Euskal Herriko Garapen Kontseilua 1989an sortu zen, jendarte zibilaren eta hautetsien artean lotura atxikitzeko, gogoetak eta proiektuak plantan jartzeko xedearekin. Garai horretan, Euskal Elkargoa ez baitzen oraino osatua, “Hautetsien kontseilua” egiturarekin partaidetzan lan egin zuen, “Lurraldea” deitu dispositiboa landua izan zen.

Garapen Kontseilua jendarte zibilaren tresna

Gaur egun Garapen Kontseilua lurraldeko 413 aktorek osatzen dute: 282 pertsonek 140 erakunde ordezkatzen dituzte eta 131 herritarrek beren izenean parte hartzen dute. Biltzar nagusian batzordeak eta lantaldeak antolatzen dira, lurraldeko gai nagusieri buruzko eztabaida kolektiboak eramanak dira.

Demokrazia parte-hartzailerako tresna da, jendarte zibilaren ahotsa da. Parte hartzen dutenak lurraldeko aktibitate eta sozial sektore desberdinetatik etortzen dira. Elkarteak, erakunde sozioprofesionalak, ekonomia eta sozial bizitzarako erakundeak ordezkatuak dira. Elkarte-bizitza aberatsa du, Ipar Euskal Herrian hamarkadetan eragina ukan du, oro har jendeari idekitako ekimenak antolatzen ditu.

Ideien laborategia

Garapen Kontseiluak lurralde proiektuak etengabe elikatzen ditu, etorkizuneko ikuspegi batekin. Lurraldeko gai nagusieri buruzko eztabaida publikoan aktore da. Lan taldean egin gogoeteri esker, garapenarekin eta lurralde antolaketarekin zerikusia duten gaien inguruan proposamenak egiten ditu, botere publikoetako arduradunak interpelatuz. Egiturak, bereziki Euskal Elkargoari, oro har politika publikoeri buruz zuzeneko ekarpenak egiten ditu. Egiten dituen ebaluazioak agertzen ditu.

Esperimentaziorako lekua da, instituzioen eta erakundeetako aktoreen artean lotura atxikitzeko. Sozial eta lurralde-berrikuntzaren zerbitzurako, ikerketa ekintzako proiektuak gauzatzeko bilaketak egiten ditu, hainbat partaide mobilizatuz.

“Euskal Herria 2040” abiatzen

“Euskal Herria 2040” egitasmoaren barne, Garapen Kontseiluak prospektiba proiektu hunen lehen fasean parte hartzeko gomita zabaltzen du: diagnostiko partekatua eraikitzeko asmoarekin.

Horretarako, bi ekitaldi antolatuko dira, maiatzaren 25ean Bidarten eta ekainaren 1ean Donapaleun.Topaketa hauen helburua lurraldearen ikuspegi desberdinak trukatzea eta partekatzea da. Baliabideak, oztopoak eta partekatu beharreko berrikuntzak aipatuak izanen dira.

Gogoeta kolektiborako sei gai nagusi identifikatu dira: “lurralde erresiliente eta solidarioa”, “jan eta elikatu”, “eskubideetarako berdintasuna, sozial proiektua”, “kultura/gazteria”, “demokrazia/auzoekin lotura” eta azkenik “ikasi, sortu eta landu”.

Gogoeta horien berri emana izanen da ekainaren 15ean Lekornen iraganen den biltzar nagusian. Urte batez, 2025eko ekaina arte, Ipar Euskal Herrian gaindi hitzorduak finkatuak izanen dira, orain aipatu gaien inguruan herritarren iritzia entzunen eta bilduko da.