Abarratia kaskoan iragan ibilaldi eta kontzertuen arrakasta

Duela 2 urte "Arberoako ostiralak" sail berria hasi ziren antolatzen, udan, Aiherra, Izturitze, Donamartiri eta Donoztiriko Herriko Etxe eta lau herrietako elkarteen artean. Aurten ere herri hauetako besta komite, ihiztari ala kultur elkarteek bide beretik segitu dute, batasun bakoitzak animazio bat ortziraletan herri bakoitzean aldizka proposatuz.

Gure herriari dagokionez, Abarratia kaskoan besta komiteak antolatu animazioak gaitzeko arrakasta bildu zuen, joan den agorrilaren 23an. Parte hartzaileak edo ibiltariak Abarratia mendi zolan elkartzera gomitatuak ziren iluntzean, handik oinez, bidexka bazterretako seinaleak segituz, oren batez Abarratia kaskora heltzeko gisan. Gainetik denbora ederra lagun, iluntzean, bista paregabea zen eta biziki goxo zen. Abarratia kaskoan kantaldi ederra ikusi eta entzun ahal izan dute horrara hurbilduak ziren 250 bat lagunek, gehienak gazteak, herrikoak eta auzo herrietakoak, naturaren erdian beti ere momentu on baten gozatzeko asmoz etorriak. Eta hala izan zen: lurrean edo alkietan jarririk, Abarratia mendi gaineko ikurriñaren azpian, entzuleek Amikuzetik etorri Botx talde onaren ikusgarri edo kontzertua gozatu baitzuten. Ikusgarria suziriekin bururatu zen.

Kantaldi ondoan, publiko gehiena tokian berean goxoan egon da, pesta komiteak eskaini edarien eta taloen jastatzeko.

Milesker besta komiteari animazio atsegina proposaturik eta gaitzeko antolakuntza segurtaturik. Heldu den urte arte!

Auxotearen azken eguna

Aihertar anitzentzat eta ostatu huntako kliente askorentzat, bitxi egiten du orain ostatua hetsirik ikustea. Henrieta Haristoy etxekandereak erretreta hartu du joan den igandean, buruilaren lehenean, ondorioz azken aste eta egunetan sekulako jendea ibili da hor, ostatua mukuru beterik izan arte. Besta komitekoek ere joan den larunbateko biltzar nagusiaren eta palantxazko finalen ondotik, Auxotean bururatu dute eguna, mahain on baten inguruan.

Bazuen 4 belaunaldi familia berak orain arte ostatua atxikitzen eta ibilarazten zuela. Denboran epizeria ere atxiki zuten. Zonbat elkarretaratze, bataio, komunione edo eztei apairu ez ote da egin? Zonbat mus eta birla haitada? Zurrumurru asko izanikan ere, zer bilakatuko den Auxotea xuxen ez dakigu oraino. Geroak erranen. Anartean, erretreta on Henrieta!

Olagarrua antzerkia

Laster antzerki eder baten ikusteko parada ukanen dugu, Herriko Etxeak eta Beltzuntze elkarteak proposaturik, Udalbiltzaren laguntzarekin. Denen Etxean iraganen da (20:30), buruilaren 13an, ostiralarekin. Hiru aktore ezagunek, profesionalek, 3 emaztek antzeztuko dute: Olatz Beobide, Maitane Perez eta Nerea Arriola Donostiatik eta Iruñetik heldu dira. Tratatuko duten gaia:“Hobendunak ote gira? Ba al daude hoben edo huts handi eta ttipiak?” Hobenen desagerraraztea entseatuko dira oren bat iraunen duen obra hunen bidez. Jakinez nor diren aktoreak, hitzordua ez dugu huts egin behar. Oroit eta nota ezazueorain beretik: Olagarrua antzerkia, buruilaren 13an Denen Etxean (20:30)!

Nahas mahas

Urte hondarrari buruz, huna nahas mahas hitzordu batzuen berri:

Buruilaren 26an, Goiti Aire elkartearen ateraldia autobusez Maulera (Gaztain etxearen eta Mauleko ozpin etxearen bisita, bazkaria, Gurs-eko preso kanpamenduaren bisita). Urriaren 19an, “Aiherra Antzuola 40 urte” handizki ospatuko da, xehetasunak berantago. Abenduaren lehenean, kantaldia Ezkia ikastolaren alde, Denen Etxeko gela handian. Lehen partean Ezkia ikastolako 150 haurrak kantuz (Otxalderen kantuak) eta bigarren partean Otxalde taldea (antolatzaile aihertar lehengo eta oraiko burasoak eta Ezkia ikastola)

Ogi Bihia okindegia: abisu

Hemendik goiti Ogi Bihia okindegia astelehenetan zerratua izanen da. Horrek erran nahi du asteartetik igandera goiz guziz irekia izanen dela.