Bazterrak kalmatu

Aitzineko asteen gorabeheren ondotik bazterrak kalmatu dira: hastapenean pentsatu baldin bada laborarien ekintzeri lotuak zirela Hazparnekoak, jakin da iduriz ez dutela deus ikustekorik. Eraikuntzarako herriek segiarazten dituzten legeak ez onartu nahiz, ekintza horiek pertsona batek egin zituela aitortu du. Berantago jujatua izanen da egitate horiendako.

Ostiralean herriko bi saltegi handietan ez zen erosketen egitera hurbiltzeko molderik: alabainan traktore handi batzuk sartzea trabatzen zuten. Azken egun hauetan dituzten aldarrikapenen sustengatzeko egin dute ekintza hori inguruko laborari batzu.

Herriak saristatu ditu

Urtarrilaren 20an iragan zen urte hastapeneko elgarretaratze berezia: herriko hautetsiek herritar batzu eskertu eta ohoratu nahi ukan dituzte, urte guzian eramaiten duten lanarentzat edo urtean egin dituzten balentrientzat. Horietan baziren hiru musikari gazte: Iban Hirigoyen, Lilia Jaurena eta Xabi Inchausti bateria fanfarea konkurtso batean lortu sarientzat. Baziren ere Vedrenne eta Lissarague-Durruty andereak, Romanielle jaunarekin eskolako haurrekin historia memoriari buruz egiten duten lanarentzat. “Euskal Herriko Semeak” batasunaren buru den André Lagrillek ere laudorioak ukan ditu, antolatu ekintzetan erakutsi elkartasunarendako. Kirolean Maite Saint Jean aipatu da trail batzuetan atera ondorioentzat; futbol kluba ondorio ezin hobeagoentzat, beti gora doan HAC errugbi taldea; Emma Etcheberry brasildar jiu-jitsu sailean sari handiak ukanik; “Mahain Joko” elkartea elbarritueri egiten dien harrerarentzat eta bukatzeko Beñat Maitia eta Peio Iribarne pilotan lortu garaipenentzat.

Omenaldi berezia ukan dute ere Xarles Bellecave eta Beñat Ospital suhiltzaileek kasik berrogei urtez eraman duten lanarentzat. Anne Duhour anderea beroki eskertua izan da herriko sozial zentroarekin egiten duen guziarentzat: haurren laguntzea eskola lanetan eta kanpotik etorrieri frantses kurtsoak emaitea.

Denek txalo bero batzu ukan dituzte.

Laguntza etxerat

Laguntza Etxerat tokiko elkarteak parte hartuko du herrialdeko izen bereko zerbitzuak (SAAD) apailatu ate idekietan. Egitate horren helburua langile berrien aurkitzea da, etxeetarat egiten duen laguntza motak erakutsiko dira. Beti langile eskasez ibilki da elkartea. Ez da formakuntza berezirik behar: motibatua izan behar da, ahuldua den bestearen laguntzeko gogoa behar da.

Hitzordua otsailaren 9an emana da (09:00→12:00) 54, Francis Jammes karrikan elkarteak duen egoitzan.

Ezkia ikastola

Jadanik aipatu bezala Ezkia ikastolako ateak idekiak izanen dira otsailaren 10ean goizez (09:00→12:00). Hobe da hitzordua harturik 07-48-61-23-14 zenbakira deituz edo ezkia-zuzendaritza@gmail.com helbidera idatziz.

Ihauteriak

Urtero bezala ihauteriak ospatuko dira herrian otsailaren 10ean larunbat arratsaldean. (15:30) Elgarretaratzea Lapurdi plazan, (16:15) desfilea: joaldun, musikari, jende mozorrotu eta Zanpantzar, (17:00) Harana plazan Elgar Oinkako dantzariek eta hiru eskoletako haurrek dantzak emanen dituzte.

Gero Zanpantzarren auzia entzunen da eta seguraz ere erreko aurten ere. Suaren inguruan mutxikoak emanen dira txarangak lagundurik. Jan eta edateko moldea izanen da tokian berean Ezkia ikastola eta Soinubila elkarteeri esker.

Sekulan euria balitz pesta Harana salan iraganen da.