Ingurumen hondamendiaren aitzinean, munduko miliardunak gertatzen ahal litzatekeen ondorieri aurre egiteko antolatzen ari dira. Haietako batzuk beren geroa segurtatzeko proiektu faraonikoak plantan jartzen ari dira. Planetan gertatzen ahal den kataklismoaren aitzinean, zaila da sinestea gure artean abantailak dituztenek, zikoizkeria mugagabean, ez direla jendarte osoaren geroaz baitezpada axolatzen. Bide horretatik doazela, adibide konkretu batzuk agertuak dira. Ulertu dute heldu diren urteetan aldaketa batzuen aitzinean izaiten ahal direla. Denen abantailen alde lan egiteko orde, milioidunek "munduaren akabantzari" ihes egiteko erabiltzen dituzten ahalak izugarriak dira.

Kontsumo neurrigabekoan eta mugarik gabeko kapitalismoan oinarritua, planetako aberatsenek beren diruarekin dena konpondu dezaketela uste dute.

Mark Zuckerberg Facebookeko buruzagiak proiektua isilpean gorde nahi bazuen, berria zabaldu da. Miliardunak, Hawaii uhartean 250 milioi dolar baino gehiago balio duen bunker bat eraikitzen ari du. 566 hektareatan, lurpean bi jauregi eraikiko ditu, igerilekua, sauna, kirol gelak... eta tenis zelaia, ur eta elektrizitatez autosufizientea den aterpe erraldoia.

Bestalde, bide beretik, katastrofea gertatzen balitz, errana denez, bunkerrak eraikitzeko Zeelanda Berria aberatsen helmuga gogokoena litzateke. Reid Hoffman LinkedIn sare profesionalaren sortzailearen arabera, Estatu Batuetako milioidunen %50ak baino gehiago Zeelanda Berrian instalazioak ditu. Lurraldearen antolaketa, autosufizientziarako duen gaitasuna, kontinente handietatik urrun, mendebaldeko klima eskainiz, bizirautzaile amerikarrentzat herri atsegina litzateke.

Argentinako Patagonia ere aberatsenen artean ezaguna da. Bertan, mundu osoko pertsonalitate anitzek hainbat hektarea lur erosi dituzte. Horien artean, Ted Turner CNN telebista kateko sortzailea, Florent Pagny kantaria, Georges Soros hungariar-estatubatuar finantzarioa edo(ta) Sylvester Stallone aktorea. Aberatsen beste zentzugabekeria, Elon Musk X-ren (Twitter ohia) buruzagi berriarena da, Marte planetan atmosfera bat sortzea du helburu, Lurra planeta bezala bizigarria izaiteko asmoz. Proiektu hau zientzialariek anitz kritikatzen dute, ezin egina dela argumentatuz.

Adibide guzi hauek frogatzen dute diruak burua zenbateraino galaraz dezakeen.

Hondamendi ekologikoaren kontrako borrokan baliabideen partekatzea ezinbestekoa da, dirudun puxant batzuk mirakuluz lortzen badute beren burua babestea, milaka pertsonek beren bizitzan ordainduko beharko dute.