Iberdrola konpainia elektrikoak urteko lehen hiruhilekoan, 2.760 milioi euro irabazi ditu. Hazkunde horren iturri eragin zuzena ukan du Mexikon saldu aktiboen gainbalioak (1.165 milioi euro), bai eta Erresuma Batuko tarifa-defizitaren berreskuratzeak (238 milioi euro). Balore Merkatuaren Batzorde Nazionalari igorri agirian, konpainiak datuak azaldu ditu. Zehaztu duenez, Mexikoko eta Erresuma Batuko operazioak ekuaziotik kenduz gero, irabaziak %28an gelditu lirateke.

Orotara, taldeak egin salmentak 12.678,5 milioi eurokoak izan dira, iaz garai berean baino %18 gutiago. Bestalde, Iberdrolaren finantza-zor garbi egokitua 44.998 milioi eurokoa izan da, 2023ko abenduko datuekin konparatuta %5,9 ttipiagoa.

Joan den astean iragarri bezala Gasteizeko Mercedes Benz lantegiak produkzioa gelditu du, ekoizpena merkatuaren beharretara egokitzeko. Ekoizpen kate osoa gelditu da. Multinazionalak Arabako hiriburuan duen plantan, 5.000 langile inguruk lan egiten dute, geldialdiak guziei eragin du. Zuzendaritzak azaldu duenez, Europa osoan eskaria jautsi da eta merkatuari egokitzeko neurriak hartzea ezinbestekoa da.

Horrez gain, enpresak iragarri zuen maiatzeko ostiraletan furgonetarik ez duela ekoiztuko, arrazoi berberarengatik. Geldialdiak egiteko, lan-hitzarmenean jasota den malgutasunari buruzko neurria baliatuko du enpresak, hori agortutakoan, orain guti langileekin adostutako beste zenbait neurri plantan jartzen hasiko da. Multinazionalaren zuzendaritza nagusiak Gasteizko lantegirako 1.000 milioi euroko inbertsioa iragarri du.

“Euskadiko Filmategiak” Tasio filma zaharberritu du, Boloniako Cinetecaren baitako “L'immagine Ritrovata” laborategietan. Filma Canneseko eta Donostiako zinema jaialdietan ikusten ahalko da. Filmak Tasioren bizitza irudikatzen du. Lokiz mendilerroan (Nafarroa) den herri ttipi bateko mutikoa zen, zortzi urterekin hasi zen mendiko lanetan eta 14 urte betetzerako ikazkina zen, aita bezala. Bizilagun askok lan finkoaren bila hirira alde eginik, Tasiok nahiago zuen bere askatasuna ukan eta mendian bizi. Anastasio Ochoa Ruiz (Tasio) ikazkin eta isileko ehiztariaren bizitza du filmak oinarri.

900 pertsona galdekatu eta, Lakuak egin inkesta soila izanik ere, argi erakusten du gazteriak EH Bildurentzat bozkatu duela, aldiz adinetakoek PNV-EAJren alde. Inkestak argitaratu tendentziek erakusterat ematen dute 18 eta 29 urte arteko gazteen %53ak EH Bilduren alde egin duela. Bestalde inkesten arabera, 30-39 urteko pertsonen %46ek EH Bilduren alde egin dute. Adinean joan ahala bozkak aldatzen dira, 40-49 eta 50-59 urte aldea gutitzen da: EH Bildu %32,9 eta EAJ %28,4 artean, 60 urtetarik goiti jeltzaleak dira nagusitzen.

Maiatzaren lehenarekin, urtero bezala, Aralarko Mankomunitateak abereei larreak irekitzearen ekitaldia ospatu du. Urriaren 31 arte, bertako alhagietan asetzeko modua kasik 19.000 abelburuk ukanen dute, zehazki: 1.060 behik, 1.000 behorrek eta 16.500 ardik.

Larreen irekiera, Aralarko Mankomunitateak eta Gipuzkoako Foru Aldundiak Aralarreko Mendilerroaren kudeatzeko akordioa lortu eta bi egunera izan da. 2019tik blokeatuta zegoen

akordioan larreak, oihanak eta beste eremu batzuk hobetzeari, sentsibilizazio ekintzei, bideen konponketei, txabolak lehengoratzeari eta eraikitzeari eta inguruko beste azpiegitura batzuk hobetzeari dagokionez, aurten garatu beharreko ekintzak zehazten dira.

