Alain Dubois-ren sustenguz elkarretaratzea

Aitzineko asteburuan, Hazparnen gertakariak iragan baziren, gau berean Makeako Herriko Etxeko paretan Alain Dubois auzapezaren kontra idatzi laidogarriak izan ziren. Egin duen pertsona laster arrastatua izan da, apirilean epaitua izanen da, anartean justizia kontrol pean da.

Gertakari lazgarri horien salatzeko asteazken arrastirian, Herriko Etxe aitzinean elkarretaratzea antolatua zen. Makear eta herri auzoetako herritarrak hurbildu badira, auzapez andana ere etorria zen. Beñat Saint-Esteben lehen axuantak hitza hartu du, holako gertakariak salatu ditu, bi auzapezeri sustengua ekarriz. Hervé Damestoy Lekorneko auzapezak hautetsien kontra diren erasoak kezkagarriak direla adierazi du, gaur egun holako funtzio batek lan eta indar anitz galdegiten duela azpimarratu du. Isabelle Pargade Hazparneko auzapezak, etorriak zirenak eskertu ditu, elkar sustengatzea beharrezkoa dela gehitzen zuela. Alain Dubois-k azkenik hitza hartu du, hunek ere lehenik hurbilduak eskertuz, auzapezek legeak errespetatzeagatik erosotuak izaitea damugarri dela zioen, demokraziaren oinarriak urratuak direla.

Elkarretaratzea bururatu da Herriko Etxeak eskaini hurrupaldiarekin.

Egoera zibila

2023ko herriko egoera zibilaren berri ukan dugu.

Sortzeak - Alec Quesnel, Ttale Daguerre Heguy, Alba Arcal, Emaia Arretchea Urgorry, Felix Jaeger Goetz, Guilia eta Naia Nolanc.

Heriotzak - Jeannine Darthayette, Berthe Sabarots, Eric Amestoy, Jacques Gretha, Simon Bidegaray eta Madeleine Ithurrale.

Ezkontzak - Alain Vicondoa eta Maider Darthayette.