Azalekoa | 2023ko Azaroaren 30a

“Eraiki”: dotazio funtsa

M.O.

Ipar Euskal Herrian diren elkarte batzuen egoitzen kudeaketarako, “Eraiki” dotazio-funtsa sortu da. Xebax Christy proiektu horretan partaide denarekin bildu gira, guti aipatzen den gai huntaz xehetasunak eman dauzkigu.

Ondarearen geroa segurtatu

Euskal Herriak tradizio luzea du elkartuz eta mobilizatuz, proiektuak eramaiteko behar dituen baliabide propioak muntatzeko. Hainbat sailetan ari direnek, bereziki elkarte moduan antolatuak, tresnak behar dituzte. Lan horren eramaiteko, azken hamarkadetan militanteen diru-laguntzeri esker, egoitzak beharrezkoak izanez, konfiantza osoz pertsona batzuen izenean erosiak izan dira. Ontasun horiek interes orokorraren zerbitzurako atxikiak izan dira, etekin pertsonalik atera gabe. Urteak pasatzen ari direla eta, Xebax Christyk erraiten zaukun egoitza horiek elkarteek erabiltzen badituzte, juridikoki gauzak argi ez izanez, finkatzeko beharra agertu dela. Pertsona horietako bati zerbait gertatuz gero, haien ondokoekin arazoak sor daitezke, legez justifikatzen ahal bailukete ontasun hori berena dela. Anitz gogoeta eramanik, legeak ongi azterturik eta araudiak finkaturik erabaki da “Eraiki” dotazio funtsa sortzea.

Eraiki dotazio funtsa

“Eraiki” dotazio funtsaren xedea eta bokazioa da, egoitzen kudeaketa baldintzarik hoberenean gauzatua ahal izaiteko, ahalik eta modu seguruenean finkatzea. SCI (Société Civile Immobilière) egituratzearen moldea baztertua izan da, norbait hiltzen delarik estatuari ondoregoarentzat zerga zama pagatu behar baita, aldiz dotazio funtsak ez du hori behartzen.

Baionan kokatuak diren Alda, Bizi, Enbata, Manu Robles Arangiz eta Patxoki elkarteek “Eraiki” dotazio funtsa sortu dute. Interes zerbitzuak betirako kapitaletik kanpo geldituko dira, ez baita haizu nolanahika saltzea, espekulazio arriskua saihesten dela.

“Eraiki” dotazio funtsa hiru kolegiotan antolatua da. Lehena sortzaileen kolegioa, aitzin aipatu elkarteek dute kudeatzen, mugimendu bakoitzak duen kide kopuruaren arabera ordezkatua da, bat eta biren artean. Hunen funtzioa da besteak beste egoitzen eguneroko jarraipena segitzea eta adostu araudiak partaideek errespetatzen dituztela zaintzea. Bigarrena “Aliatuen” kolegioa, partaide ez diren beste elkarte edo mugimendueri idekia da, oinarrizko erabakietan ez dute parte hartzen, aldiz biltzar nagusian bozkatzeko eskubidea dute. Hautatuak dira “Eraiki” funtsaren izpirituarekin bat egiten dutelako, kontseilari rola dute. Mementoan Euskal Herriko Laborantza Ganbara eta Euskal Moneta sartzeko prest agertu dira, beste batzuk nahi badute sartzen ahalko dira. Azkena “Zuhurren” kolegioa, beren militante iraganagatik eta duten esperientziagatik hautatu pertsonalitatez osatua da. Biltzar nagusiak ditu izendatzen, ez da kopuru mugaturik.

Dotazio funtsak elkarte batek bezala orientazio estrategikoak biltzar nagusian bozkatzen ditu, egoitzen erostea erabakitzen du eta administrazio kontseilua izendatzen du.

Mugimenduari ondokotzat eman nahian

Aitzin aipatu bezala lege aldetik gauzak ongi plantan ezarri nahi baziren, beste elementu batek proiektua aitzinarazi du. Ipar Euskal Herriko familia batek dituen etxea eta lurrak abertzale mugimenduari ondokotzat eman nahi ditu. Familia horren desira da bere ondarea ez dadin promotoreen esku geldi, lege aldetik behar bezalako dohaintza egina izan dadin dotazio funtsak du kudeatuko. “Eraikik” etxearen antolaketa eta kudeaketa segurtatuko du, bilgune eta formazio zentro gisa, taldeak errezebitzeko eta aktibitateak eskaintzeko. Dotazio funtsak ondare hori mugimenduaren zerbitzurako ezarri nahi du, irabazi asmorik gabe.

Elkarte eta hainbat egiturek aktibitateak bideratzeko mugatuak dira, eredu ekonomikoan, ekipamendu logistikoan eta egoitzen eskasean. Xebax Christyk zioen egoitza batzuen ukaitea beharrezkoa dela, interes orokorraren zerbitzurako egon daitezen, “Eraiki” dotazio funtsak hori segurtatuko du.