Heriotze: Anaiarteako Yvonne Bide

Anaiarteako Yvonne Bidek (sortzez Jaurena) utzi gaitu. 67 urte zituen. Bazuen zonbait urte eritasun arraro batek atzeman zuela eta hunen kontra egun guziz borrokatzen zela. J-Michel bere senarrarekin, alabekin eta familiakoekin. Haurrez inguraturik, maitaturik eta ontsa artaturik, etxean bizi izan da azken mementoraino. Emazte langile, goxo eta ongietorri egilearen oroitzapena uzten dauku.

Mendigorrian sortua, J-Michel bere auzo laborariarekin ezkondurik, Anaiartea etxea eraiki zuten, Bordalanda etxaldearen ondoan. Lan denboraldi gehiena Boncolac enpresako bulegoetan iragana baldin bazuen ere, bere etxaldeko harat-hunatak hurbiletik segitzen zituen.

Joan den asteazken goizean Lekuineko eliza mukurru bete zen, Yvonne zenari azken agur baten egitera jinak baitziren familiako, herritar, eta hainbat adiskide hurbileko eta urruneko.

Dolumin bizienak Jean-Michel senarrari, Joëlle, Jenofa eta Laura alaberi eta hain maite zituen hauen haurreri, Xalbat eta Maialen anai-arreberi, suhieri, koinateri, Anaiarteako eta Bordalandako familieri eta ahaidegoari.

Urtatsez bazkaria Denen Etxean

Goti Aire hirugarren adinekoen elkarteak bazkaria antolatzen du Denen Etxeko gelan, Urtatsez asteazken eguerdiz. Urte berriko lehen egunari doakion bazkari ona proposatzen dute, 58€tan. Haatik aitzinetik izenak eman behar dira, permanentzia atxikiko dute horretarako abenduaren 7an larunbat goizarekin, plaza gibeleko Goiti Aireren gelan (10:30-12:00). Izena emaitean beharko da ordaindu bazkaria, eta gibelera egiten baldin bada, antolatzaileek ez dute txekea edo dirua itzuliko.

Oroitarazten dute bazkaria elkarteko kide ez direnentzat ere irekia dela, lagunentzat ala familiakoentzat. Zerbitzua (12:30) goizik hasiko baita, eguerditan hor izaitea galdatzen dute.

Kantaldia Otxalde taldearekin

Hazparneko Ezkia ikastolan ibiltzen diren 23 aihertar haurren burasoek jakinarazten dute kantaldia antolatuko dutela Ezkia Ikastolarekin abenduaren 1ean, Otxalde taldea gomitatuz. Nota ezazue oraindanik. Horra hor igande arratsalde eder baten iragaiteko parada dudarik gabe. Xehetasunak heldu den astean.

Odol emaitea astelehenean eta asteartean

Odol biltze zentroak odol eskasean daude. Gure odolaren emaiteko egin dezagun indar. Hemen posible izanen da, Denen Etxean, azaroaren 18an astelehenarekin (8:00-11:30) eta azaroaren 19an asteartearekin (15:00-19:00). Ongi etorri deneri!