Mus

Frantses federazioak antolatzen duen txapelketan, joan den asteburuan 7 pare sailkatuak baginituen Bastidako kantonamenduko finaletan parte hartzeko. Gure herritik Lasan iraganen den final egun nagusian parte hartzeko, beste 51 ekiporekin betan, hauetarik bakar bat baizik ez da sailkatu, Xarlo Haristoy eta Jean-Noël Minjou. Orotara 52 parek parte hartuko dute, horietan hiru gure kantonamendutik edo eskualdetik, lehenago aipatu aihertarrak, Bardozeko Mailharrancin aita-semeak eta Ahurtiko Mattin Plattier eta Alain Vergez. Lasan aterako diren txapeldunak heldu den urrian Perun iraganen den munduko txapelketara joanen dira.

Antzuolatik pilotarientzat gomita

Antzuolatik gomita berezia aihertar pilotarientzat. Antzuolako pilota elkarteak Aiherrako pilotariak gomitatzen ditu txapelketa batera, maiatzaren 4an eta 5ean. Hau jokatuko da frontball gisako jokoan, adin guzietako pilotarieri irekia da. Izena heldu den osteguna aitzin eman behar da: 06-31-64-60-88. Txapelketa 2 egunez iraganen da eta lekuan berean lo egiteko parada izanen da. Motibatu!

Arberoan Alaiki 2 astez

Primaderako oporrak hurbiltzearekin, Arberoan Alaiki aisialdi guneak oroitarazten du zentroa bi astez irekia izanen dela, apirilaren 15etik 26ra, astelehenetik ostiralera, (7:30-18:00). Interesatuak direnek beren burua ezagutarazi behar dute Herriko Etxera deituz: 05-59-29-64-02.

Apirilaren 13an, Antzuolara autobusez

Jadanik erran bezala, aurten Aiherra eta Antzuola herrien parekatzearen 40 urteak ospatzen dira, 3 hitzorduren bidez. Lehena iraganik, huna bigarrena Antzuolan apirilaren 13an iraganen dena, egitarau eder batekin. Aiherratik autobusez abiatzea (8:30), antzuolakoen ongi etorria eta hamaiketakoa (10:30). Antzuolan eta Aiherran egin labur metraiaren ikustea, Pette sortzailearen presentziarekin. Ondotik hurrup eta klik eta bazkaria (14:30). Kantu eta dantza saio animatua (16:30), Aiherrara itzultzea (18:30). Zatozte egun goxo baten pasatzera, umore onean!

Autobus eta bazkarirako Herriko Etxetik pasatuz izena eman edo deituz:05-59-29-64-02. Autoa hartzen dutenek Herriko Etxea deitu behar dute halere, bazkarien kopuruengatik. Bazkaria Antzuolako Herriko Etxeak du eskaintzen eta autobusa Aiherrakoak. Gauean, gaztetxean kontzertuak izanen dira, beraz motibatuenentzat izanen da egiteko!