Kontseiluko biltzarra

Aurtengo lehena joan den ortzegunean iragan da, Lapurdi gelan. Mintzagai guziak aho batez onartuak izan dira, hauek ziren:

- Arruntzan Sylviane Potignyren laguntza eskaintza bere lantegiaren seinaletikan.

- Etxe Ohiaren plaza berriz izendatzea, hau bilakatzen da orain Gazteluko plaza.

- Atekamotza zen bide berri baten izendatzea Indako bidea izendatuz.

- Ehun euroz petik diren diru sartze ezin bilduak baliogabetzea.

- Errolda lanerako hogei langileren biltzea.

- Arruntzako eremu publikoen berriz aztertzearentzat diru laguntzen galdea.

Azken gai hunek eztabaida luzea sortu du. Arruntzan ekonomia aldetik badira jatetxe bat eta zonbait saltegi. Auzo hortako eskolan haur kopurua beti emendatzen ari da, bainan auto aparkalekuak anitz eskas dira, pilota plazaren inguruan bereziki. Bideak frango hertsiak dira, adibidez elizako eta eskolaren inguruan, bai eta ere Heraitzetik Arruntzarakoan, ezin da autorik nunahi utzi bide horietan aldaketa batzu egin gabe. Pilota plaza bera jatetxearen aitzinean beti autoz eta kamioiez betea da. Herriko Etxeak nahi luke eta zuzen da plaza gehiago libratu pilotarientzat. Kondutan ere hartu behar du gaur egun legeak manatzen dion bezala espazio gehiago emaitea oinezko eta txirrindularieri ibil diten seguritate osoan. Obrentzat aitzinkontu bat egina izan da, 350.993 eurotara heltzen dena. Laguntza ekarri behar lukete erakunde batzuk: Estatuak, Departamenduak, uraren agentziak eta espazio berdeen erakundeak. Laguntzen arabera proiektu osoa berrikusia izanen da. Heldu den kontseiluko biltzarra urtarrilaren 25ean.

Langile bilatze

Uztaritzeko Herriko Etxeak bilatzen ditu langileak heldu den udarako, uztail eta agorrileko. Lanpostuak dira animatzaile bezala, gizon ala emazte, bai eta ere janarien zerbitzuan eta gelen menaiurako eta mantenuarentzat, hemen ere gizon ala emazte. Interesatuek behar dute beren izena helarazi urtarrilaren 9tik otsailaren 12a arte helbide huntara: ressources.humaines@ustaritz.fr.

Elektrika mozte

ENEDIS enpresak obra batzuen egiteko elektrika mozte batzu eginen ditu lehenik ortzegun huntan (9:00-17:00). Hunkitu alderdiak izanen dira Arruntza eta Senpereko bidea. Urtarrilaren 30ean asteazkenez ere izanen dira mozturak (9:00-16:30), hemen hunkituak Purgu eta Hiribehere auzoak. Kontutan hartzeko.