Pierre Etcheverry eta Xalbat Duhalderen balentria, pilotan

Frantziako Elite Pro binakako pilota txapelketa joan den igandean bururatu zen, Moderne trinketean. Pierre Etcheverry Abarratia pilota batasunetik jalgi pilotariak, Luis Sanchez-ekin finala eraman du (40-32) Vincent Bideondo eta Battitt Ducassouren aurka. Balentria handia Pierre Etcheverryrentzat, jakinez berrikitan oraino amaturretan ari zela, orain hoberenen artera hupatu da, lehen urtean berean txapela eramanez. Holako emaitzarekin, ez da dudarik Abarratia pilota batasuneko arduradunak harro daudela. Goresmenak!

Beste berri ona, Xalbat Duhalde gazteak, buruz-burukako finalerdietan Eneko Etchevers irisartarrari 40-28 nagusitu zaio, 22 urtez petikako txapelketaren kari. Heldu den igandean finalean Lekorneko trinketean arizan beharra da. Xantza on eta aupa Abarratia!

Aihertarrek Antzuolan 40 urteak ospatu

40 urte bete dira Aiherra eta Antzuola elkartu eta adiskidetu zirenetik. Iragan apirilaren 13an, bi herrietako kideek senidetzaren urtemuga besta giroan ospatu zuten, Antzuolan antolatu egitarau zabalaren bidez.Autobusez eta autoan joanik, orotara 35 bat aihertarrek elkarretaratzean parte hartu zuten, Aiherrako Beltzuntze elkartearen eta Herriko Etxearen gomitari ihardetsiz. 40 urteko bi herrien parekatzearen kari, aurten bigarren aldia zen bi herrietako lagunak elkartzen zirela.

Antzuolarrek prestatu eta zerbitzatu askari ona hartuz eguna hasi zen. Ondotik Oilogorrifilm laburraren emanaldia eskaini zuten, hau Pette Etxeberriak Antzuolan, Aiherran eta beste hainbat tokitan hartu irudiekin egina. Ondotik 2 herrien arteko parekatzeak iraun duen 40 urteetako argazkiak izan ziren ikusgai. Argazki oroigarriak eta hunkigarriak ere 40 urtez egin bidea kontatzen dutenak. Parekatze hunen ikur den zuhaitzaren ikusten izanik (zuhaitz hunek istorio berezia dauka, ondoko aldi batez kondatuko dauzueguna…), bi herrietako lagunak herriko ostatuetan aperitifa harturik, mahai on baten inguruan bildu ziren. Giro hoberenean bururatu zen eguna.

40 urteak ospatzeko hirugarren eguna, heldu den urriaren 19an iraganen da, Aiherran. Oraindanik nota ezazue!

Maiatzaren lehenean, oinezko ibilaldia

Aiherra eta Izturitzeko eskola elebiduneko burasoek (APE Biga Bat elkartea) jakinarazten dute, frantses hutsean idatzi papertxo baten bidez, oinezko ibilaldia antolatuko dutela, maiatzaren lehenean, asteazkenarekin, Aiherran. Abiatzea herriko plaza nagusitik eginen da (8:00-9:30) eta hiru ibilbide mota proposatzen dituzte, bakoitzak nahi duena hautatzeko aukera ukanez: 6 km, 12 km edo 15 km-ko ibilbidea. Izena tokian berean emanen da, parte hartzea pertsonaka 7€ izanez da (urririk 10 urtez petik). Jateko eta edateko izanen dela ibilaldia bururatzean hitzemana zauku. Parte hartzaile bakoitzak euro bat emanen du, “Tous avec Agosti” elkarteari, Baionan ospitaleratuak diren haurren familien alde. Ongi etorri deneri!

Entrexatak taldea eta Ruper Ordorika

Beltzuntze elkarteak kantaldi ederra antolatuko du. Hau maiatzaren 5ean iraganen da, igande arratsaldean (16:00), Denen Etxeko gela handian.

Lehen partean Entrexatak taldea entzuten eta ikusten ahalko dugu, bigarren partean Ruper Ordorika. Entrexatak Aiherra eta herri auzoetako 7 neskek osatzen duten kantari taldea da, a capella kantatzen dute. Lehen aldikoz gure herrian kantatuko dute. Ruper Ordorika aldiz, orain arte gehienetan musikari talde batekin ibiltzen baldin bada, ahots eta gitarra soilez agertuko zauku, “Bakarka2” disko berriaren aurkezteko eta hainbat kantu ezagunen emaiteko. Arratsaldea taloekin eta hurrupaldi bat hartuz bururatuko da. Hots, arratsalde goxo baten pasatzeko parada, dudarik gabe. Oraindanik nota ezazue!

Asteburu huntako hitzorduak

Apirilaren 26an, ostiralean (18:30), Gaztetxean: “Nolako laborantza eta nolako janaria, bihar” gaia tratatuko duen gaualdia, Mathieu Dalmais agronomo militantearen hitzaldiarekin.

Apirilaren 28an, igande goizean, “Hiritar kafea” (9:30) herriko jantegian, Herriko Etxeak proposaturik aipagai izanen diren gaiak: Beltzagitearen berritzeko obrak, lur funtsak eta etxebizitza sozialen politika ausarta Euskal Herrian.