Eneko Bidegain idazleak lortuko du 111 Akademiaren Saria, “Bichta eder” eleberriarentzat. Bihurgune askotako istorioa da. Pertsonaia eta gai anitz dituen kontakizuna. Thriller politikoa, lur eta eraikuntza espekulazioa, turismoa eta nekazalgoa, euskara eta hizkuntza nagusia, Aljeriako gerla eta negozio zikinak, ETA eta estatuko krimenak, Lapurdi eta antzinako Nafarroa, nagusiak eta menekoak gurutzatzen diren, bi protagonistek Altzugaraia jauregia turismo egitasmo espekulatzaile bihurtzearen kontra beren borroka bilakatzen duten.

Maiatzaren 2an ospatu da Eskola Jazarpenaren kontrako nazioarteko eguna. “Educo” Gobernuz Kanpoko Erakundeak ohartarazi du, 12 eta 17 urte bitarteko 1.000 neraberi egin inkesta baten arabera, 30 haur dituen gela batean, bederatzik eskola jazarpena edo bestelako indarkeria eskolan jasan dutela. Ez da erraza indarkeria salatzea eta batzuetan hain normalizatuta da, ezen haurrek ez baitute hala ikusten.

Antxua Eguna ospatu da Getarian (Gipuzkoa), bertan antxoaren eta berdelaren arrantzari buruzko datuak eman dira. Agertu emaitzen arabera, euskal portuetan 6.734.991 kilo antxoa deskargatu dira, kiloko 1,51 euroko batez besteko prezioan. Horietatik, 2.619.836 kilo Euskadiko flotak deskargatu ditu, 1,61€ kiloko batez besteko prezioan, 4.229.248,05 euroko fakturazio globalarekin.

Gipuzkoako portuek (Getaria, Pasaia eta Hondarribia) 2.938.439 kilo deskargatu dituzte, 1,55€ kiloko batez besteko prezioan. Bizkaian (Bermeo, Ondarroa eta Santurtzi) deskargak 3,8 tona ingurukoak izan dira, 1,47€ kiloko batez besteko prezioan. Iaz, sasoi berean 3,2 milioi kilo harrapatu ziren, kiloko 1,97 euroko batez besteko prezioan. Antxoaren kuota 31.614.622 kilokoa da. Kantauri itsasoan (Euskadi, Kantabria, Asturias eta Galizia) 11,4 milioi kilo harrapatu dira, Estatuko kuotaren %36.

Ikasle Abertzaleak antolakundeak ikasle guziei dei egin die, mundu osoan hedatzen ari den StudentsForGaza ekimenarekin bat egitera, kanpaldietara batzeko. Maiatzaren 6an hasi dira Ibaetako, Gasteizko, Leioako eta NUPeko kanpusetan.

“Egiari Zor” fundazioak azaldu duenez, Frantziako armadako aditu talde batek Landetan miaketa lan batzuk egin ditu. Jose Miguel Etxeberria Alvarez “Naparraren” gorpuzkiak egon zitezkeen eremu batean, baina ez dute haren arrastorik aurkitu: “Lanen emaitza, 2017an bezala, negatiboa izan da”. Orain, Frantziak lan horien inguruko txostena Espainiako Auzitegi Nazionalari igorriko dio, familia zer erabakiko duen zain da, auzian jarraitzeko beharrezko urratsak egiteko. Eneko Etxeberriak, Naparraren anaiak, adierazi du: “Ez dakigu zer egin, esperoan baikaude Espainiako Auzitegi Nazionaleko epaile den Ismael Morenok zer erabakiko duen. Horren arabera ikusiko dugu”. Egiari Zor elkarteak eta Etxeberria familiak adierazi dute ez dutela alde batera utziko: “Jose Miguelen gorpuzkiak berreskuratu eta etxera ekartzeko helburua dugu. Gertatu zen guzia jakitea eta justiziarako eskubidea gauzatzea, horrenbeste zor baitzaigu”. Auzia zabalik atxikitzeaz ga...