Abarratia pilota elkartearen biltzar nagusia joan den ibiakoitzean zortzi iragan zen, Donoztirin. Urtean behin proposatzen den hitzordu hunen kari, pilota arduradunak, pilotariak eta burasoak bildurik, iragan urteko harat hunaten eta aurtengo proiektuen berri eman da. Orotara 73 lizentziatu dira, Aiherra, Izturitze eta Donoztirikoak, mutiko eta neskato, esku-huska eta palan ari direnak. Orotara Ipar Euskal Herrian 59 pilota elkarte badaude, Abarratia lizentzien kopuru aldetik 25. da. Aste guziz elkartearen laguntzeko hiru trebatzaile berri sartu dira: Nicolas Dirasse (esku-huska), Eric Meriguet (gazteak palan) eta Miren Uhart (xitoak palan). Bestalde trebatzaileeri Xabi Harguindeguy pilota animatzaileak laguntza ekartzen die.

Emaitzen aldetik azpimarratua izan da 27 pare final-laurdenetara sailkatu direla, txapelketa ezberdinetan, aipamen berezia eginez Pierre Etcheverry gazteaz, hau “Elipe pro” pilotari berezko hoberenen arteko mailara helduz. Sari berezia eskaini diote, lehen aldia baita Abarratia pilota batasuneko pilotari bat hein hortara hupatzen dela.

2023 urteko kontuak orekatuak dira, urtea 795,36 euroko etekinarekin bururatu da. Proiektuak ez daude eskas: Xokoko lehiaketa baten antolatzea, pasaka jokoaz iniziazio saioa, frontbal finalen errezibitzea, esku-huskako buruz-burukako finalak apirilaren 13an, apairu eta urte hondarrean ateraldi baten antolatzea. Bilkura bururatu da pintxoak eta edariak parte hartzaileen artean partekatuz, giro onean. Aupa Abarratia pilota elkartea!