen. Pentsatzekoa da joan den larunbateko finala arrakastatsuaren ondotik, segituko duela bertso sailaren garatzen, bertsolariak berriz herrira gomitatuz. Herritar xaharrenak oroit ditaizke Pazko egunarekin urte guziz antolatzen ziren bertso saioez, bai eta ikastola guzietako haurrak elkartzen zituen Bertsolar Ttiki egunak, urte guziz herrian egiten zirela, berantago “Hernandorena saria” saioak. Joan den ibiakoitzekoari doakionez, plazer egiten du holako gazteria bertsoaren inguruan bildurik ikustea. Bertsolaritzak merezi duen hedadura har dezala.

Kantu afaria, Gozategian

Kantuz aritzea gostukoa duen herritar multxo batek kantu afaria proposatzen dauku. Hau Gozategia ostatuan iraganen da, abenduaren lehenean, deneri irekia da, herritar ala kanpokoeri, kantuz aritzea maite duten ber. Afaria (arroltze moleta, lukainka, artekia eta gasna, arnoa barne) 15€tan izanen da.

Ez da lehen aldia gisa huntako hitzorduak proposatzen dituztela, aldiz aurtengoa lehena da. Tokiaren aitzinetik erreserbatzea galdatzen dute, ostatua (05-59-45-91-63) edo Jean-Mixel (06-87-71-08-98) deituz, urriaren 29 arratseko berantenaz. Ongi etorri deneri!

Teletoia Aiherran: abenduaren 9an

Teletoian gure herrian aurten manera berezi batez parte hartzen ahalko da. Berrikitan berrantolatu duten harrobi ohian, Hardoia parkean, 2 oreneko errelebo lasterketa edo ibilaldia proposatua zauku, (9:30-11:30). Izan kirolaria edo ez, zatozte nunbre handian!