Kixka antzerki festibala

Kixka konpainiak, 30. urtemuga ospatuko du, Larreko kulturgunean, igandean ekainaren 16an egitarau aberatsarekin. Lantegi-taldetan diren haur, gazte eta helduek, urte guziko antzerki-lan eta sorkuntzen azaltzeko aukera dute. Halere programa honetan, frantsesezko antzerkiak soilik dira presentatuak: (14:30) “Malices et sortilèges au royaume” eta “Le mystére de la fleur magique”, haurren sorkuntzak; (19:00) “La ballade des planches”, kolegioko ikasleen tailerra; (20:00) “Où sont les clés du Théâtre?” helduen taldeak emanik. Antzerki munduko ohituren arabera sarrera txapelean egingo da, diru bilketa joanen da “Euskal Herri Maroko” elkartearen mesedetan, etorri ongi gozatzerat.

Bestetako erreserbak

Herriko bestak ate joka ari zauzkigu, aurtengo berezitasuna, ostegunean hasi eta astelehenarekin bururatuko direla, beraz ekainaren 27tik uztailaren 1era. Programa bertze batekoan aurkeztuko dugu, aldiz ohiko bazkari-afariendako izenak eman behar dira, hauetan ostiral eguerdiko adinekoen bazkaria eta arratseko zikiroa, baita igande eguerdiko senpertarren paella bazkaria. Izen emaiteak iraganen dira, ostiraletan 14 eta 21ean (18:00-20:00), larunbatetan 15 eta 22an (10:00-12:00), Denen Etxean edo deituz: 06-50-98-85-20.

Besta Berri begiradan

Nahiz aspaldiko ekitaldia izan, orainokoan belaunaldi guziak uztartzen dituen ospakizun eder hori ongi nabaritua da Senperen. 70. hamarkadan bultzada berri bat emana izan zen, Arbeletche erretorraren ekimenez, jantzi eta dantza berriak sarraraziz, zonbait herrien moduan. Halere gaur egun, elizatik pixka bat urrunduak diren haur eta gazteak, betiko aktore bilakatzen dira zeremoni huntarako, biziki pozgarria baita. Aurten eguraldia lagun, parte hartze musikala, kantatua, dantzatua, kartsutasunean iragan da. Ororen buru, denen mobilizazioari esker Besta Berri jendetsua eta hunkigarria.

Ostegun arratsean “euskaraz mintzatu”

Ekainaren 13an (18:30), Lanetik lekora euskaraz mintzatzeko parada elgarren artean eskainia da, Sanoki ostatu berrian, Lizardia gunean. Ekimen polita litaike, elkarte batzuk antolatua, hauetan Bai Euskarari, Lan eta Bizi euskaraz, Mamia kolektiboa, Seigos, Albizua Ingeniaritza bertzeak bertze. “Afterwork Euskaraz” izendatua, tragotxo bat edateko eta euskaraz mintzatzeko aitzaki ederra, hurbildu eta ez lotsa!

Eskuin muturra gora

Euskal Herri gehienetan bezala, Europar hauteskundetan Senperen ere eskuin muturreko Bardellaren zerrenda nagusitu da 727 bozekin, Sozialista (406) eta Renaissance (395) alderdien aitzinean. Hunen ondorioz, Macron presidentearen aginduz, deputatuen bozketara gomit gira ekainaren 30ean eta uztailaren 7an.

Errugbian finalerditara

Gaitzeko partida egin ondoan, Gers departamentuko Bassoues-Lupiac-Montescq ekipoaren kontra, gure taldeak garaipena eskuratu du, 22/17. Anitz sufriturik, aurkariak gorputzez azkarrago zirelakoan, halere zailtasunez zailtasun, abiadura gehiago ezarriz abantaila hartu dute. Sekulako sostengatzailek Benejacq herriraino bidaia egina zuten, orain St Jean d’Angelyren kontra ariko dira, heldu den igandean, finalerdietan. Talde hunen aurka irabazi zuten Akitania Berriko finala (62/5), badakigun bezala partida guziak desberdinak dira. Altxor bikaina eskuetatik hurbil dute, ez amore eman, aupa Senpere!