Urtero urtarrilean egin ohi den manifestazio jendetsuak Bilbon milaka lagun bildu ditu, "Konponbiderako giltzak" lelopean, Sare herritar plataformak deitu manifestazioan, ETAko presoei ezartzen zaien salbuespen politika gelditzea eta legedia arrunta aplikatzea eskatzeko mobilizatu dira, aro berri bati bidea irekitzeko nahian. Antolatzaileek zioten: "Ideologia askotako milaka eta milaka lagun elkartu gara berriro Bilboko kaleetan, iraganeko ateak itxi eta etorkizuneko ateak irekitzeko konponbiderako milaka eta milaka giltza, elkarbizitzaren bidean salbuespen espetxe neurriekin amaitzeko garaia da". Sarek gogoratu duenez: "erakunde politiko, sindikal eta sozialekin batera urteetan egindako lanaren emaitza izan zen urruntze politikaren ezabatzea, presoak Euskal Herriko kartzeletan daude orain". Deitzaileek etapa hori burututzat eman dute, eta hurrengoa salbuespen politikarekin erabat amaitzea dela defendatu dute, horretarako euskal instituzioen esku-hartzea eskatu dute. "Ez dira...

ETAko presoak euskal presondegietarat hurbiltzeko prozesua 2023ko martxoan bururatu zen. Gaur egun ETAko 155 preso daude. Horietako 140 Autonomia Erkidegoko espetxeetan, 7 Iruñean eta gainerako 8ak Frantziako estatuan. ETAko 19 preso baldintzapeko askatasunean daude, baina beste 45ek ere lor dezakete, zigorren hiru laurdena beteak baitituzte. Beste 70 hirugarren gradura pasatzeko moduan daude, espetxealdiaren erdia pasatu baitute. Hala eta guziz, Eusko Jaurlaritzak EAEko datuetan oinarrituta, jakinarazi duenez, 2023an soilik 28k eskuratu zuten hirugarren gradua, neurri hori zazpiri atzera bota zieten eta laurena bertan behera gelditu zen, ebazpen judizialaren zain.

ERNE, ertzaintzako sindikatuak egin eskaerak bere bidea egin du. Autonomia Erkidegoko Auzitegi Nagusiak Zarauzko Udalari agindu dio udaltzain guziak su-armaz hornitzeko, behar diren neurriak hartuz arma egokiak eskuratzeko, armategi homologatuak izateko eta horiek behar diren bezala zainduak egoteko instalazioak edukitzeko. Auzitegiak atzera bota du Zarauzko Udalak jarri helegitea, aintzat hartu du ERNE sindikatuaren eskaera. Epaiaren arabera, "su-armen erabilera beharrezkoa da herritarren segurtasuna mantentzeko eta ezartzeko". Ez da horrela erabakitzen duen lehen aldia. Eibarko Udalak ere (Gipuzkoa) uko egin zion udaltzainek su-armak modu orokortuan erabiltzeari, ERNEk kasazio helegitea jarri zuen erabaki horren aurka. Auzitegi Nagusiak helegitea aintzat hartu zuen eta Eibarko Udala udaltzainak su-armaz hornitzera behartu zuen.

Donostiako Udaleko langileek elkarretaratzea egin dute Autonomia Erkidegoko auzitegi nagusiak euskararen normalizazioaren kontra hartu duen azken epaiaren kontra. Donostian udaltzain izateko euskara ez dela behar dio epai honek. "Euskaren kontrako epairik ez" kartelak erakutsi dituzte. LABeko ordezkari Joseba Alvarezek komunikabideei egin adierazpenetan gogoratu duenez, azken hau Donostiako Udalak egin lan deialdien kontrako hirugarren epaia da. "Aurrekoak bezala donostiarrek administrazioarekin dituzten harremanetan hizkuntza aukeratzeko eskubidearen kontra egiten du hirugarren epai honek. Herri honetan bi hizkuntza ofizialak ditugu eta herritarrek administrazioan bi hizkuntzetan laguntza izateko eskubidea dute. Hori soilik langile elebidunekin bermatzen da, euskaraz eta gazteleraz aritzeko gai diren langileekin", adierazi du Alvarezek.

Espainiako Gobernuak jakinarazi die erkidegoei ezinbestekoa dela estatu osoko ospitale eta anbulatorio zerbitzu guzietan maskak ibiltzea, arnas birusen erasoek behera egin arte. Osasun Ministerioaren aginduaren ondoren, maskak ezinbestekoak dira osasun guneetan. Eusko Jaurlaritzak auzitara joko du Madrilgo Osasun Ministerioak osasun zentroetan musukoa inposatzeko hartutako erabakiaren kontra. Nolanahi ere, argitu du Gasteizko gobernutik bete eginen dutela agindua indarrean dagoen bitartean.

Lan Ministerioak CCOOrekin eta UGT sindikatuekin adostu du 2024rako lanbide arteko gutieneko soldata %5ez emendatzea, hamalau ordainsaritarako, hilabero 1.080 eurotik 1.134 euroraino. Emendatze hori 2024ko urtarrilaren 1etik aurrerako atzeraeraginarekin aplikatuko da.

Pello Otxandiano ofizialki EH Bildu koalizioaren Eusko Legebiltzarreko hauteskundeetarako lehendakarigai hautatua izan da. Egina izan den bozketan, alderdikideen %94ren babesa eskuratu du. Hala jakinarazi du alderdiak Bilboko Bizkaia Aretoan egin duen batzarrean.

40 urteko otxandiarrak (Bizkaia) EH Bildun ibilbide politiko luzea du, eta gaur egun programa zuzendaria da. Telekomunikazioetan ingeniaria, Arnaldo Otegi buru duen koalizioaren ideologotzat dute.